(vovworld) - ຕອນບ່າຍວັນທີ 24/9, ຢູ່ຮ່າໂນ້ຍ, ທີ່ການຕ້ອນຮັບທ່ານ Shii Kazuo, ປະທານຄະນະກຳມາທິການສູນກາງພັກກອມມູນິດຍີ່ປຸ່ນ, ພວມຢູ່ຢ້ຽມຢາມຫວຽດນາມ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໄດ້ຕີລາຄາສູງການພັດທະນາຢ່າງຕັ້ງໜ້າໃນການພົວພັນລະຫວ່າງຫວຽດນາມ-ຍີປຸ່ນ ກໍຄືການພົວພັນລະຫວ່າງ 2 ພັກກອມມູນິດ, ທ່ານຢືນຢັນບັນດາໝາກຜົນທີ່ດີງາມໃນການພົວພັນລະຫວ່າງ 2 ປະເທດ ຊຶ່ງບັນລຸໄດ້ໃນໄລຍະທີ່ຜ່ານມາ ແມ່ນການສືບທອດມູນເຊື້ອທີ່ມີມາແຕ່ດົນນານທີ່ 2 ຝ່າຍຄວນສືບຕໍ່ຮັກສາ ແລະ ເສີມຂະຫຍາຍ. ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ຢືນຢັນວ່າ ສະພາແຫ່ງຊາດຫວຽດນາມ ຍາມໃດກໍເພີ່ມທະວີ, ເປີດກ້ວາງການພົວພັນຮ່ວມມືໃນພາກພື້ນ ແລະ ສາກົນ, ໃນນັ້ນມີການພົວພັນກັບຍີ່ປຸ່ນ. ສ່ວນທ່ານ Shii Kazuo, ປະທານຄະນະກຳມາທິການສູນກາງພັກກອມມູນິດຍີ່ປຸ່ນ ຢືນຢັນວ່າ 2 ພັກຈະສືບຕໍ່ແລກປ່ຽນທິດສະດີ, ເພີ່ມທະວີການຮ່ວມມື ແລະ ສະໜັບສະໜູນຊຶ່ງກັນ ແລະ ກັນ ແລະ ສະແດງຄວາມເຊື່ອໝັ້ນວ່າ ຫຼັງການຢ້ຽມຢາມຄັ້ງນີ້ , ການພົວພັນລະຫວ່າງ 2 ພັກ ແລະ ປະຊາຊົນ 2 ປະເທດຈະນັບມື້ນັບພັດທະນາຢ່າງດີງາມ.
ກ່ອນໜ້ານັ້ນ, ຕອນບ່າຍວັນທີ 23 ກັນຍາ, ຢູ່ຮ່າໂນ້ຍ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ໄດ້ໃຫ້ການຕ້ອນຮັບ ແລະ ແລກປ່ຽນຄຳເຫັນຢ່າງສະໜິດສະໜົມກັບຄະນະຜູ້ແທນພັກກອມມູນິດຍີ່ປຸ່ນ ນຳໜ້າໂດຍທ່ານ Shii Kazuo, ປະທານຄະນະກຳມາທິການສູນກາງພັກກອມມູນິດຍີ່ປຸ່ນ, ພວມຢູ່ຢ້ຽມຢາມຫວຽດນາມ. ທ່ານເລຂາທິການໃຫຍ່ ຫງວຽນຟຸຈ້ອງ ຕີລາຄາສູງບັນດາການເຄື່ອນໄຫວພົບປະແລກປ່ຽນລະຫວ່າງ 2 ພັກໃນປະຈຸບັນ, ພິເສດແມ່ນບັນດາການແລກປຽນ ແລະ ກອງປະຊຸມສຳມະນາກ່ຽວກັບທິດສະດີ; ຖືວ່ານີ້ແມ່ນຮູບແບບການຮ່ວມມືຢ່າງແທດຈິງ ແລະ ມີປະສິດທິຜົນໃນສະພາບການໃໝ່, ປະກອບສ່ວນເຮັດແຈ້ງຫຼາຍບັນຫາ ທິດສະດີກ່ຽວກັບລັດທິສັງຄົມນິຍົມ ແລະ ເສັ້ນທາງກ້າວຂຶ້ນສູ່ລັດທິສັງຄົມນິຍົມ. ທ່ານເລຂາທິການໃຫຍ່ຫງວຽນຟຸຈ້ອງ ແລະ ທ່ານປະທານ Shii Kazuo ເຫັນດີນຳກັນໂດຍຖືວ່າ 2 ພັກຄວນສືບຕໍ່ເພີ່ມທະວີການຮ່ວມມືຫຼາຍດ້ານ ດ້ວຍຫຼາຍຮູບແບບທີ່ເໝາະສົມ, ແນໃສ່ປະກອບສ່ວນເຂົ້າໃນການກໍ່ສ້າງພັກ ໃຫ້ໝັ້ນຄົງ, ເຂັ້ມແຂງ, ນຳການພົວພັນຮ່ວມມືລະຫວ່າງ 2 ພັກໃຫ້ຂຶ້ນສູ່ລະດັບສູງໃໝ່, ເພື່ອຜົນປະໂຫຍດຂອງປະຊາຊົນ 2 ປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ໃນພາກພື້ນ ແລະ ຢູ່ໃນໂລກ.