ຍົກສູງບົດບາດຂອງບັນດາ ອົງການແຫ່ງລັດໃນການ ຄົ້ນພົບແລະລົງໂທດ ການກະທຳສໍ້ລາດບັງຫຼວງ
(ພາບປະກອບ:ngoaivuhatinh.gov.vn)
(vovworld)- ຕອນເຊົ້າວັນທີ 9/7 ຢູ່ຮ່າໂນ້ຍ, ອົງການກວດກາລັດຖະບານໄດ້ຈັດກອງປະຊຸມສຳມະນາ ”ບົດບາດຂອງບັນດາອົງການແຫ່ງລັດໃນການຄົ້ນພົບ ລົງໂທດ ການກະທຳສໍ້ລາດບັງຫຼວງ-ສະພາບຕົວຈິງ ແລະ ມາດຕະການ”. ໃນຊຸມປີຜ່ານມາ, ວຽກງານປ້ອງກັນ, ຕ້ານໄພສໍ້ລາດບັງຫຼວງ ບັນລຸໄດ້ບັນດາໝາກຜົນໃນເບື້ອງຕົ້ນ, ຫຼາຍຄະດີສໍ້ລາດບັງຫຼວງທີ່ຮ້າຍແຮງ, ສັບສົນໄດ້ຄົ້ນພົບ ແລະ ລົງໂທດຢ່າງເຂັ້ມງວດ. ແຕ່ເຖິງຢ່າງໃດກໍ່ຕາມ, ສະພາບສໍ້ລາດບັງຫຼວງ, ຟູມເຟືອຍຍັງໄດ້ເກີດຂຶ້ນຢູ່ຫຼາຍຂະແໜງ, ຂັ້ນຕ່າງໆ, ຫຼາຍຂົງເຂດດ້ວຍຂອບເຂດກ້ວາງຂວາງ ແລະ ມີລັກສະນະສັບສົນ, ວຽກງານປ້ອງກັນ, ຕ້ານໄພສໍ້ລາດບັງຫຼວງຍັງມີຄວາມຈຳກັດ…ທ່ານຫງວຽນກວກຮຽບ, ຫົວໜ້າສະຖາບັນວິທະຍາສາດກວດກາ, ສັງກັດອົງການກວດກາລັດຖະບານ ຖືວ່າ: ເພື່ອໃຫ້ວຽກງານປ້ອງກັນ, ຕ້ານໄພສໍ້ລາດບັງຫຼວງບັນລຸປະສິດທິຜົນ,ມາດຕະການຕົ້ນຕໍ ແລະ ພື້ນຖານ ນັ້ນແມ່ນຍົກສູງບົດບາດຂອງບັນດາອົງການແຫ່ງລັດໃນການຄົ້ນພົບ ແລະ ລົງໂທດການກະທຳລາດບັງຫຼວງ:
”ເພື່ອຄົ້ນພົບການກະທຳສໍ້ລາດບັງຫຼວງທີ່ມີປະສິດທິຜົນ, ກ່ອນອື່ນໝົດຕ້ອງສ້າງໄດ້ຊ່ອງເກັບຂໍ້ມູນຂ່າວສານ, ເອກະສານກ່ຽວກັບການສໍ້ລາດບັງຫຼວງຢ່າງພາວະວິໄສ, ກ້ວາງຂວາງ ແລະ ໄວວາ. ຕ້ອງມີການກຳນົດຄວາມຮັບຜິດຊອບໃຫ້ບັນດາອົງການຢ່າງລະອຽດຄື: ປະຕິບັດວຽກງານປ້ອງກັນ, ຕ້ານໄພສໍ້ລາດບັງຫຼວງໄດ້ດີແລ້ວບໍ່, ການຕໍ່ສູ້ ແລະ ຄົ້ນພົບ, ລົງໂທດການກະທຳສໍ້ລາດບັງຫຼວງແມ່ນອົງການໃດ…”