ທ່ານ Ksor Phuoc ປະທານສະພາຊົນເຜົ່າ
(ພາບ:baoquangninh.com.vn)
(TTX)- ຕອນເຊົ້າວັນທີ 24/9, ຢູ່ຮ່າໂນ້ຍ, ສະພາຊົນເຜົ່າຂອງສະພາແຫ່ງຊາດໄດ້ ໄຂວາລະປະຊຸມຄົບຄະນະຄັ້ງທີ 4 ດ້ວຍຫຼາຍເນື້ອໃນສຳຄັນ, ກະກຽມໃຫ້ກອງປະຊຸມສະໄໝສາມັນເທື່ອທີ 4 ສະພາແຫ່ງຊາດຫວຽດນາມຊຸດທີ 13. ທ່ານ Ksor Phuoc ກຳມະການຄະນະປະຈຳສະພາແຫ່ງຊາດ, ປະທານສະພາຊົນເຜົ່າໃຫ້ຮູ້ວ່າ: ແຕ່ວັນທີ 24-28/9, ສະພາຈະສົມທົບກວດກາ ແລະ ປະກອບຄຳເຫັນໃສ່ຮ່າງກົດໝາຍ 12 ສະບັບ ແລະ ຕີລາຄາໝາກຜົນແຫ່ງການເຄື່ອນໄຫວແຕ່ສະໄໝປະຊຸມເທື່ອທີ 3 ຫາສະໄໝປະຊຸມເທື່ອທີ 4 ແລະ ຄາດຄະເນລາຍການເຄື່ອນໄຫວແຕ່ສະໄໝປະຊຸມເທື່ອທີ 4 ຫາສະໄໝປະຊຸມເທື່ອທີ 5, ສະພາແຫ່ງຊາດຊຸດທີ 13 ຂອງສະພາ.
ໃນການປຶກສາຫາລືຮ່າງກົດໝາຍວ່າດ້ວຍການສະສົມແຫ່ງຊາດ, ຄຳເຫັນຂອງຫຼາຍທ່ານໃນສະພາຊົນເຜົ່າໄດ້ສະເໜີວ່າແຫຼ່ງສະສົມແຫ່ງຊາດພຽງແຕ່ສຸມໃສ່ໃຫ້ຈຸດໝາຍປ້ອງກັນ, ຕ້ານ ແລະ ແກ້ໄຂບັນດາຜົນຮ້າຍຈາກໄພທຳມະຊາດ, ອັກຄິໄຟ, ໂລກລະບາດ; ຮັບມືກັບບັນດາບັນຫາປ້ອງກັນຊາດປ້ອງກັນຄວາມສະຫງົບ, ກໍລະນີຮີບດ່ວນ, ໜັກໜ່ວງພິເສດ. ບັນດາຄຳເຫັນກໍ່ເຫັນດີເຫັນພ້ອມໃນການດັດປັບຂໍ້ກຳນົດບັນຊີລາຍຊື່ສິນຄ້າສະສົມແຫ່ງຊາດຕາມທິດ: ຮັດແຄບຂອບເຂດສິນຄ້າ, ມອບໃຫ້ລັດຖະບານກຳນົດລະອຽດກ່ຽວກັບສິນຄ້າຮັບໃຊ້ໃຫ້ແກ່ການປ້ອງກັນຊາດປ້ອງກັນຄວາມສະຫງົບ.