(vovworld) - ສະຖານທູດຫວຽດນາມ ປະຈຳກຳປູເຈຍ ຫາກໍ່ດຳເນີນບັນດາມາດຕະການປົກປ້ອງສຳລັບພົນລະເມືອງຫວຽດນາມ ຢ່າງທັນການ ພາຍຫຼັງທີ່ເຈົ້າໜ້າທີ່ກຳປູເຈຍ ກວດຄົ້ນເຮືອນເຊົ່າບາງຫຼັງຢູ່ຕາແສງ Niroth, ເມືອງ Chbar Ampov, ນະຄອນ ພະນົມເປັນ ແລະ ຈັບຕົວຊາວຫວຽດນາມ 84 ຄົນ ສົ່ງໄປສູນຄຸມຂັງຊາວຕ່າງປະເທດຂອງກົມໃຫຍ່ອົບພະຍົບ ແລະ ຢູ່ອາໄສກຳປູເຈຍ ດ້ວຍສາຍເຫດແມ່ນອາໄສຢ່າງຜິດກົດໝາຍໃນວັນທີ 01/07 ຜ່ານມາ. ພາຍຫຼັງເກີດເຫດການ, ກະຊວງການຕ່າງປະເທດຫວຽດນາມ ໄດ້ຊີ້ນຳໃຫ້ສະຖານທູດຫວຽດນາມ ປະຈຳກຳປູເຈຍ ຮີບເຮັ່ງເຮັດວຽກກັບບັນດາອົງການມີໜ້າທີ່ຮັບຜິດຊອບຂອງກຳປູເຈຍ ເພື່ອຊອກຮູ້ຂໍ້ມູນ ແລະ ມີບັນດາມາດຕະການປົກປ້ອງໂດຍຈຳເປັນສຳລັບພົນລະເມືອງຫວຽດນາມ. ສະຖານທູດຫວຽດນາມ ປະຈຳກຳປູເຈຍ ໃຫ້ຮູ້ວ່າ, ພົນລະເມືອງທີ່ຖືກຈັບຕົວສ່ວນຫຼາຍແມ່ນຊາວກຳປູເຈຍ ເຊື້ອຊາດຫວຽດນາມ ໄດ້ຢູ່ອາໄສຢ່າງຖືກຕ້ອງຕາມກົດໝາຍກຳປູເຈຍ. ຕອນບ່າຍວັນດຽວກັນ, ກຳປູເຈຍ ໄດ້ປ່ອຍຕົວ 74 ຄົນ ແລະ ຕອນບ່າຍວັນທີ 03/07 ໄດ້ປ່ອຍຕົວຈຳນວນຄົນທີ່ຍັງເຫຼືອ.
ກ່ຽວຂ້ອງເຖິງການເຄື່ອນໄຫວປົກປ້ອງພົນລະເມືອງ, ຫວ່າງແລ້ວນີ້, ສະຖານທູດຫວຽດນາມ ປະຈຳສະຫະລັດອາຣັບເອັມມີເລັດ (UAE) ໄດ້ຮັບຂໍ້ມູນຈາກຄະນະຕິດຕໍ່ຊາວຫວຽດນາມ ປະຈຳ UAE ໃຫ້ຮູ້ວ່າ, ມີກຸ່ມອາດຊະຍາກຳໄດ້ຫຼອກລວງຈັບຕົວ, ກັກຂັງ, ທຸບຕີພົນລະເມືອງຫວຽດນາມ ຢ່າງຜິດກົດໝາຍ. ພາຍຫຼັງເກີດເຫດການ, ສະຖານທູດຫວຽດນາມ ປະຈຳ UAE ໄດ້ຊອກຫາວິທີຕິດຕໍ່, ເຮັດແຈ້ງຂໍ້ມູນ, ກຳນົດສະຖານທີ່ຢ່າງທັນທີ, ພ້ອມທັງຈັດສົ່ງພະນັກງານສົມທົບກັບບັນດາອົງການມີໜ້າທີ່ຮັບຜິດຊອບຂອງປະເທດປະຈຳຖິ່ນ ເພື່ອແນໃສ່ກອບກູ້ພົນລະເມືອງດັ່ງກ່າວ.