(vovworld) - ວັນທີ 24/12, ທ່ານ Lakhdar Brahimi, ທູດພິເສດລວມຂອງສະຫະປະຊາຊາດ ແລະ ສະຫະພັນ ອາຣັບ (ຫຼື AL) ກ່ຽວກັບບັນຫາ ຊີຣີ ມີການປຶກສາຫາລື ກັບທ່ານປະທານາທິບໍດີ ຊີຣີ Bashar Al Assad ຢູ່ນະຄອນຫຼວງ Damascus. ກ່າວຄຳເຫັນຕໍ່ວົງການນັກຂ່າວພາຍຫຼັງການພົບປະ, ທ່ານທູດພິເສດສາກົນ Brahimi ໃຫ້ຮູ້ວ່າ: ທ່ານແລກປ່ຽນກັບທ່ານປະທານາທິບໍດີ Assad ກ່ຽວກັບວິທີເພື່ອຢຸດຕິວິກິດການຢູ່ ຊີຣີ ກໍຄືສະແດງທັດສະນະສະເພາະຂອງຕົນ ກ່ຽວກັບວິທີແກ້ໄຂວິກິດການ. ແຕ່ເຖິງຢ່າງໃດກໍຕາມ, ທ່ານ Brahimi ບໍ່ຊີ້ແຈງລະອຽດກ່ຽວກັບແຜນການໃໝ່ຂອງຕົນ, ພຽງແຕ່ຮັບຮູ້ວ່າສະພາບການຢູ່ ຊີຣີ ຍັງໜ້າວິຕົກກັງວົນຫຼາຍ. ທ່ານທູດພິເສດ Brahimi ກໍ່ປະຕິເສດຢ່າງແຮງຕໍ່ບັນດາຂ່າວລືໃນໄລຍະມໍ່ໆມານີ້ທີ່ຖືວ່າ: ທ່ານປະທານາທິບໍດີ Assad ບໍ່ຢາກພົບປະກັບທ່ານ ຫຼືໄດ້ຕັ້ງໜ້າໂຈະການຢ້ຽມຢາມຄັ້ງນີ້. ທ່ານ Brahimi ສະແດງຄວາມຫວັງວ່າ ທຸກຝ່າຍທີ່ກ່ຽວຂ້ອງເຖິງວິກິດການຢູ່ ຊີຣີ ອາດຈະບັນລຸໄດ້ຂໍ້ຕົກລົງເພື່ອຢຸດຕິການປະທະກັນຢ່າງນອງເລືອດທີ່ແກ່ຍາວເປັນເວລາ 21 ເດືອນຢູ່ປະເທດ ຕາເວັນອອກກາງນີ້.