(ພາບ : http://na.gov.vn)
ຕອນເຊົ້າວັນທີ 23/11, ສະພາແຫ່ງຊາດເລີ່ມຕົ້ນວາລະຊັກຖາມ ຊຶ່ງແກ່ຍາວໃນເວລາ 2 ມື້ເຄິ່ງ ສຳລັບສະມາຊິກລັດຖະບານ. ລັດຖະມົນຕີ 5 ທ່ານຈະຕອບຄຳຊັກຖາມໂດຍກົງທີ່ສະໄຫມປະຊຸມຄັ້ງນີ້ ຊຶ່ງລວມມີ: ທ່ານ ດີນລາທັງ, ລັດຖະມົນຕີກະຊວງຄົມມະນາຄົມຂົນສົ່ງ, ທ່ານ ກາວດຶກຟາດ, ລັດຖະມົນຕີກະຊວງກະສິກຳ ແລະ ພັດທະນາຊົນນະບົດ, ທ່ານ ຟ້າມຫວູລ້ວນ, ລັດຖະມົນຕີກະຊວງສຶກສາ ແລະ ບຳລຸງສ້າງ, ທ່ານ ເວືອງດີນເວ້ວ ລັດຖະມົນຕີກະຊວງການເງິນ ແລະ ທ່ານ ຫງວຽນວັນບີ່ນ ຜູ້ວ່າການທະນາຄານແຫ່ງລັດ. ສສຊ ຈະຊັກຖາມບັນດາສະມາຊິກລັດຖະບານ ກ່ຽວກັບ ຫລາຍບັນຫາທີ່ພວມໄດ້ຮັບຄວາມສົນໃຈ.
ທ່ານລັດຖະມົນຕີກະຊວງຄົມມະນາຄົມຂົນສົ່ງເປັນຜູ້ທຳອິດຕອບຄຳຊັກຖາມ. ບັນຫາຕ່າງໆຊຶ່ງ ສສຊ ຍົກອອກສ່ວນຫລາຍແມ່ນກ່ຽວຂ້ອງເຖິງມາດຕະການຈຳກັດອຸປະຕິເຫດທາງຄົມມະນາຄົມ, ຫລຸດຜ່ອນສະພາບລົດຕິດຢູ່ບັນດານະຄອນໃຫຍ່ຄື: ຍູ້ແຮງຄວາມຄຶບຫນ້າ, ຍົກສູງຄຸນນະພາບ ແລະ ແກ້ໄຂສະພາບເພພັງຂອງບັນດາກິດຈະກຳ ຄົມມະນາຄົມໃນເງື່ອນໄຂຫລຸດຜ່ອນເງິນລົງທຶນຈາກງົບປະມານ. ຕາມທ່ານ ດີນລາທັງແລ້ວ, ເຖິງວ່າ ໄລຍະຜ່ານມາ ລັດຖະບານໄດ້ຍົກອອກຫລາຍມາດຕະການ, ມະຕິເພື່ອແກ້ໄຂສະພາບອຸປະຕິເຫດຄົມມະນາຄົມ, ຫລຸດຜ່ອນສະພາບລົດຕິດ ແຕ່ຍັງບໍ່ທັນບັນລຸໝາກຜົນ. ສາຍເຫດຕົ້ນຕໍຍ້ອນພື້ນຖານໂຄງລ່າງຂອງຫວຽດນາມ ຍັງບໍ່ທັນດີ ແລະ ຄົບຊຸດ.
“ພວກຂ້າພະເຈົ້າຖືວ່າ ບັນຫາຕົ້ນຕໍແມ່ນ ຕ້ອງມີການລົງທຶນຍົກລະດັບລະບົບພື້ນຖານໂຄງລ່າງຄົມມະນາຄົມຢ່າງຄົບຊຸດ. ສະນັ້ນ ພັກ, ລັດຖະບານຄວນຖືວ່າ ນີ້ແມ່ນບັນຫາຕິດຂັດຄວນໄດ້ຮັບການແກ້ໄຂ ແລະ ສຸມໃສ່ລົງທຶນພັດທະນາພື້ນຖານໂຄງລ່າງຄົມມະນາຄົມ, ແມ່ນຫນ້າທີ່ບຸກທະລຸໃນ 10 ປີຈະມາເຖິງ.“
ກ່ຽວກັບບັນດາມາດຕະການແກ້ໄຂສະພາບລົດຕິດ, ທ່ານ ດີນລາທັງຖືວ່າ: ຄວນມີບັນດາມາດຕະການໃນສະເພາະຫນ້າ ແລະ ຍາວນານ, ໃນນັ້ນວິທີການດັດປັບເວລາເຮັດວຽກທາງລັດຖະການ, ເວລາເຂົ້າໂຮງຮຽນກໍແມ່ນມາດຕະການຫນຶ່ງໃນໝວດມາດຕະການສັງລວມ ຊຶ່ງລັດຖະບານວາງອອກ ແລະ ຕ້ອງໄດ້ຮັບຄວາມເຫັນດີເຫັນພ້ອມຈາກ ປຊຊ.
ກ່ຽວກັບກິດຈະກຳຄົມມະນາຄົມມີຄຸນນະພາບຕຳ່ ແລະ ຖືກຮົ່ວໄຫລ. ທ່ານລັດຖະມົນຕີ ດີນລາທັງ ຍອມຮັບວ່າ: ນີ້ແມ່ນຄວາມຈິງ ຊຶ່ງຂະແຫນງຄົມມະນາຄົມຕ້ອງມີບັນດາມາດຕະການແກ້ໄຂຢ່າງຂ້ຽວຂາດກວ່າ.
“ໃນໄລຍະຈະມາເຖິງ ພວກຂ້າພະເຈົ້າຈະສຸມໃສ່ກະກຽມບັນດາໂຄງການມີຄຸນນະພາບ, ວ່ອງໄວກວ່າ. ທີສອງ ໃນວິວັດການຜັນຂະຫຍາຍຕ້ອງມີການຄັດເລືອກ ຢ່າງລະອຽດ
ຄະນະຄຸ້ມຄອງທີ່ມີຄຸນນະພາບ, ມີການທີ່ປຶກສາໃນການອອກແບບ, ທີ່ປຶກສາໃນການຕິດຕາມກວດກາເປັນຢ່າງດີ, ຄັດເລືອກນັກປະມຸນ, ຮັບປະກັນກຳລັງຄວາມສາມາດໃນການປະຕິບັດກໍຄືກຳລັງຄວາມສາມາດດ້ານການເງິນ.“
+ ວັນທີ 22/11, ອຳນາດການປົກຄອງການທະຫານ ແລະ ບັນດາກຳລັງການເມືອງ ອີຢີບ ສືບຕໍ່ວິວັດການໂອ້ລົມສົນທະນາແຫ່ງຊາດຢ່າງເປັນທາງການ ເພື່ອແນໃສ່ຢຸດຕິວິກິດການ ໃນສະພາວະການໃຊ້ຄວາມຮຸນແຮງທີ່ເກີດຂຶ້ນຢູ່ ນະຄອນຫລວງ Cairo ແລະ ຫລາຍແຂວງ, ນະຄອນໃນທົ່ວປະເທດໃນຊຸມມື້ຜ່ານມາ. ການປະຊຸມດຳເນີນໄປພາຍຫລັງມື້ຫນຶ່ງ ເມ່ືອລັດຖະບານ ອີຢີບ ຍື່ນໃບຮ້ອງຂໍລາອອກຈາກຕຳ່ແຫນ່ງ ຕໍ່ສະພາສູງສຸດບັນດາກຳລັງປະກອບອາວຸດ ອີຢີບ(CSFA). ປະຈຸບັນ CSFA, ຊຶ່ງແມ່ນກຳລັງກຳອຳນາດບໍລິຫານປະເທດຊາດ ບໍ່ທັນຮັບຮູ້ໃບຮ້ອງຂໍຂອງລັດຖະບານ. CSFA ຮຽກຮ້ອງທຸກກຳລັງການເມືອງພາຍໃນປະເທດ ຈົ່ງຈັດການໂອ້ລົມສົນທະນາເພື່ອຊອກຫາມາດຕະການແກ້ໄຂ. ພາຍຫລັງການໂອ້ລົມສົນທະນາດັ່ງກ່າວ, ຜູ້ອອກສະໝັກຮັບເລືອກຕັ້ງປະທານາທິບໍດີ ປະເທດນີ້, ທ່ານ Mohamed Selim al Awwa ໃຫ້ຮູ້ວ່າ: ບັນດາຝ່າຍໄດ້ລົງນາມໃນຂໍ້ຕົກລົງກ່ຽວກັບການສ້າງຕັ້ງລັດຖະບານກູ້ຊາດ./.