(vovworld) – ວັນທີ 14/5, ຢູ່ຮ່າໂນ້ຍ, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ, ໂຄງການໜູນຊ່ວຍສາກົນ (ISG) ໄດ້ຈັດຕັ້ງເວທີປາໄສອຸປະຖຳໃຫ້ແກ່ການກໍ່ສ້າງຊົນນະບົດໃໝ່ຢູ່ ຫວຽດນາມ. ກ່າວຄຳເຫັນທີ່ເວທີປາໄສ, ທ່ານລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫວຽດນາມ ກາວດຶກຟາດ ໃຫ້ຮູ້ວ່າ, ໄລຍະຜ່ານມາ, ຫຼາຍທ້ອງຖິ່ນໄດ້ລະດົມກຳລັງພາຍໃນຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ ແລະ ບັນລຸໄດ້ໝາກຜົນທີ່ດີ. ເຖິງແນວນັ້ນກໍ່ຕາມ, ການຮຳ່ຮຽນເອົາບົດຮຽນສາກົນໃນການພັດທະນາຊົນນະບົດແມ່ນສຳຄັນທີ່ສຸດ. ປະຈຸບັນ, ຫວຽດນາມສ້າງກາລະໂອກາດການໂອ້ລົມສົນທະນາລະຫວ່າງບັນດາຄູ່ຮ່ວມມືເຂົ້າຮ່ວມກໍ່ສ້າງ, ໜູນຊ່ວຍພັດທະນາ, ແບ່ງປັນບັນດາຄວາມຫຍຸ້ງຍາກ, ການທ້າທາຍກໍ່ຄືສ້າງກຳລັງໜູນໃໝ່ໃຫ້ແກ່ການກໍ່ສ້າງຊົນນະບົດໃໝ່.
ທີ່ເວທີປາໄສ, ຕາງໜ້າໃຫ້ບັນດານັກອຸປະຖຳ 2 ຝ່າຍ, ທ່ານ Jean – Marc Gravellini, ຜູ້ອຳນວຍການອົງການພັດທະນາ ຝຣັ່ງ (AFD) ປະຈຳ ຮ່າໂນ້ຍ, ໃຫ້ຮູ້ວ່າ ໃນໄລຍະ 2013 – 2015, AFD ໜູນຊ່ວຍ ຫວຽດນາມ ຫັນຂະແໜງຜະລິດທີ່ສົ່ງຜົນສະທ້ອນເຖິງສິ່ງແວດລ້ອມ, ສັງຄົມ ເປັນທັນສະໄໝ, ຍົກສູງຄຸນນະພາບ, ສະມັດຕະພາບ ແລະ ສົມທົບບັນດາຂະແໜງອຸດສາຫະກຳ, ຊຸກຍູ້ການສອນວິຊາຊີບທີ່ມີຄຸນນະພາບສູງ. ທ່ານ Henning Pedersen, ຫົວໜ້າຜູ້ຕາງໜ້າກອງທຶນພັດທະນາກະສິກຳສາກົນ (IFAD) ປະຈຳ ຫວຽດນາມ, ສະເໜີໃຫ້ລັດຖະບານຫວຽດນາມ ຄວນເພີ່ມທະວີການສຳພັດຕາມທິດຕະຫຼາດຢູ່ທ້ອງຖິ່ນ, ສົ່ງເສີມການປ່ຽນໃໝ່ໃນການວາງແຜນໂດຍມີການເຂົ້າຮ່ວມຂອງພາກເອກະຊົນ ແລະ ນຳໃຊ້ບັນດາມູນຄ່າ, ເລື່ອງປັບປຸງບັນດາບໍລິການການເງິນ ແລະ ພັດທະນາການດຳເນີນທຸລະກິດໃນເຂດຊົນນະບົດ.