(vovworld) - ກອງປະຊຸມການພົວພັນມິດຕະພາບລະຫວ່າງສະພາແຫ່ງຊາດຫວຽດນາມ - ກຳປູເຈຍ, ທີ່ດຳເນີນໄປຢູ່ນະຄອນໂຮ່ຈິມິນ, ໄດ້ອັດລົງຢ່າງຈົບງາມ ແລະ ອອກແຈ້ງການຮ່ວມຂອງ 2 ສະພາແຫ່ງຊາດ ໃນວາລະອັດກອງປະຊຸມເມື່ອຕອນບ່າຍວັນທີ 23/8. ກ່າວຄຳເຫັນທີ່ວາລະອັດກອງປະຊຸມ, ທ່ານຮອງປະທານສະພາແຫ່ງຊາດຫວຽດນາມ Huynh Ngoc Son ໄດ້ຢືນຢັນວ່າ ການສຳເລັດຂອງກອງປະຊຸມ ແມ່ນບາດກ້າວທີ່ສຳຄັນເພື່ອສືບຕໍ່ປັບປຸງ, ພັດທະນາສາຍພົວພັນສາມັກຄີ, ມິດຕະພາບທີ່ເປັນມູນເຊື້ອ ແລະ ການຮ່ວມມືຢ່າງຮອບດ້ານລະຫວ່າງສະພາແຫ່ງຊາດ ແລະ ປະຊາຊົນ 2 ປະເທດຫວຽດນາມ - ກຳປູເຈຍ, ຖືວ່າ ນີ້ແມ່ນຊັບສົມບັດອັນລຳຄ່າຕ້ອງໄດ້ຮັບການຮັກສາ, ພັດທະນາ ແລະ ສືບທອດໃຫ້ລຸ້ນຕໍ່ໆໄປ. ກອງປະຊຸມໄດ້ເຫັນດີສືບຕໍ່ຍູ້ແຮງການພົວພັນຮ່ວມມືລະຫວ່າງ 2 ອົງການນິຕິບັນຍັດກວ່າອີກ ຕາມທິດປະຕິບັດຂໍ້ຕົກລົງຮ່ວມມືລະຫວ່າງ 2 ສະພາແຫ່ງຊາດ ເຊິ່ງໄດ້ຮັບການລົງນາມເມື່ອວັນທີ 22/7/2012 ຢູ່ທີ່ຮ່າໂນ້ຍ; ສືບຕໍ່ແລກປ່ຽນບັນດາຄະນະຜູ້ແທນຂັ້ນສູງ; ຊຸກຍູ້ການເຄື່ອນໄຫວຂອງກຸ່ມສະມາຊິກສະພາແຫ່ງຊາດ 2 ປະເທດຫວຽດນາມ - ກຳປູເຈຍ, ກຳປູເຈຍ - ຫວຽດນາມ ກວ່າອີກ, ເພື່ອສ້າງເງື່ອນໄຂໃຫ້ການແລກປ່ຽນຄະນະຜູ້ແທນລະຫວ່າງບັນດາອົງການຂອງສະພາແຫ່ງຊາດ, ກຸ່ມສະມາຊິກສະພາແຫ່ງຊາດມິດຕະພາບ ແລະ ສະມາຊິກສະພາແຫ່ງຊາດ, ສະພາປະຊາຊົນບັນດາແຂວງເຂດຊາຍແດນສອງປະເທດ; ສົມທົບກັນຢູ່ບັນດາເວທີປາໄສລັດຖະສະພາພາກພື້ນ ແລະ ສາກົນທີ່ມີຕໍ່ບັນດາບັນຫາທີ່ກ່ຽວຂ້ອງເຖິງສອງປະເທດຢ່າງແໜ້ນແຟ້ນ; ສົມທົບກັນຕິດຕາມກວດກາ ການປະຕິບັດບັນຫາຂໍ້ຕົກລົງກ່ຽວກັບການຮ່ວມມືດ້ານເສດຖະກິດ, ສັງຄົມ, ວັດທະນະທຳ, ການສຶກສາ… ເພື່ອແນໃສ່ຍົກສູງປະສິດທິຜົນການຮ່ວມມືລະຫວ່າງສອງລັດຖະບານ, ປະກອບສ່ວນຊຸກຍູ້ການພັດທະນາເສດຖະກິດ, ສັງຄົມ, ປ້ອງກັນຊາດ ປ້ອງກັນຄວາມສະຫງົບ ເພື່ອຜົນປະໂຫຍດລວມຂອງປະຊາຊົນສອງຊາດ. ສ່ວນທ່ານຮອງປະທານສະພາສູງລາຊະອານາຈັກກຳປູເຈຍ Tep Ngorn ກໍ່ຊີ້ແຈ້ງວ່າ ການຈັດຕັ້ງກອງປະຊຸມສະເຫຼີມສະຫຼອງ 45 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງກຳປູເຈຍ - ຫວຽດນາມ ແລະ ປີມິດຕະພາບ ກຳປູເຈຍ - ຫວຽດນາມ ໃນໂອກາດນີ້ແມ່ນສັນຍາລັກອັນສູງສົ່ງສະແດງໃຫ້ເຫັນນຳໃຈມິດຕະພາບ, ສາມັກຄີ ແລະ ການຮ່ວມມືລະຫວ່າງປະຊາຊົນສອງປະເທດກຳປູເຈຍ - ຫວຽດນາມ ໃນປະຈຸບັນ ກໍຄືໃນອະນາຄົດ ແມ່ນໝັ້ນຄົງ, ຍາວນານ, ບໍ່ສາມາດຕັດແຍກອອກໄດ້.
ກອງປະຊຸມການພົວພັນມິດຕະພາບສະພາແຫ່ງຊາດຫວຽດນາມ - ກຳປູເຈຍ ໄດ້ຢືນຢັນຄຳໝັ້ນສັນຍາຂອງສອງອົງການນິຕິບັດນຍັດຫວຽດນາມ - ກຳປູເຈຍ ແມ່ນຈະພ້ອມກັບລັດຖະບານ ແລະ ປະຊາຊົນບັນດາປະເທດສະມາຊິກອາຊຽນ ສ້າງອາຊຽນໃຫ້ມີຄວາມສາມັກຄີ, ໝັ້ນຄົງ, ເຂັ້ມແຂງ, ເຄົາລົບ ແລະ ຊ່ວຍເຫຼືອເຊິ່ງກັນ ແລະ ກັນ, ພ້ອມກັນເອົາໃຈໃສ່ ແລະ ສົມທົບກັນຢ່າງກົມກຽວລະຫວ່າງຜົນປະໂຫຍດແຫ່ງຊາດ ກັບ ຜົນປະໂຫຍດຂອງປະຊາຄົມ, ປະກອບສ່ວນຢ່າງຕັ້ງໜ້າເຂົ້າໃນບັນດາຈຸດໝາຍລວມແມ່ນ ສັນຕິພາບ, ຄວາມສະຫງົບປອດໄພ, ການຮ່ວມມື ແລະ ພັດທະນາ. ສະພາແຫ່ງຊາດຫວຽດນາມ ແລະ ສະພາແຫ່ງຊາດ, ສະພາສູງກຳປູເຈຍ ສະໜັບສະໜູນທັດສະນະຂອງລັດຖະບານສອງປະເທດ ກ່ຽວກັບການເພີ່ມທະວີການຮ່ວມມື 2 ຝ່າຍກໍຄືແລກປ່ຽນກ່ຽວກັບບັນດາບັນຫາພາກພື້ນ ແລະ ສາກົນກວ່າອີກ.