ທ່ານ ເຈືອງຮ່ວາບິ່ງ ຮອງນາຍົກລັດຖະມົນຕີ ຜູ້ປະຈຳການລັດຖະບານ ຫວຽດນາມ ໃຫ້ການຕ້ອນຮັບທ່ານ Nate Easter ຮອງປະທານຝ່າຍບໍລິຫານກຸ່ມບໍລິສັດ Techonic Industries (TTI) (ພາບ: TTXVN)

TTI ແມ່ນໜຶ່ງໃນບັນດາກຸ່ມບໍລິສັດຜະລິດອຸດສາຫະກຳແຖວໜ້າຂອງລະບົບການສະໜອງ ຂອງໂລກກ່ຽວກັບບັນດາຜະລິດຕະພັນອຸປະກອນໄຟຟ້າ ແລະ ເຄື່ອງໃຊ້ ໃນຄອບຄົວ. ທ່ານ Nate Easter ມີຄວາມປາດຖະໜາຢາກໃຫ້ລັດຖະບານຫວຽດນາມໜູນຊ່ວຍກຸ່ມບໍລິສັດໃນການຍອມຮັບ, ສົ່ງເສີມການລົງທຶນຢູ່ເຂດເຕັກໂນໂລຢີສູງຢູ່ ນະຄອນໂຮ່ຈີມິນ, ມີນະໂຍບາຍບຸລິມະສິດ, ໜູນຊ່ວຍການສະໜອງເພື່ອຊຸກຍູ້ວິວັດການຫັນລະບົບການສະໜອງທົ່ວໂລກເປັນຂອງພາຍໃນປະເທດ.

ສ່ວນທ່ານ ເຈືອງຮ່ວາບິ່ງ ໄດ້ຢັ້ງຢືນວ່າ ລັດຖະບານຫວຽດນາມ ຍາມໃດກໍ່ມີຄວາມເອົາໃຈໃສ່, ສ້າງເງື່ອນໄຂສະດວກໃຫ້ແກ່ບັນດາກຸ່ມບໍລິສັດ, ວິສາຫະກິດໃຫຍ່ຂອງຕ່າງປະເທດທີ່ມາລົງທຶນຢູ່ຫວຽດນາມ. ລັດຖະບານໄດ້ສະໜັບສະໜູນໂຄງການຂອງ TTI, ພ້ອມທັງມີຄວາມປາດຖະໜາວ່າ TTI ຈະຕັ້ງໜ້າສົມທົບ, ໜູນຊ່ວຍບັນດາກະຊວງ, ຂະແໜງການ, ທ້ອງຖິ່ນ ຫວຽດນາມ ໃນການສົ່ງເສີມ, ດຶງດູດການລົງທຶນການຄ້າ ເພື່ອໃຫ້ນັບມື້ນັບມີວິສາຫະກິດສຳຮອງ, ສະໜອງການຜະລິດຫຼາຍແຫ່ງມາລົງທຶນ, ດຳເນີນທຸລະກິດຢູ່ຫວຽດນາມ.