(vovworld) – ໂດຍສືບຕໍ່ກອງປະຊຸມສະໄໝສາມັນເທື່ອທີ 8, ສະພາແຫ່ງຊາດຊຸດທີ 13, ຕອນເຊົ້າວັນທີ 5/11, ສະພາແຫ່ງຊາດໄດ້ດຳເນີນວາລະປະຊຸມຄົບຄະນະຢູ່ຫໍປະຊຸມ ຮັບຟັງທ່ານກຳມະການຄະນະປະຈຳສະພາແຫ່ງຊາດ, ຫົວໜ້າຫ້ອງການສະພາແຫ່ງຊາດ ຫງວຽນແຮ້ງຟຸກ, ສະເໜີບົດລາຍງານກ່ຽວກັບຮ່າງກົດໝາຍວ່າດ້ວຍການເລືອກຕັ້ງ ສະມາຊິກສະພາແຫ່ງຊາດ (ສສຊ) ແລະ ຜູ້ແທນສະພາ ປຊຊ. ທ່ານຫົວໜ້າກຳມາທິການກົດໝາຍຂອງ ສະພາແຫ່ງຊາດ ຟານຈູງຫຼີ ສະເໜີບົດລາຍງານກວດກາຮ່າງກົດໝາຍສະບັບນີ້. ທ່ານນາງຮອງປະທານສະພາແຫ່ງຊາດ ຕ່ອງທິຟ໋ອງ ເປັນປະທານກອງປະຊຸມ.
ບົດສະເໜີກ່ຽວກັບຮ່າງກົດໝາຍວ່າດ້ວຍການເລືອກຕັ້ງ ສສຊ ແລະ ຜູ້ແທນສະພາ ປຊຊ, ໂດຍທ່ານກຳມະການຄະນະປະຈຳສະພາແຫ່ງຊາດ, ຫົວໜ້າຫ້ອງການສະພາແຫ່ງຊາດ ຫງວຽນແຮ້ງຟຸກ ສະເໜີຊີ້ແຈ້ງວ່າ: ກົດໝາຍວ່າດ້ວຍການເລືອກຕັ້ງແມ່ນກົດໝາຍສຳຄັນກຳນົດກ່ຽວກັບສິດເລືອກຕັ້ງ, ອອກສະໝັກເລືອກຕັ້ງ, ແມ່ນໜຶ່ງໃນບັນດາສິດການເມືອງພື້ນຖານຂອງພົນລະເມືອງທີ່ໄດ້ລະບຸໄວ້ໃນລັດຖະທຳມະນູນ. ດັ່ງນັ້ນ, ເລື່ອງສ້າງຮ່າງກົດໝາຍນີ້ຕ້ອງຮັບປະກັນການເສີມຂະຫຍາຍປະຊາທິປະໄຕ, ສ້າງກົນໄກການເລືອກຕັ້ງ ສສຊ, ຜູ້ແທນສະພາ ປຊຊ ທຸກຂັ້ນ ແລະ ຮັບປະກັນຄວາມເໝາະສົມກັບລັດຖະທຳມະນູນ ແລະ ລັກສະນະເປັນເອກະພາບຂອງລະບົບກົດໝາຍເພື່ອໃຫ້ພົນລະເມືອງປະຕິບັດສິດເລືອກຕັ້ງ, ສະໝັກຮັບເລືອກຕັ້ງຂອງຕົນ.
ກໍ່ໃນຕອນເຊົ້າວັນດຽວກັນ, ສະພາແຫ່ງຊາດໄດ້ຮັບຟັງທ່ານ ດ່າວຈ້ອງທີ, ຫົວໜ້າກຳມາທິການວັດທະນະທຳ, ການສຶກສາ, ຊາວໜຸ່ມ, ເຍົາວະຊົນ ແລະ ອະນຸຊົນຂອງສະພາແຫ່ງຊາດ ສະເໜີບົດລາຍງານອະພິປາຍ, ປະກອບຄຳເຫັນ, ປັບປຸງຮ່າງກົດໝາຍປັບປຸງ, ເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍການສອນວິຊາຊີບ ແລະ ປຶກສາຫາລືທີ່ຫໍປະຊຸມກ່ຽວກັບບາງເນື້ອໃນຍັງມີຄວາມເຫັນແຕກຕ່າງກັນຂອງຮ່າງກົດໝາຍສະບັບນີ້.