ທ່ານນາຍົກລັດຖະມົນຕີ: ຫົວຄິດປະດິດສ້າງເພື່ອສ້າງສາ ແລະ ປົກປັກຮັກສາປະເທດຊາດ
ທ່ານນາຍົກລັດຖະມົນຕີ ຫງວຽນເຕິ໋ນຢຸງ ແລະ ບັນດາຜູ້ມີຫົວຄິດ
ປະດິດສ້າງ
(ພາບ: baomoi.com)
|
(vovworld) - ກ່າວຄວາມເຫັນທີ່ການພົບປະກັບຜູ້ມີຫົວຄິດປະດິດສ້າງສະໝັກຫຼິ້ນທີ່ດີເດັ່ນ 63 ຄົນ ໃນປີ 2015, ເຊິ່ງຈັດຂຶ້ນໃນຕອນເຊົ້າວັນທີ 12/5, ຢູ່ຮ່າໂນ້ຍ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ, ເນັ້ນໜັກວ່າ: ພັກ, ລັດຍາມໃດກໍ່ເອົາໃຈໃສ່ ແລະ ຖືເປັນສຳຄັນການຄົ້ນຄ້ວານຳໃຊ້ວິທະຍາສາດ ເຕັກໂນໂລຢີ, ເສີມຂະຫຍາຍລັກສະນະຂະຫຍັນຂັນເຄື່ອນ, ມີຫົວຄິດປະດິດສ້າງໃນໝູ່ປະຊາຊົນ, ເພື່ອສ້າງສາ ແລະ ປົກປັກຮັກສາປະເທດຊາດ. ພ້ອມທັງຖືເປັນສຳຄັນການເສີມຂະຫຍາຍຄວາມສາມາດບົ່ມຊ້ອນຫົວຄິດປະດິດສ້າງໃນໝູ່ປະຊາຊົນ, ສົ່ງເສີມຜູ້ອອກແຮງງານແຕ່ລະຄົນຄົ້ນຄ້ວາຢ່າງມີຫົວຄິດປະດິດສ້າງ, ເພາະວ່ານີ້ແມ່ນແຫຼ່ງປະດິດສ້າງ, ກຳລັງແຮງລົ້ນເຫຼືອຂອງແຕ່ລະຄົນໃນທຸກຂົງເຂດຂອງຊີວິດການເປັນຢູ່. ໄປພ້ອມກັນນັ້ນແມ່ນການຄົ້ນຄ້ວານຳໃຊ້ບັນດາຫົວຄິດປະດິດສ້າງດ້ານວິທະຍາສາດເຂົ້າໃນການຜະລິດ ເພື່ອປັບປຸງຊີວິດການເປັນຢູ່, ຍົກສູງກຳລັງຄວາມສາມາດຜະລິດ, ຍົກສູງກຳລັງແຮງດ້ານປ້ອງກັນຊາດ, ປ້ອງກັນຄວາມສະຫງົບ ເພື່ອປົກປັກຮັກສາປະເທດຊາດ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ກໍ່ຖືວ່າ, ຢາກກໍ່ສ້າງປະເທດຫວຽດນາມເອກະລາດ, ເອກະພາບ, ສັງຄົມນິຍົມ, ປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມປະຊາທິປະໄຕ, ຍຸຕິທຳ, ສີວິໄລ ແມ່ນຕ້ອງປະຕິບັດການຫັນເປັນປະເທດອຸດສາຫະກຳ ແລະ ທັນສະໄໝ, ເຮັດໃຫ້ປະເທດພັດທະນາຢ່າງໄວ ແລະ ໝັ້ນຄົງ. ໃນນັ້ນ, ປັດໃຈທີ່ມີຄວາມໝາຍຕັດສິນນັ້ນແມ່ນຕ້ອງຄົ້ນຄ້ວາ, ມີຫົວຄິດປະດິດສ້າງ, ນຳໃຊ້ວິທະຍາສາດເຕັກໂນໂລຢີເຂົ້າໃນທຸກຂົງເຂດຂອງຊີວິດສັງຄົມ, ເພື່ອຍົກສູງສະມັດຕະພາບ, ຄຸນນະພາບ, ປະສິດທິຜົນ, ກຳລັງແກ່ງແຍ້ງຂອງຊາດ, ຂອງພື້ນຖານເສດຖະກິດ, ຂອງວິສາຫະກິດ ແລະ ຂອງຜະລິດຕະພັນຫວຽດນາມ.