ທ່ານນາຍົກລັດຖະມົນຕີ ຫງວຽນເຕີ໋ນຢຸງ ເຂົ້າຢ້ຽມຂ່ຳນັບ
ທ່ານເລຂາທິການໃຫຍ່ ລາວ ຈູມມາລີ ໄຊຍະສອນ
(ພາບ: VGP/Nhatbac)
(vovworld) – ໂດຍສືບຕໍການຢ້ຽມຢາມ ແລະ ເຮັດວຽກຢູ່ ລາວ, ຕອນເຊົ້າວັນທີ 14/9 ຢູ່ນະຄອນຫລວງ ວຽງຈັນ, ປະເທດ ລາວ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ມີການພົບປະເຈລະຈາກັບທ່ານນາຍົກລັດຖະມົນຕີ ລາວ ທອງສິງ ທຳມະວົງ. ທ່ານນາຍົກລັດຖະມົນຕີ ຫງວຽນເຕີ໋ນຢຸງ ແລະ ທ່ານນາຍົກລັດຖະມົນຕີ ທອງສິງ ທຳມະວົງ ຢືນຢັນວ່າ: 2 ພັກ, 2 ລັດຖະບານຈະສືບຕໍ່ສະຫງວນບຸລິມະສິດອັນສູງສຸດໃຫ້ການປັບປຸງ ແລະ ພັດທະນາສາຍພົວພັນສາມັກຄີແບບພິເສດ ຫວຽດນາມ - ລາວ ຢ່າງບໍ່ຢຸດຢັ້ງ. ນາຍົກລັດຖະມົນຕີທັງ 2 ທ່ານ ເຫັນດີເປັນເອກະສັນສືບຕໍ່ສົມທົບກັນຈັດຕັ້ງການເຄື່ອນໄຫວສະເຫຼີມສະຫຼອງບັນດາເຫດການສຳຄັນຍິ່ງຂອງ 2 ປະເທດນັບແຕ່ປະຈຸບັນເຖິງທ້າຍປີໃຫ້ດີ.
ແລກປ່່ຽນກ່ຽວກັບບາງບັນຫາສາກົນ ແລະ ພາກພື້ນດີເດັ່ນ ຊຶ່ງ 2 ຝ່າຍກໍມີຄວາມສົນໃຈ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ແລະ ທ່ານນາຍົກລັດຖະມົນຕີ ທອງສິງ ທຳມະວົງ ເຫັນດີເປັນເອກະພາບສືບຕໍ່ເສີມຂະຫຍາຍການພົວພັນຮ່ວມມືອັນດີງາມລະຫວ່າງ 2 ປະເທດຢູ່ບັນດາເວທີປາໄສໃນພາກພື້ນ ແລະ ສາກົນ, ພິເສດແມ່ນໃນຂອບເຂດການຮ່ວມມື ອາຊຽນ ເພື່ອຮັກສາຫຼັກໝັ້ນ, ສຽງເວົ້າລວມຂອງ ອາຊຽນ ໃນບັນດາບັນຫາຍຸດທະສາດສຳຄັນຂອງພາກພື້ນ, ໃນນັ້ນມີບັນຫາທະເລຕາເວັນອອກ. ທ່ານນາຍົກລັດຖະມົນຕີ ຫງວຽນເຕີ໋ນຢຸງ ຢືນຢັນວ່າ: ຫວຽດນາມ ຈະສົມທົບຢ່າງແໜ້ນແຟ້ນ ແລະ ໜູນຊ່ວຍໃນລະດັບສູງສຸດ ຕາມຄວາມສາມາດຂອງຕົນ ເພື່ອໃຫ້ ລາວ ຮັບປະກັນບົດບາດເປັນປະທານ ອາຊຽນ ໃນປີ 2016 ຢ່າງມີໄຊ. ພາຍຫລັງການພົບປະເຈລະຈາ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ພ້ອມກັບ ທ່ານນາຍົກລັດຖະມົນຕີ ທອງສິງ ທຳມະວົງ ເປັນສັກຂີພິຍານພິທີເຊັນບົດບັນທຶກຊ່ວຍຈຳລະຫວ່າງ ລັດຖະບານ ຫວຽດນາມ ແລະ ລາວ ກ່ຽວກັບຍຸດທະສາດການຮ່ວມມືໃນຂົງເຂດຄົມມະນາຄົມ - ຂົນສົ່ງໄລຍະ 2016 – 2025 ວິໄສທັດເຖິງປີ 2030.
ແລະໃນຕອນເຊົ້າວັນທີ 14/9, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ເຂົ້າຢ້ຽມຂ່ຳນັບທ່ານເລຂາທິການໃຫຍ່, ປະທານປະເທດ ລາວ ຈູມມາລີ ໄຊຍະສອນ, ພົບປະເຈລະຈາກັບປະທານສະພາແຫ່ງຊາດ ລາວ ທ່ານນາງ ປານີ ຢາທໍ່ຕູ້. ການນຳ 2 ປະເທດຢືນຢັນວ່າ: 2 ພັກ, ລັດຖະບານ, ສະພາແຫ່ງຊາດ ແລະ ປະຊາຊົນ 2 ປະເທດ ຍາມໃດກໍຖືເປັນສຳຄັນທີ່ສຸດ ແລະ ສະຫງວນບຸລິມະສິດສູງສຸດໃນການປັບປຸງ ແລະ ເພີ່ມທະວີການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ 2 ປະເທດ ຫວຽດນາມ - ລາວ, ລາວ - ຫວຽດນາມ. 2 ຝ່າຍເຫັນດີສ້າງເງື່ອນໄຂສະດວກໃຫ້ການຮ່ວມມືລົງທຶນ ແລະ ການຄ້າລະຫວ່າງ 2 ປະເທດກ່ວາອີກ; ພິຈາລະນາສ້າງເງື່ອນໄຂສະດວກຫລາຍກ່ວາອີກ ໃຫ້ຊາວ ຫວຽດນາມ ອາໄສຢູ່ ລາວ ແລະ ແຮງງານ ຫວຽດນາມ ທຳງານ, ດຳລົງຊີວິດ ແລະ ດຳເນີນທຸລະກິດຢູ່ ລາວ. ທ່ານນາຍົກລັດຖະມົນຕີ ຫງວຍນເຕີ໋ນຢຸງ ຢືນຢັນວ່າ: ຫວຽດນາມ ຈະເຮັດຈົນສຸດຄວາມສາມາດຂອງຕົນ ເພື່ອປະກອບສ່ວນໜູນຊ່ວຍ ລາວ ຮັບປະກັນບົດບາດເປັນປະທານ ອາຊຽນ ໃນປີ 2016 ໃຫ້ສຳເລັດຜົນ.
ໃນການຢ້ຽມຢາມ ລາວ ຄັ້ງນີ້, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ກໍໄປຢ້ຽມຢາມອະດີດການນຳຂັ້ນສູງບາງທ່ານຂອງ ລາວ.
ເນື່ອງໃນໂອກາດຢ້ຽມຢາມ ແລະ ເຮັດວຽກຢູ່ ລາວ, ທີ່ນະຄອນຫລວງ ວຽງຈັນ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ກໍ່ໄດ້ພົບປະກັບປະຊາຄົມບັນດານັກລົງທຶນ ຫວຽດນາມ ເຄື່ອນໄຫວຢູ່ ລາວ, ທ່ານນາຍົກລັດຖະມົນຕີ ຫງວຽນເຕີ່ນຢຸງ ໄດ້ຕີລາຄາສູງເລື່ອງບັນດາວິສາຫະກິດ ຫວຽດນາມ ທີ່ພວມລົງທຶນ, ທຳມາຄ້າຂາຍຢູ່ ລາວ ໄດ້ສູ້ຊົນມານະພະຍາຍາມຢ່າງບໍ່ຢຸດຢັ້ງ, ແກ້ໄຂບັນດາຄວາມຫຍຸ້ງຍາກ, ຊຸກຍູ້ບັນດາການເຄື່ອນໄຫວຮ່ວມມືລົງທຶນຢູ່ ລາວ ແລະ ບັນລຸໄດ້ໝາກຜົນເບື້ອງຕົ້ນທີ່ມີຄວາມໝາຍສຳຄັນທີ່ສຸດ, ນຳ ຫວຽດນາມ ກາຍເປັນປະເທດຢືນອັນດັບທີ 2 ໃນບັນດາປະເທດທີ່ລົງທຶນຢູ່ ລາວ.
ຕອນບ່າຍວັນດຽວກັນ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ແລະ ຄະນະຜູ້ແທນ ຫວຽດນາມ ໄດ້ເດີນທາງອອກຈາກນະຄອນຫລວງ ວຽງຈັນ, ສິ້ນສຸດການຢ້ຽມຢາມ ແລະ ເຮັດວຽກຢູ່ ລາວ ຢ່າງດີງາມ.