ທ່ານປະທານສະພາແຫ່ງຊາດ ຫງວຽນຊິງຮຸ່ງ ແລະ ທ່ານນາງປະທານສະພາຕຳ່ອົດສະຕາລີ Anna Burke
(ພາບ:nguyentandung.org)
(vovworld) – ຕອນບ່າຍວັນທີ 22/5, ຢູ່ຮ່າໂນ້ຍ, ໄດ້ດຳເນີນພິທີຕ້ອນຮັບທ່ານນາງປະທານສະພາຕຳ່ອົດສະຕາລີ Anna Burke ມາຢ້ຽມຢາມຫວຽດນາມຢ່າງເປັນທາງການ ໃນລະຫວ່າງວັນທີ 22-24/5, ຕາມຄຳເຊື້ອເຊີນຂອງທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ. ພາຍຫຼັງພິທີຕ້ອນຮັບ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ແລະ ທ່ານນາງປະທານສະພາຕຳ່ອົດສະຕາລີ Anna Burke ໄດ້ດຳເນີນການເຈລະຈາ. ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງຕີລາຄາສູງການແລກປ່ຽນລະຫວ່າງບັນດາສະມາຊິກສະພາແຫ່ງຊາດ (ສສ) ສອງປະເທດ, ພິເສດແມ່ນລະຫວ່າງສອງກຸ່ມ ສສ ມິດຕະພາບ ແລະ ການນຳຂອງສະພາແຫ່ງຊາດສອງປະເທດ. ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງຫວັງວ່າ ສອງຝ່າຍຈະສືບຕໍ່ຮ່ວມມື ແລະ ສະໜັບສະໜູນກັນບົນເວທີພາກພື້ນ ແລະ ສາກົນ.
ສ່ວນທ່ານນາງປະທານສະພາຕຳ່ອົດສະຕາລີ Anna Burke ກໍ່ຢືນຢັນວ່າ, ທ່ານນາງເອງ ກໍ່ຄືສະພາແຫ່ງຊາດອົດສະຕາລີ ຈະມານະພະຍາຍາມຊຸກຍູ້ການພົວພັນຮ່ວມມືສອງຝ່າຍ, ພິເສດແມ່ນການຮ່ວມມືລະຫວ່າງສະພາແຫ່ງຊາດ, ລັດຖະບານສອງປະເທດ. ທ່ານນາງຖືວ່າ ການຮ່ວມມືປ້ອງກັນຊາດ, ປ້ອງກັນຄວາມສະຫງົບ ແລະ ສ້າງສັນຕິພາບໃນພາກພື້ນມີຄວາມສຳຄັນທີ່ສຸດ, ເພາະວ່າ ອົດສະຕາລີຢາກຮັກສາ ແລະ ຍົກສູງການພົວພັນຮ່ວມມືຢ່າງແໜ້ນແຟ້ນກັບຫວຽດນາມໃນຂົງເຂດນີ້.