ທ່ານປະທານປະເທດ,ນາຍົກລັດຖະມົນຕີ,ປະທານສະພາແຫ່ງຊາດລາຍງານກ່ຽວກັບວຽກງານໃນອາຍຸການຜ່ານມາ

ວັນອັງຄານ ທີ 22 ມີນາ ຄ.ສ. 2016 | 14:15:13

ທ່ານນາຍົກລັດຖະມົນຕີຫງວຽນເຕີນຢູງສະເຫນີບົດລາຍງານກ່ຽວກັບ
ວຽກງານໃນອາຍຸການຜ່ານມາ
ພາບ:thanhtra.com

(vovworld)- ວັນທີ 22/3, ບັນດາສະມາຊິກສະພາແຫ່ງຊາດເຂົ້າຮ່ວມກອງປະຊຸມສະໄຫມສາມັນເທື່ອທີ 11 ສະພາແຫ່ງຊາດຫວຽດນາມຊຸດທີ 13 ໄດ້ຮັບຟັງບັນດາບົດລາຍງານອາຍຸການ 5 ປີ ຂອງບັນດາການນຳສູງສຸດ, ໃນນັ້ນ ມີບົດລາຍງານຂອງທ່ານປະທານປະເທດເຈືອງເຕີນຊາງ, ທ່ານນາຍົກລັດຖະມົນຕີຫງວຽນເຕີນຢູງ, ທ່ານປະທານສະພາແຫ່ງຊາດ ຫງວຽນຊີງຮຸ່ງ.

ໃນ ບົດລາຍງານອາຍຸການຂອງສະພາແຫ່ງຊາດຊຸດທີ 13, ທ່ານປະທານສະພາແຫ່ງຊາດ ຫງວຽນຊີງຮຸ່ງ ໄດ້ຢືນຢັນວ່າ: ໃນໄລຍະ 5 ປີຜ່ານມາ, ສະພາແຫ່ງຊາດ, ບັນດາອົງການຂອງສະພາແຫ່ງຊາດໄດ້ຜັນຂະຫຍາຍປະລິມານວຽກງານຫລາຍສົມຄວນ ປະກອບສ່ວນນຳປະເທດຊາດຜ່ານຜ່າຄວາມຫຍຸ້ງຍາກ. ກ່ຽວກັບບົດບາດຫນ້າທີ່ສ້າງລັດຖະທຳມະນູນ, ນິຕິບັນຍັດ, ສະພາແຫ່ງຊາດ ບັນລຸໄດ້ໝາກຜົນທີ່ພົ້ນເດັ່ນ, ມີຄວາມສຳຄັນທີ່ສຸດ. ພ້ອມກັບເລື່ອງຮັບຮອງເອົາລັດຖະທຳມະນູນປີ 2013, ສະພາແຫ່ງຊາດຊຸດທີ 13 ໄດ້ພິຈາລະນາ, ປັບປຸງ, ເພີ່ມເຕີມ ຫລື ປະກາດໃຊ້ປະມວນກົດໝາຍ, ກົດໝາຍສຳຄັນໃຫມ່ຫລາຍສະບັບ, ສ້າງລະບົບນິຕິກຳກ່ຽວກັບການກໍ່ສ້າງລັດແຫ່ງອຳນາດນິຕິບັນຍັດສັງຄົມນິຍົມສຳເລັດໂດຍພື້ນຖານ, ຈັດຕັ້ງກົງຈັກລັດ, ລະບອບນະໂຍບາຍເສດຖະກິດການຕະຫລາດ, ກົດໝາຍວ່າດ້ວຍສິດທິມະນຸດ, ສິດ ແລະ ພັນທະພື້ນຖານຂອງພົນລະເມືອງ, ສິດເສລີປະຊາທິປະໄຕຂອງປະຊາຊົນ. ທ່ານປະທານສະພາແຫ່ງຊາດ ຫງວຽນຊີງຮຸ່ງ ຊີ້ແຈ້ງວ່າ:

“ໃນເງື່ອນໄຂເສດຖະກິດປະສົບກັບຄວາມຫຍຸ້ງຍາກ, ສະພາແຫ່ງຊາດ ໄດ້ມີຫລາຍລັດຖະນະໂຍບາຍຄົບຊຸດເພື່ອຮັບມືຢ່າງທັນການ, ປະຕິບັດນະໂຍບາຍການເງິນແລະ ນະໂຍບາຍງົບປະມານຢ່າງລອບຄອບຖີ່ຖ້ວນ, ມີໄຫວພິບ, ຮັບປະກັນຄວາມປອດໄພດ້ານການເງິນແຫ່ງຊາດຢ່າງຂ້ຽວຂາດ, ຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້, ຟື້ນຕົວ ແລະ ສ້າງທ່າເຕີບໂຕເສດຖະກິດ, ຮັບປະກັນຊີວິດສັງຄົມ. ມີຫລາຍລັດຖະນະໂຍບາຍໄດ້ແກ້ໄຂບັນດາຄວາມຮ້ອນເຮັ່ງໃນຊີວິດຢ່າງທັນການ.”

ການເຄື່ອນໄຫວຕິດຕາມກວດກາຂອງສະພາແຫ່ງຊາດກໍມີການປ່ຽນໃຫມ່ຫລາຍຢ່າງ, ສ້າງການຫັນປ່ຽນຢ່າງແຮງໃນການເຄື່ອນໄຫວຂອງທົ່ວກົງຈັກລັດ ຈາກສູນກາງລົງຮອດທ້ອງຖິ່ນ. ອາຍຸການສະພາແຫ່ງຊາດຊຸດທີ 13 ເປັນຂີດໝາຍປະຫວັດສາດເມື່ອເປັນຄັ້ງທຳອິດທີ່ສະພາແຫ່ງຊາດດຳເນີນການປ່ອນບັດໄວ້ວາງໃຈສຳລັບບັນດາຕຳແຫນ່ງໂດຍສະພາແຫ່ງຊາດເລືອກຕັ້ງຫລືໃຫ້ສັດຕະຍາບັນ. ທ່ານປະທານສະພາແຫ່ງຊາດ ຫງວຽນຊີງຮຸ່ງ ຕີລາຄາວ່າ:

“ການເຄື່ອນໄຫວຕິດຕາມກວດກາຂອງສະພາແຫ່ງຊາດ ໄດ້ມີການປ່ຽນໃຫມ່ຫລາຍຢ່າງ, ສ້າງການຫັນປ່ຽນຢ່າງແຮງໃນການເຄື່ອນໄຫວຂອງກົງຈັກລັດຈາກສູນກາງລົງຮອດທ້ອງຖິ່ນ. ຜ່ານການຕິດຕາມກວດກາ, ມີຫລາຍຂໍ້ຈຳກັດ, ອ່ອນດ້ອຍໃນການຄຸ້ມຄອງຂອງທຸກຂັ້ນ, ທຸກຂະແຫນງການໄດ້ພົບເຫັນ ແກ້ໄຂ ແລະ ສະເຫນີແກ້ໄຂ, ສ້າງການກະທົບຢ່າງຕັ້ງຫນ້າໃນສັງຄົມ, ຈາກນັ້ນປັບປຸງຄວາມໄວ້ເນື້ອເຊື່ອໃຈຂອງປະຊາຊົນຕໍ່ການຊີ້ນຳນຳພາຂອງພັກ ແລະ ວຽກງານຄຸ້ມຄອງຂອງລັດ.”
ລາຍງານຕໍ່ຫນ້າສະພາແຫ່ງຊາດກ່ຽວກັບອາຍຸການ 5 ປີຜ່ານມາ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ທົບທວນຄືນໝາກຜົນຊື່ງລັດຖະບານບັນລຸໄດ້ໃນການຄຸ້ມຄອງພັດທະນາເສດຖະກິດສັງຄົມ, ບູລະນະລະບົບກົງຈັກບໍລິຫານລັດ, ເຊື່ອມໂຍງເຂົ້າກັບສາກົນ.

ລັດຖະບານ, ນາຍົກລັດຖະມົນຕີໄດ້ຊີ້ນຳ, ຄຸ້ມຄອງ,ບໍລິຫານ ເປັນເຈົ້າການ, ແລະ ມີຄວາມໄຫວພິບ ເພື່ອຄວບຄຸມໄພເງິນເຟີ້ເປັນຢ່າງດີ, ຮັກສາເສດຖະກິດມະຫາພາກເປັນປົກກະຕິໂດຍພື້ນຖານ, ຮັບປະກັນຄວາມດຸ່ນດ່ຽງໃຫຍ່ ແລະ ບັນລຸການເຕີບໂຕສູງພໍສົມຄວນ. ລັດຖະບານ, ນາຍົກລັດຖະມົນຕີ ໄດ້ຊີ້ນຳສຸມໃສ່ປະຕິຮູບລະບຽບການບໍລິຫານ, ສ້າງສະພາບແວດລ້ອມແຫ່ງການລົງທຶນດຳເນີນທຸລະກິດຢ່າງສະດວກໃຫ້ປະຊາຊົນ, ວິສາຫະກິດ.

ກ່ຽວກັບວຽກງານພົວພັນຕ່າງປະເທດ, ເຊື່ອມໂຍງເຂົ້າກັບສາກົນ, ລັດຖະບານ, ນາຍົກລັດຖະມົນຕີໄດ້ສະເໜີແນະຕໍ່ພັກ, ສະພາແຫ່ງຊາດລັດຖະນະໂຍບາຍສຳຄັນຫລາຍຢ່າງກ່ຽວກັບການພົວພັນຕ່າງປະເທດ ແລະ ການເຊື່ອມໂຍງເຂົ້າກັບສາກົນ, ພິເສດ ແມ່ນກົດໝາຍວ່າດ້ວຍທະເລ ຫວຽດນາມ ແລະ ມະຕິເລກທີ 22 ຂອງກົມການເມືອງ. ສຸມໃສ່ຊີ້ນຳຍົກລະດັບການພົວພັນຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານກັບຫລາຍປະເທດໃນພາກພື້ນ ແລະ ໃນໂລກ. ກ່ຽວກັບບາງບົດຮຽນ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ຖືວ່າ:

“ຕ້ອງມີຫົວຄິດປະດິກສ້າງໃນຈິນຕະນາການພັດທະນາ, ຖືຜົນປະໂຫຍດຂອງປະເທດຊາດ, ຜົນປະໂຫຍດຂອງປະຊາຊົນເປັນຈຸດໝາຍສູງສຸດ, ສຸມໃສ່ປັບປຸງລະບອບເສດຖະກິດການຕະຫລາດໃຫ້ສົມບູນແບບ, ກໍ່ສ້າງລັດແຫ່ງອຳນາດນິຕິບັນຍັດ, ສ້າງກຳລັງໜູນຢ່າງແຮງ ເພື່ອພັດທະນາຢ່າງວ່ອງໄວ ແລະ ໝັ້ນຄົງ. ຕ້ອງປະຕິບັດຫຼັກການລວມສຸນປະຊາທິປະໄຕ, ເພີ່ມທະວີຄວາມສາມັກຄີເປັນຈິດໜຶ່ງໃຈດຽວ”.

ແລະກໍ່ໃນຕອນເຊົ້າວັນດຽວກັນ, ບັນດາສະມາຊິກສະພາແຫ່ງຊາດໄດ້ຮັບຟັງທ່ານປະທານປະເທດ ຫວຽດນາມ ເຈືອງເຕີ໋ນຊາງ ສະເໜີບົດລາຍງານວຽກງານອາຍຸການ 2011 – 2016 ຂອງປະທານປະເທດ. ບົດງາຍງານເນັ້ນໜັກເຖິງ ບັນດາເນື້ອໃນກ່ຽວກັບນິຕິບັນຍັດ ອຳນາດບໍລິຫານຕຸລາການ, ການຕ່າງປະເທດ ກໍ່ສ້າງກຸ່ມກ້ອນມະຫາສາມັດຄີທົ່ວປວງຊົນທັງຊາດ.