(vovworld) – ເນື່ອງໃນໂອກາດສະເຫຼີມສະຫຼອງ 47 ປີແຫ່ງວັນສ້າງຕັ້ງອາຊຽນ ແລະ 40 ປີແຫ່ງວັນສ້າງຕັ້ງການພົວພັນຄູ່ຮ່ວມມື, ຄູ່ເຈລະຈາລະຫວ່າງອາຊຽນ ແລະ ອົດສຕາລີ, ຕອນເຊົ້າວັນທີ 06/08, ກົງສູນໃຫຍ່ສະຖານທູດຫວຽດນາມ ປະຈຳ Perth ພ້ອມກັບອົງການຕາງໜ້າບັນດາປະເທດອາຊຽນ ຢູ່ລັດອົດສຕາລີ ຕາເວັນຕົກ ໄດ້ສົມທົບກັບນະຄອນ Perth ຈັດຕັ້ງພິທີຊັກທຸງອາຊຽນ ຢູ່ສຳນັກງານອົງການບໍລິຫານນະຄອນ.
ກ່າວຄຳເຫັນທີ່ພິທີ, ຜູ້ຕາງໜ້າກະຊວງການຕ່າງປະເທດອົດສຕາລີ, ທ່ານ Michael Wood ເນັ້ນໜັກວ່າ ການພົວພັນອັນດີງາມລະຫວ່າງອົດສຕາລີ ແລະ ອາຊຽນໃນໄລຍະຜ່ານມາ, ດ້ວຍຫຼາຍຈຸດທີ່ຄ້າຍຄືກັນລະຫວ່າງອາຊຽນ ແລະ ອົດສຕາລີ ໃນບັນດາບັນຫາພາກພື້ນ ແລະ ທົ່ວໂລກ. ຕາມທ່ານແລ້ວ, 2 ຝ່າຍພວມມີສຽງເວົ້າລວມ ໃນບັນດາສິ່ງທ້າທ້າຍທີ່ພວມວາງອອກໃຫ້ແກ່ພາກພື້ນ. ທ່ານເອກອັກຄະລັດຖະທູດຫວຽດນາມ ປະຈຳອົດສຕາລີ ເລືອງແທງຫງີ້ ຕາງໜ້າໃຫ້ຄະນະກຳມະການອາຊຽນ ຢູ່ Canverra ຕີລາຄາສູງບັນດາການພັດທະນາຢ່າງກະໂດດຂັ້ນໃນການພົວພັນລະຫວ່າງອາຊຽນ - ອົດສຕາລີ ໃນໄລຍະ 40 ປີຜ່ານມາ ໃນບັນດາຂົງເຂດເສດຖະກິດ, ການເມືອງ, ວັດທະນະທຳສັງຄົມ, ພິເສດແມ່ນນັບຕັ້ງແຕ່ 2 ປະເທດສ້າງຕັ້ງການພົວພັນຄູ່ຮ່ວມມືຮອບດ້ານໃນປີ 2007 ແລະ ລົງນາມສັນຍາສ້າງຕັ້ງເຂດການຄ້າເສລີອາຊຽນ - ອົດສຕາລີ - ນິວຊີແລນ ປີ 2009. ທ່ານເອກອັກຄະລັດຖະທູດ ເລືອງແທງຫງີ້ ສະແດງຄວາມປາດຖະໜາວ່າ ລັດອົດສຕາລີ ຕາເວັນຕົກ ຈະມີບັນດາການເຄື່ອນໄຫວແທດຈິງ ເພື່ອແນໃສ່ເພີ່ມທະວີການພົວພັນກັບບັນດາປະເທດອາຊຽນ ໃນໄລຍະຈະມາເຖິງກວ່າອີກ, ພິເສດເມື່ອປະຊາຄົມອາຊຽນ ໄດ້ຮັບການສ້າງຕັ້ງ.