ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ
|
(vovworld)- ເນື່ອງໃນໂອກາດປີໃໝ່ປີມະເມັຍ 2014 , ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ໃຫ້ການສຳພາດຕໍ່ນັກຂ່າວຂ່າວສານ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ແບ່ງປັນກ່ຽວກັບໝາກຜົນທີ່ບັນລຸມາໄດ້ ແລະ ບັນດາວຽກງານທີ່ຄວນສຸມໃສ່ປະຕິບັດໃຫ້ດີໃນໄລຍະສຸດທ້າຍຂອງອາຍຸການກອງປະຊຸມໃຫຍ່ຄັ້ງທີ 11 ຂອງພັກ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ເນັ້ນໜັກວ່າສະຖານະການໂລກ, ພ້ອມກັບບັນດາເງື່ອນໄຂສະດວກ, ກໍຍັງມີການຜັນແປທີ່ສັບສົນ, ການປະທະກັນເກີດຂຶ້ນຢູ່ຫຼາຍແຫ່ງ, ວິກິດການການເງິນ-ເງິນຕາ ແລະ ການຊຸດໂຊມດ້ານເສດຖະກິດທົ່ວໂລກ ໄດ້ສົ່ງຜົນກະທົບທີ່ບໍ່ດີເຖິງການກໍ່ສ້າງ ແລະ ປົກປັກຮັກສາປະເທດຊາດຂອງຫວຽດນາມ. ແຕ່ພັກ ແລະ ລັດໄດ້ດັດປັບຢ່າງທັນການ ແລະ ຈັດຕັ້ງປະຕິບັດບັນດາແຜນນະໂຍບາຍ, ນະໂຍບາຍ, ມາດຕະການນຳເສດຖະກິດຂອງປະເທດຊາດບັນລຸໝາກຜົນທີ່ຕັ້ງໜ້າ. ສິ່ງທີ່ພົ້ນເດັ່ນຂຶ້ນແມ່ນເສດຖະກິດມະຫາພາກມີສະຖຽນລະພາບໂດຍພື້ນຖານ, ການເຕີບໂຕໄດ້ຮັບການຮັກສາຢູ່ໃນລະດັບເໝາະສົມ, ໄພເງິນເຟີ້ໄດ້ຮັບການຄວບຄຸມ, ການຮັບປະກັນຊີວິດສັງຄົມ ໄດ້ຮັບການປະຕິບັດເປັນຢ່າງດີ. ປີ 2013, ຍອດຜະລິດຕະພັນພາຍໃນ GDP ເພີ່ມຂຶ້ນ 5,42%; ເງິນເຟີ້ໄດ້ຮັບການຄວບຄຸມຢູ່ໃນລະດັບ 6,04%; ອັດຕາຄອບຄົວທຸກຍາກຕ່ຳກ່ວາ 8%. ວິວັດການສ້າງໂຄງປະກອບເສດຖະກິດຄືນໃໝ່, ປ່ຽນໃໝ່ຮູບແບບການເຕີບໂຕ ໄດ້ຮັບການຍູ້ແຮງ, ໂດຍສະເພາະແມ່ນ ການສ້າງໂຄງປະກອບຂົງເຂດການເງິນ, ທະນາຄານ ແລະ ບັນດາລັດວິສາຫະກິດຄືນໃໝ່. ບັນຍາດກາດປະຊາທິປະໄຕພາຍໃນພັກ, ໃນສັງຄົມໄດ້ຮັບການເປີດກ້ວາງ ແລະ ເສີມຂະຫຍາຍຢ່າງບໍ່ຢຸດຢັ້ງ. ວຽກງານການຕ່າງປະເທດໄດ້ຮັບການຍູ້ແຮງຢ່າງຮອບດ້ານ. ຫວຽດນາມໄດ້ເປັນເຈົ້າການ ແລະ ຕັ້ງໜ້າເຂົ້າຮ່ວມຫຼາຍກົນໄກຮ່ວມມືທີ່ສຳຄັນຂອງພາກພື້ນ ແລະ ທົ່ວໂລກ.ເປັນຄັ້ງທຳອິດທີ່ ຫວຽດນາມກໍໄດ້ຮັບເລືອກຕັ້ງເຂົ້າເປັນສະມາຊິກສະພາສິດທິມະນຸດແຫ່ງສະຫະປະຊາຊາດ; ໄດ້ຮັບເລືອກຕັ້ງເປັນປະທານສະພາຜູ້ວ່າການອົງການພະລັງງານປະລະມານູສາກົນ, ແລະ ເປັນສະມາຊິກຄະນະກຳມາທິການມໍລະດົກໂລກ UNESCO ...ທັງນີ້ກໍເປັນຢັ້ງຢືນທີ່ຕັ້ງບົດບາດ ແລະ ອິດທິພົນຊື່ສຽງທີ່ນັບມື້ນັບສູງຂຶ້ນຂອງຫວຽດນາມບົນເວທີສາກົນ. ກ່ຽວກັບວຽກງານປ້ອງກັນ ແລະ ຕ້ານໄພສໍ້ລາດບັງຫຼວງ, ປະຕິບັດການປະຢັດ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຢືນຢັນວ່າ ການຕໍ່ສູ້ປ້ອງກັນ ແລະ ຕ້ານໄພສໍ້ລາດບັງຫຼວງ ແມ່ນວຽກງານຍາວນານ, ຫຍຸ້ງຍາກ,ສັບສົນ ຊຶ່ງຕ້ອງປະຕິບັດຢ່າງຄົບຊຸດ, ຮອບດ້ານ.... ກ່ຽວກັບວຽກງານທີ່ຈຳເປັນຕ້ອງປະຕິບັດໃນ 2 ປີທີ່ຍັງເຫຼືອຂອງອາຍຸການກອງປະຊຸມໃຫຍ່ຄັ້ງທີ 11 ຂອງພັກ. ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຖືວ່າ ບຸລິມະສິດອັນດັບໜຶ່ງຍັງຄົງແມ່ນຮັກສາເສດຖະກິດມະຫາພາກເປັນປົກກະຕິ, ການເຕີບໂຕຄວນຮັບການຮັກສາຢູ່ໃນລະດັບເໝາະສົມ, ຄວບຄຸມໄພເງິນເຟີ້, ຮັບປະກັນຊີວິດສັງຄົມ.....ພ້ອມກັນນັ້ນ, ຄວນເອົາໃຈໃສ່ແກ້ໄຂບັນຫາວັດທະນະທຳສັງຄົມເປັນຢ່າງດີ, ປົວແປງຊີວິດດ້ານວັດຖຸ ແລະ ຈິດໃຈໃຫ້ແກ່ປະຊາຊົນ, ຮັກສາສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍ ແລະ ຄວາມປອດໄພສັງຄົມ