ຫວຽດນາມຍັງຄົງບຸລິມະສິດງົບປະມານໃຫ້ແກ່ຂົງເຂດຮັບປະກັນຊີວິດສັງຄົມແລະຫລຸດຜ່ອນຄວາມທຸກຍາກ
ພາບປະກອບ:internet
|
(vovworld)- ວັນທີ 23/11, ຄະນະຕິດຕາມກວດກາຂອງຄະນະປະຈຳສະພາແຫ່ງຊາດ ໄດ້ເຮັດວຽກກັບຜູ້ຕາງຫນ້າລັດຖະບານກ່ຽວກັບວຽກງານຫລຸດຜ່ອນຄວາມທຸກຍາກ. ຕາມບົດລາຍງານຂອງກະຊວງແຮງງານ-ທະຫານເສຍອົງຄະ ແລະ ສັງຄົມຫວຽດນາມແລ້ວ, ໃນສະພາບເສດຖະກິດພວມປະສົບກັບຄວາມຫຍຸ້ງຍາກຄືປະຈຸບັນ, ລັດຖະບານຫວຽດນາມ ຊີ້ນຳໃຫ້ບຸລິມະສິດແກ່ຂົງເຂດຮັບປະກັນຊີວິດສັງຄົມ ແລະ ຫລຸດຜ່ອນຄວາມທຸກຍາກ, ສືບຕໍ່ຈັດແບ່ງງົບປະມານເພື່ອຜັນຂະຫຍາຍບັນດານະໂຍບາຍຫລຸດຜ່ອນຄວາມທຸກຍາກຢ່າງມີປະສິດທິຜົນ ແລະ ຫນູນຊ່ວຍປະຊາຊົນຊົນເຜົ່າສ່ວນຫນ້ອຍ, ບຸລິມະສິດແຫລ່ງຊັບພະຍາກອນມະນຸດໃຫ້ແກ່ບັນດາທ້ອງຖິ່ນທຸກຍາກ, ປະກາດໃຊ້ບາງນະໂຍບາຍຫນູນຊ່ວຍຄອບຄົວທຸກຍາກ. ບັນດາສະມາຊິກໃນຄະນະຕິດຕາມກວດກາ ໄດ້ສະເຫນີລັດຖະບານຄວນເຮັດແຈ້ງບັນດາມາດຕະການຫລຸດຜ່ອນຄວາມທຸກຍາກຢູ່ເຂດຊົນເຜົ່າສ່ວນຫນ້ອຍ, ຄົ້ນຄ້ວາ, ຍົກສູງປະສິດທິຜົນການຄຸ້ມຄອງ, ປະຕິບັດບັນດາໂຄງການຈຸດໝາຍແຫ່ງຊາດ ພ້ອມທັງມີກົນໄກແນະນຳໃຫ້ບັນດາທ້ອງຖິ່ນປະຕິບັດນະໂຍບາຍຕ່າງໆ, ຄຸ້ມຄອງການປະຕິບັດຈຸດໝາຍ, ກວດກາ, ຕີລາຄາການປະຕິບັດຢູ່ບັນດາທ້ອງຖິ່ນ.