(vovworld) - ຕອນເຊົ້າວັນທີ 23 ສິງຫາ, ທ່ານປະທານສະພາແຫ່ງຊາດ ຫງວຽນຊູງຮຸ່ງ ໄດ້ໄປຢ້ຽມຢາມ ແລະ ເຮັດວຽກກັບຄັງເງິນແຫ່ງລັດຫວຽດນາມ ເນື່ອງໃນໂອກາດສະເຫຼີມສະຫຼອງ 68 ປີແຫ່ງວັນສ້າງຕັ້ງຂະແໜງການເງິນ. ໃນຕະຫຼອດ 23 ປີແຫ່ງການເຄື່ອນໄຫວ ແລະ ພັດທະນາ, ຄັງເງິນແຫ່ງລັດຫວຽດນາມ ຢືນຢັນໄດ້ທີ່ຕັ້ງ, ບົດບາດສຳຄັນໃນລະບົບການເງິນ, ປະກອບສ່ວນຢ່າງຕັ້ງໜ້າເຂົ້າໃນພາລະກິດປ່ຽນໃໝ່ ແລະ ເຮັດໃຫ້ພື້ນຖານການເງິນແຫ່ງຊາດໂປ່ງໃສຜ່ານການເຕົ້າໂຮມແຫຼ່ງລາຍຮັບໃຫ້ແກ່ງົບປະມານແຫ່ງລັດຢ່າງໄວ ແລະ ຄົບຖ້ວນ, ປະຕິບັດບັນດານະໂຍບາຍສັງຄົມ ແລະ ຮັບປະກັນການປ້ອງກັນຊາດ, ປ້ອງກັນຄວາມສະຫງົບ. ຄັງເງິນແຫ່ງລັດ ໄດ້ຈັດຕັ້ງການລະດົມທຶນດ້ວຍຈຳນວນຫຼາຍໃຫ້ງົບປະມານແຫ່ງລັດ ແລະ ການລົງທຶນພັດທະນາ; ສະໜອງຂໍ້ມູນ ສະພາບລາຍຮັບ, ລາຍຈ່າຍງົບປະມານແຫ່ງລັດຢ່າງທັນການ, ຊັດເຈນ ຮັບໃຊ້ໃຫ້ການຊີ້ນຳ, ບໍລິຫານຂອງສະພາແຫ່ງຊາດ, ລັດຖະບານ, ບັນດາອົງການສູນກາງ ແລະ ທ້ອງຖິ່ນ.
ກ່າວຄຳເຫັນຢູ່ທີ່ນີ້, ທ່ານປະທານສະພາແຫ່ງຊາດ ຫງວຽນຊິງຮຸ່ງ ປາດຖະໜາວ່າ ຂະແໜງການເງິນສືບຕໍ່ພັດທະນາຢ່າງໝັ້ນຄົງເຂັ້ມແຂງ, ເພື່ອກາຍເປັນເສົາຄ້ຳຂອງພື້ນຖານເສດຖະກິດ, ທັງຮັບປະກັນງົບປະມານແຫ່ງລັດ, ທັງເພີ່ມທະວີການລະດົມບັນດາແຫຼ່ງທຶນເພື່ອພັດທະນາປະເທດຊາດ ໃນສະພາບການໃໝ່ ແລະ ເຊື່ອມໂຍງເຂົ້າກັບສະກົນ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ສະເໜີໃຫ້ຂະແໜງການເງິນເວົ້າລວມ ແລະ ຄັງເງິນແຫ່ງລັດເວົ້າສະເພາະ ສືບຕໍ່ສຳເລັດລະບຽບການໃຫ້ເໝາະສົມກັບສະພາບໃໝ່ຂອງປະເທດຊາດ ທີ່ພວມໃນທ່າພັດທະນາ.