(vovworld) - ໂດຍໄດ້ຮັບຄຳເຊີນຂອງລັດຖະບານສາທາລະນະລັດປະຊາຊົນຈີນ ແລະ ອຳນາດການປົກຄອງເຂດປົກຄອງຕົນເອງຊົນເຜົ່າ ຈ້ວາງ ແຂວງກວາງສີ, ປະເທດຈີນ, ທ່ານນາຍົກລັດຖະມົນຕີຫວຽດນາມ Nguyen Tan Dung ຈະເຂົ້າຮ່ວມງານຕະຫຼາດນັດວາງສະແດງອາຊຽນ - ຈີນ (CARXPO) ແລະ ກອງປະຊຸມສຸດຍອດການລົງທຶນ - ການຄ້າອາຊຽນ - ຈີນ ຄັ້ງທີ 9, ເຊິ່ງດຳເນີນໄປຢູ່ນະຄອນໜາມໜີງ, ເຂດປົກຄອງຕົນເອງຊົນເຜົ່າ ຈ້ວາງ ແຂວງກວາງສີ, ປະເທດຈີນ ແຕ່ວັນທີ 20 – 21/9/2012. ທ່ານນາຍົກລັດຖະມົນຕີ Nguyen Tan Dung ເຂົ້າຮ່ວມ CARXPO ແລະ ກອງປະຊຸມສຸດຍອດການລົງທຶນ - ການຄ້າອາຊຽນ - ຈີນ ຄັ້ງທີ 9 ໃນສະພາບການທີ່ການພົວພັນມິດຕະພາບ ແລະ ຮ່ວມມືຫວຽດນາມ - ຈີນ ພວມໄດ້ຮັບການພັດທະນາຢ່າງວ່ອງໄວ, ເລິກເຊິ່ງ ແລະ ກວ້າງຂວາງໃນທຸດຂົງເຂດ, ນຳມາເຊິ່ງຄວາມສະດວກແທດຈິງຫຼາຍຢ່າງໃຫ້ທັງສອງຝ່າຍ.
ງານຕະຫຼາດນັດວາງສະແດງອາຊຽນ - ຈີນ ຖືກຈັດຂຶ້ນປະຈຳປີໂດຍກະຊວງການຄ້າຈີນ, ກະຊວງເສດຖະກິດ 10 ປະເທດອາຊຽນ ແລະ ຄະນະເລຂາອາຊຽນ ພ້ອມກັນຈັດຕັ້ງ, ດ້ວຍຈຸດໝາຍ “ຊຸກຍູ້ການກໍ່ສ້າງພາກພື້ນການຄ້າເສລີອາຊຽນ - ຈີນ, ພ້ອມກັນແບ່ງປັນກາລະໂອກາດຮ່ວມມື ແລະ ພັດທະນາ”. ຫົວຂໍ້ຂອງ CARXPO ປີນີ້ແມ່ນ “ຮ່ວມມືດ້ານວິທະຍາສາດ ແລະ ເຕັກໂນໂລຊີ” ຊຸກຍູ້ການຮ່ວມມືກ່ຽວກັບວິທະຍາສາດ ແລະ ເຕັກໂນໂລຊີກໍຄືບັນດາຂົງເຂດອື່ນໆລະຫວ່າງອາຊຽນ - ຈີນ. ທີ່ງານຕະຫຼາດນັດຄັ້ງນີ້, ຄະນະຫວຽດນາມ ຈະເຂົ້າຮ່ວມການວາງສະແດງດ້ວຍຮ້ານວາງສະແດງ 200 ຮ້ານ ໃນເນື້ອທີ 3.500 ຕາລາງແມດ, ຢືນອັນດັບໜຶ່ງໃນຈຳນວນບັນດາປະເທດອາຊຽນ ທີ່ເຂົ້າຮ່ວມງານຕະຫຼາດນັດ.