ທ່ານນາຍົກລັດຖະມົນຕີຫງວຽນເຕີນຢູງເຂົ້າຮ່ວມກອງປະຊຸມ
ພາບ:vov
|
(vovworld)- ຕອນຄ່ຳວັນທີ 12/11 ຢູ່ນະຄອນຫລວງ Nay Pyi Taw ປະເທດມຽນມາ ໄດ້ດຳເນີນກອງປະຊຸມສຸດຍອດ ແມ່ຂອງ- ຍີ່ປຸ່ນ ຄັ້ງທີ 6 ໂດຍມີການເຂົ້າຮ່ວມຂອງການນຳບັນດາປະເທດຄື: ຫວຽດນາມ, ກຳປູເຈຍ, ລາວ, ມຽນມາ, ໄທ ແລະ ຍີ່ປຸ່ນ. ກອງປະຊຸມໄດ້ອອກຖະແຫລງການຮ່ວມ ເຫັນດີເພີ່ມທະວີການເຊື່ອມຈອດພາກພື້ນ ແມ່ຂອງ ຮັບໃຊ້ການສ້າງປະຊາຄົມ ອາຊຽນ ໃນປີ 2015, ສ້າງ “ວິໄສທັດພັດທະນາອຸດສາຫະກຳແມ່ຂອງ” ເພື່ອສ້າງຄວາມສະດວກໃຫ້ແກ່ບັນດາການເຄື່ອນໄຫວດຳເນີນທຸລະກິດລະຫວ່າງອະນຸພາກພື້ນແມ່ນ້ຳຂອງ ແລະ ຍີ່ປຸ່ນ.
ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີລັດຖະບານ ຍີ່ປຸ່ນ ຫນູນຊ່ວຍຄົ້ນຄ້ວາຄວາມເປັນໄປເລື່ອງກໍ່ສ້າງບັນດາເສັ້ນທາງເຊື່ອມຕໍ່ແລວເສດຖະກິດທາງທິດໃຕ້ ແລະ ແລວເສດຖະກິດທາງທິດຕາເວັນອອກ-ຕາເວັນຕົກກັບອະນຸທະວີບ ອິນເດຍ ແລະ ພາກພື້ນ ອາຊີໃຕ້. ທ່ານນາຍົກລັດຖະມົນຕີ ກໍສະເຫນີ ຍີ່ປຸ່ນ ເພີ່ມທະວີການຫນູນຊ່ວຍ ຄະນະກຳມາທິການແມ່ຂອງຜັນຂະຫຍາຍການຄົ້ນຄ້ວາກ່ຽວກັບການຄຸ້ມຄອງແລະພັດທະນາແຫລ່ງນ້ຳແມ່ນ້ຳຂອງແບບຍືນຍົງ. ທ່ານນາຍົກລັດຖະມົນຕີ ຫງວຽນເຕີນຢູງ ຖືວ່າ: ຄວນສຸມໃສ່ຊຸກຍູ້ການຮ່ວມມືລະຫວ່າງບັນດາວິສາຫະກິດ ແລະ ທ້ອງຖິ່ນຂອງ ຍີ່ປຸ່ນ ກັບວິສາຫະກິດ ແລະ ທ້ອງຖິ່ນບັນດາປະເທດແມ່ຂອງໃນຂົງເຂດທີ່ມີຄວາມສາມາດບົ່ມຊ້ອນຈຳນວນຫນຶ່ງຄື: ກະສິກຳ, ສິນໃນນ້ຳ, logistics..
ກ່ອນຫນ້ານັ້ນ, ທ່ານນາຍົກລັດຖະມົນຕີ ຫງວຽນເຕີນຢູງ ເຂົ້າຮ່ວມກອງປະຊຸມສຸດຍອດ ອາຊຽນ ກັບແຕ່ລະປະເທດຄູ່ເຈລະຈາ ລວມມີ: ອິນເດຍ, ຍີ່ປຸ່ນ, ສປຊ ແລະ ເຂົ້າຮ່ວມກອງປະຊຸມສຸດຍອດສະເຫລີມສະຫລອງ 40 ປີແຫ່ງວັນສ້າງຕັ້ງການພົວພັນຄູ່ຮ່ວມມື ອາຊຽນ -ອົດສະຕາລີ. ເມື່ອແລກປ່ຽນຫລາຍບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ, ໃນນັ້ນມີບັນຫາທະເລຕາເວັນອອກ, ການນຳບັນດາປະເທດ ເນັ້ນຫນັກເຖິງການຮັກສາສັນຕິພາບ, ຄວາມໝັ້ນຄົງ, ສະຖຽນລະພາບຢູ່ພາກພື້ນ, ຮັບປະກັບຄວາມສະຫງົບປອດໄພ, ຄວາມເສລີໃນການເດີນທະເລ, ການບິນຢູ່ທະເລຕາເວັນອອກ; ແກ້ໄຂບັນດາຄວາມຂັດແຍ້ງໂດຍສັນຕິວິທີ, ເຄົາລົບກົດໝາຍສາກົນ, ສົນທິສັນຍາກົດໝາຍທະເລຂອງ ສປຊ ປີ 1982.
ເນື່ອງໃນໂອກາດເຂົ້າຮ່ວມກອງປະຊຸມສຸດຍອດ ອາຊຽນ ຄັ້ງທີ 25, ຕອນບ່າຍວັນທີ 12/11, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ພົບປະກັບນາຍົກລັດຖະມົນຕີລັດເຊຍ Dmitri Medvedev ແລະ ນາຍົກລັດຖະມົນຕີ ອົດສະຕາລີ Tony Abbott.
Thanh Chung ນັກຂ່າວ VOV ລາຍງານຂ່າວຈາກ ມຽນມາ