ທ່ານ Le Hoai Trung, ຮອງລັດຖະມົນຕີການຕ່າງປະເທດຫວຽດນາມ
ພາບ: internet
|
(vovworld) - ເຖິງວ່າດຳເນີນໄປໃນໄລຍະຫຍຸ້ງຍາກ ດ້ວຍການປະທະກັນ ແລະ ສະພາບພື້ນຖານເສດຖະກິດໂລກຟື້ນຕົວຢ່າງຊັກຊ້າກໍຕາມ ແຕ່ກອງປະຊຸມຄັ້ງທີ 66 ຂອງສະມັດຊາໃຫຍ່ ສປຊ ບັນລຸໄດ້ຜົນງານຫລາຍຢ່າງ ເປັນຕົ້ນແມ່ນບົດບາດ ໄກ່ເກຍປ່ອງດອງ, ປົກປັກຮັກສາສິ່ງແວດລ້ອມ, ພັດທະນາສັງຄົມ ແລະ ຫວຽດນາມ ໄດ້ມີການປະກອບສ່ວນອັນໃຫຍ່ຫລວງເຂົ້າໃນຜົນສຳເລັດລວມ. ນັ້ນແມ່ນຂໍ້ສັງເກດຂອງທ່ານ Le Hoai Trung, ເອກອັກຄະລັດຖະທູດ, ຮອງລັດຖະມົນຕີການຕ່າງປະເທດຫວຽດນາມ, ຫົວຫນ້າຄະນະຜູ້ຕາງຫນ້າຫວຽດນາມ ປະຈຳ ສປຊ ເນື່ອງໃນໂອກາດອັດກອງປະຊຸມຄັ້ງທີ 66 ແລະ ໄຂກອງປະຊຸມຄັ້ງທີ 67 ຂອງສະມັດຊາໃຫຍ່ ສປຊ. ຕາມທ່ານ Le Hoai Trung ແລ້ວ, ບັນດາປະເທດສະມາຊິກໄດ້ຕີລາຄາສູງຂໍ້ສະເຫນີກ່ຽວກັບການເຄື່ອນໄຫວຂອງສະໄຫມປະຊຸມຜ່ານມາໂດຍ ຫວຽດນາມ ຍົກອອກ ແລະ ຖືວ່າ ຂໍ້ສະເຫນີດັ່ງກ່າວແມ່ນມີຄວາມໝາຍແທ້ຈິງ, ສົມເຫດສົມຜົນ ແລະ ມີປະສິດທິຜົນຢ່າງຈະແຈ້ງ. ໃນໄລຍະດຳເນີນກອງປະຊຸມຄັ້ງທີ 66 ຂອງສະມັດຊາໃຫຍ່ ສປຊ, ຫວຽດນາມ ກໍເປັນເຈົ້າການເຂົ້າຮ່ວມການເຄື່ອນໄຫວຂອງຫລາຍຄະນະກຳມະການ ແລະ ອົງການຈັດຕັ້ງອື່ນ, ໃນນັ້ນ ມີເວທີປາໄສຂັ້ນສູງ ກ່ຽວກັບການຮ່ວມມື NAM - NAM, ຄະນະກຳມະການກ່ຽວກັບການພັດທະນາແບບຍືນຍົງ ແລະ ຍົກອອກຂໍ້ລິເລີ່ມ, ຂໍ້ສະເຫນີ, ຊ່ວຍຍົກສູງລັກສະນະປະສິດທິຜົນຂອງບັນດາກົນໄກຫລາຍຝ່າຍນີ້. ຕາມທ່ານ Le Hoai Trung ແລ້ວ, ຜ່ານການປະກອບສ່ວນດັ່ງກ່າວ, ຫວຽດນາມ ສືບຕໍ່ໄດ້ຮັບການຮັບຮູ້ຈາກປະຊາຄົມໂລກວ່າ ແມ່ນປະເທດສະມາຊິກເປັນເຈົ້າການ, ຕັ້ງຫນ້າ ແລະ ເຕັມໄປດ້ວຍປະສິດທິຜົນຂອງ ສປຊ ແລະ ບັນດາອົງການຈັດຕັ້ງສາກົນອື່ນ.