ຫວຽດນາມ ມີຄວາມຜູກພັນກັບງານບຸນສາມັກຄີ Manifiesta ຢູ່ ແບນຊິກ
(VOVWORLD) - ໃນລະຫວ່າງວັນທີ 21 – 22 ກັນຍາ, ງານບຸນສາມັກຄີີ (Manifiesta) ໂດຍພັກແຮງງານຂອງ ແບນຊິກ (PTB) ຈັດຕັ້ງຂຶ້ນຢູ່ແຄມທະເລ Bredence, ທາງພາກເໜືອ ແບນຊິກ, ດ້ວຍການເຂົ້າຮ່ວມຂອງຜູ້ຕາງໜ້າພັກກອມມູນິດ ແລະ ພັກຝ່າຍຊ້າຍທີ່ມາຈາກຫຼາຍປະເທດໃນໂລກ.
ນັກສຶກສາຫວຽດນາມ ແລະ ປະເທດອືື່ນໆເຂົ້າຮ່ວມງານບຸນເປັນຈໍານວນຫຼວງຫຼາຍ (ພາບ: TTXVN) |
ຄະນະຜູ້ແທນຫວຽດນາມ ໂດຍທ່ານ ຫວູແອັງກວາງ ເອກອັກຄະລັດຖະທູດຫວຽດນາມ ປະຈໍາ ແບນຊິກ ແລະ ຫົວໜ້າຄະນະຜູ້ແທນຫວຽດນາມ ປະຈໍາ ສະຫະພາບເອີຣົບ (ອີຢູ) ນໍາໜ້າຄະນະເຂົ້າຮ່ວມຢ້ຽມຊົມງານບຸນ.
ທ່ານເອກອັກຄະລັດຖະທູດ ຫວູແອັງກວາງ ຕີລາຄາສູງຄວາມໝາຍຂອງງານບຸນ Manifiesta ໃນການເຊື່ອມຕໍ່ຄວາມສາມັກຄີລະຫວ່າງບັນດາກໍາລັງກອມມູນິດ, ຊົນຊັ້ນກໍາມະກອນ ແລະ ຊາວຜູ້ອອກແຮງງານສາກົນ. ທ່ານເອກອັກຄະລັດຖະທູດ ຫວູແອັງກວາງ ໃຫ້ຮູ້ວ່າ ນີ້ແມ່ນໂອກາດເພື່ອໃຫ້ຫວຽດນາມ ສະແດງນໍ້າໃຈຄວາມສາມັກຄີກັບພັກກອມມູນິດ ແລະ ກໍາມະກອນສາກົນ. ທ່ານ ກໍເຜີຍໃຫ້ຮູ້ຈຸດປະສົງຈະເປີດຮ້ານວາງສະແດງຜະລິດຕະພັນໃນງານບຸນສາມັກຄີໃນປີໜ້າ ແມ່ນເພື່ອແນໃສ່່ໂຄສະນາອາຫານການກິນ, ວັດທະນະທໍາ ແລະ ສະຖານທີ່ທ່່ອງທ່ຽວຂອງຫວຽດນາມ ໃຫ້ຊາວຜູ້ອອກແຮງງານ ແບນຊິກ ແລະ ເພື່ອນມິດສາກົນຮັບຊາບ.
ລາຍການຂອງງານບຸນມີຄວາມອຸດົມສົມບູນໄປດ້ວຍບັນດາລາຍການສະແດງສິລະປະ, ອາຫານການກິນ ແລະ ພິເສດແມ່ນໄດ້ຈັດຕັ້ງກອງປະຊຸມປຶກສາຫາລືເກືອບ 200 ຄັ້ງ ກ່ຽວກັບບັນດາບັນຫາສິດຂອງແມ່ຍິງ, ປົກປັກຮັກສາສິ່ງແວດລ້ອມ ຫຼື ຕ້ານການຈໍາແນກເຊື້ອຊາດຜິວພັນ...