ທ່ານນາຍົກລັດຖະມົນຕີ ຫວຽດນາມ ຫງວຽນເຕິນຢຸງ ໄດ້ໃຫ້ການຕ້ອນຮັບທ່ານລັດຖະມົນຕີວ່າການກະຊວງຍຸຕິທຳ Slovakia
(ພາບ: VGP/Nhật Bắc)
|
(vovworld) – ຕອນບ່າຍວັນທີ 11/3, ທີ່ສຳນັກງານລັດຖະບານ, ທ່ານນາຍົກລັດຖະມົນຕີ ຫວຽດນາມ ຫງວຽນເຕິນຢຸງ ໄດ້ໃຫ້ການຕ້ອນຮັບທ່ານລັດຖະມົນຕີວ່າການກະຊວງຍຸຕິທຳ Slovakia Tomas Borec ທີ່ພວມຢູ່ຢ້ຽມຢາມ ແລະ ເຮັດວຽກຢູ່ຫວຽດນາມ. ທ່ານນາຍົກລັດຖະມົນຕີ ຫວຽດນາມ ຫງວຽນເຕິນຢຸງ ຕີລາຄາສູງການຢ້ຽມຢາມຂອງທ່ານລັດຖະມົນຕີວ່າການກະຊວງຍຸຕິທຳ Slovakia Tomas Borec ແມ່ນກົງກັບໂອກາດທີ່ 2 ປະເທດພວມສະເຫຼີມສະຫຼອງ 65 ປີແຫ່ງວັນສ້າງຕັ້ງສາຍພົວພັນທາງການທູດ, ເນັ້ນໜັກວ່າ: 2 ປະເທດມີການພົວພັນທີ່ເປັນມູນເຊື້ອ, ມິດຕະພາບມາແຕ່ດົນນານ, ຫວຽດນາມ ບໍ່ອາດຫຼົງລືມການສະໜັບສະໜູນການຊ່ວຍເຫຼືອອັນລ້ຳຄ່າຂອງ Slovakia ທີ່ໄດ້ສະຫງວນໃຫ້ ຫວຽດນາມ, ພິເສດແມ່ນໃນຊຸມປີຕໍ່ສູ້ຍາດເອົາເອກະລາດ, ໂຮມປະເທດຊາດເປັນເອກະພາບໄດ້. ຍາມໃດ ພັກ, ລັດ ແລະ ປະຊາຊົນ ຫວຽດນາມ ກໍ່ປາດຖະໜາຢາກຮັກສາ ແລະ ເພີ່ມທະວີການຮ່ວມມືລະຫວ່າງ 2 ປະເທດໃນທຸກຂົງເຂດ, ພິເສດແມ່ນດ້ານເສດຖະກິດ, ການຄ້າ, ການລົງທຶນ, ວິທະຍາສາດ, ການປ້ອງກັນຊາດ ປ້ອງກັນຄວາມສະຫງົບ, ວັດທະນະທຳ, ສຶກສາ… ບົນເນື້ອໃນຈິດໃຈນີ້, ທ່ານນາຍົກລັດຖະມົນຕີ ຫງວຽນເຕີນຢຸງ ປາດຖະໜາວ່າ: ກະຊວງຍຸຕິທຳ ຫວຽດນາມ ແລະ ກະຊວງຍຸຕິທຳ Slovakia ເພີ່ມທະວີການແລກປ່ຽນບົດຮຽນກ່ຽວກັບພຶດຕິກຳຕົວຈິງໃນການປັບປຸງລະບົບກົດໝາຍ ແລະ ຂັ້ນຕອນປະກາດໃຊ້ກົດໝາຍ, ເພີ່ມທະວີການຮ່ວມມືໃນຂົງເຂດສຶກສາ ແລະ ບຳລຸງສ້າງກົດໝາຍ, ບົດຮຽນໃນການນຳໃຊ້ບົນດາສົນທິສັນຍາຂອງກອງປະຊຸມ ລາໄຮ ກ່ຽວກັບດ້ານຕຸລາການສາກົນ ເຊິ່ງທັງ 2 ຝ່າຍເປັນສະມາຊິກ…
ເນື່ອງໃນໂອກາດນີ້, ໂດຍຜ່ານທ່ານລັດຖະມົນຕີວ່າການກະຊວງ ຍຸຕິທຳ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຝາກຄຳເຊີນທ່ານນາຍົກລັດຖະມົນຕີ Slovakia ມາຢ້ຽມຢາມ ຫວຽດນາມ ເພື່ອແນໃສ່ແລກປ່ຽນບັນດາມາດຕະການຊຸກຍູ້ການພົວພັນມິດຕະພາບຮ່ວມມືລະຫວ່າງ 2 ປະເທດ ຢ່າງແຮງກ່ວາອີກ.
ກ່ອນໜ້ານັ້ນ, ທ່ານລັດຖະມົນຕີວ່າການກະຊວງຍຸຕິທຳ ຫວຽດນາມ ຮ່າຮຸ່ງເກື່ອງ ແລະ ທ່ານລັດຖະມົນຕີວ່າການກະຊວງຍຸຕິທຳ Slovakia Tomas Borec ໄດ້ມີການເຈລະຈາ ກ່ຽວກັບບັນດາບັນຫາວິຊາສະເພາະ ເຊິ່ງຕ່າງຝ່າຍຕ່າງມີຄວາມສົນໃຈໃນວຽກງານປະຕິບັດກົດໝາຍ. ພາຍຫຼັງການເຈລະຈາ, 2 ຝ່າຍໄດ້ເຊັນສັນຍາລາຍການຮ່ວມມືປີ 2015 ແລະ 2016 ລະຫວ່າງ ກະຊວງຍຸຕິທຳ ຫວຽດນາມ ແລະ ກະຊວງຍຸຕິທຳ Slovakia.