ນາຍົກລັດຖະມົນຕີຫງວຽນຊວນຟຸກຕ້ອນຮັບເອກອັກຄະລັດຖະທູດອົດສະຕາລີ
|
(vovworld) - ຕອນບ່າຍວັນທີ 24/11, ທີ່ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຕ້ອນຮັບທ່ານເອກອັກຄະລັດຖະທູດ ອົດສະຕາລີ ຄົນໃໝ່ Craig Chittick ທີ່ມາຮັບໜ້າທີ່ການທູດຢູ່ ຫວຽດນາມ. ທີ່ການຕ້ອນຮັບ, ທ່ານນາຍົກລັດຖະມົນຕີ ຫງວຽນຊວນຟຸກ ໃຫ້ຮູ້ວ່າ: ຫວຽດນາມ ແລະ ອົດສະຕາລີ ພວມຮ່ວມມືຢ່າງຕັ້ງໜ້າໃນຫຼາຍຂົງເຂດຄື: ເສດຖະກິດ, ການຄ້າ ແລະ 2 ປະເທດມີທັດສະນະລວມໃນຫຼາຍບັນຫາໃນພາກພື້ນ ແລະ ສາກົນ. ອົດສະຕາລີ ເປັນຄູ່ຮ່ວມມືທີ່ໄວ້ເນື້ອເຊື່ອໃຈຂອງ ຫວຽດນາມ ແລະ ຫວຽດນາມ ປາດຖະໜາຢາກຮ່ວມມືກັບ ອົດສະຕາລີ ໃນຫຼາຍຂົງເຂດທີ່ ອົດສະຕາລີ ມີທ່າແຮງຄື: ວິທະຍາສາດເຕັກໂນໂລຢີ, ຂຸດຄົ້ນແຮ່ທາດ, ພ້ອມທັງຫວັງວ່າ ການພົວພັນ 2 ປະເທດພັດທະນາຢ່າງຮອບດ້ານໃນທຸກຂົງເຂດຄື: ເສດຖະກິດ, ວັດທະນະທຳ, ການສຶກສາ - ບຳລຸງສ້າງ, ການທ່ອງທ່ຽວ… ທ່ານນາຍົກລັດຖະມົນຕີ ໄດ້ຊົມເຊີຍບັນດາຂໍ້ສະເໜີຂອງທ່ານເອກອັກຄະລັດຖະທູດ ສຳລັບໂຄງການຮ່ວມມືກ່ຽວກັບການຫລຸດຜ່ອນຄວາມທຸກຍາກ ແລະ ຄວາມສະເໝີພາບລະຫວ່າງຍິງ - ຊາຍຢູ່ ຫວຽດນາມ ແລະ ໃຫ້ຮູ້ວ່າຈະຊີ້ນຳບັນດາກະຊວງ, ຂະແໜງການຜັນຂະຫຍາຍການຮ່ວມມືກັບ ອົດສະຕາລີໃນຂົງເຂດນີ້ໂດຍໄວ.
ສ່ວນທ່ານ ເອກອັກຄະລັດຖະທູດ ອົດສະຕາລີ Craig Chittick ກໍ່ຖືວ່າ ການພົວພັນຮ່ວມມື 2 ປະເທດພວມຢູ່ໃນໄລຍະພັດທະນາອັນດີງາມໃນຫຼາຍຂົງເຂດ, ພ້ອມທັງລາຍງານທ່ານນາຍົກລັດຖະມົນຕີຮັບຊາບ ກ່ຽວກັບເລື່ອງລັດຖະບານ ອົດສະຕາລີ ໃຫ້ຄຳໝັ້ນສັນຍາສະໜັບສະໜູນສັນຍາຄູ່ຮ່ວມມືຂ້າມ ປາຊີຟິກ (TPP) ແລະ ສືບຕໍ່ວິວັດການໃຫ້ສັດຕະຍາບັນ TPP. ອົດສະຕາລີ ກໍ່ສະໜັບສະໜູນ ຫວຽດນາມ ອອກສະໝັກຮັບເລືອກຕັ້ງໃນຕຳແໜ່ງຜູ້ອຳນວຍການໃຫຍ່ອົງການສຶກສາ, ວິທະຍາສາດ ແລະ ວັດທະນະທຳຂອງ ສປຊ (UNESCO).