( vovworld ) - ວັນທີ 20/2, ສະຫະປະຊາຊາດໄດ້ຮຽກຮ້ອງບັນດາປະເທດອາຊີຕາເວັນອອກສຽງໃຕ້ລົງທຶນເຂົ້າບັນດາໂຄງການຫຼຸດຜ່ອນໄພພິບັດທຳມາຊາດເພື່ອຮັກສາການຈະເລີນເຕີບໂຕດ້ານເສດຖະກິດ. ທີ່ເວທີປາໄສໄດ້ປຶກສາຫາລືບັນດາມາດຕະການແນໃສ່ຫຼຸດຜ່ອນໄພນ້ຳຖ້ວມຢູ່ອາຊີຕາເວັນອອກສຽງໃຕ້ ໂດຍຄະນະກຳມະການສະຫະປະຊາຊາດກ່ຽວກັບເສດຖະກິດສັງຄົມພາກພື້ນອາຊີ - ປາຊີຟິກ ( UNESCAP ) ຈັດຂື້ນຢູ່ນະຄອນຫຼວງບາງກອກ, ປະເທດໄທ. ຮອງເລຂາທິການໃຫຍ່ສະຫະປະຊາຊາດ ແລະ ຜູ້ອຳໜ່ວຍການໃຫຍ່ UNESCAP ທ່ານ Noeleen Heyzer ໄດ້ເນັ້ນໜັກເຖິງຄວາມຕ້ອງການຢ່າງຮີບດ່ວນໃນການສ້າງຕັ້ງລະບົບມາດຕະການເພື່ອແນໃສ່ຫຼຸດຜ່ອນໄພພິບັດທຳມະຊາດລະດັບຊາດ ແລະ ທົ່ວພາກພື້ນ. ເຫດການນ້ຳຖ້ວມທຳລາຍໃນທົ່ວພາກພື້ນອາຊີຕາເວັນອອກສຽງໃຕ້ທີ່ບໍ່ເຄີຍມີມາກ່ອນ ໃນປີ 2011 ໄດ້ວາງອອກຄວາມຮຽກຮ້ອງເພີ່ມທະວີການລົງທຶນເພື່ອຫຼຸດຜ່ອນໄພທຳມະຊາດຢ່າງຮີບດ່ວນເພື່ອປົກປັກຮັກສາພື້ນຖານເສດຖະກິດ ແລະ ສັງຄົມ.
ທີ່ເວທີປາໄສ, ບັນດາປະເທດອາຊີຕາເວັນອອກສຽງໃຕ້ ໄດ້ປຶກສາຫາລືບັນດາບົດຮຽນຈາກໄພທຳມະຊາດຕ່າງໆເຊິ່ງເກີດຂື້ນໃນພາກພື້ນເມື່ອປີ 2011 ເພື່ອຊອກຫາບັນດາມາດຕະການແນໃສ່ຊ່ວຍເຫຼືອປະເທດຕ່າງໆຮັບມືກັບໄພພິບັດທຳມະຊາດໃນອະນາຄົດຢ່າງມີປະສິດທິຜົນກວ່າ. ເຫດນ້ຳຖ້ວມຄັ້ງປະຫວັດສາດຢູ່ອາຊີຕາເວັນອອກສຽງໃຕ້ເມື່ອປີ 2011 ໄດ້ສົ່ງຜົນສະທ້ອນເຖິງປະຊາຊົນຢ່າງໜ້ອຍສຸດ 20 ລ້ານຄົນ, ເຮັດໃຫ້ 1000 ຄົນເສຍຊີວິດ ແລະ ຄວາມເສຍຫາຍດ້ານຊັບສິນຂື້ນເຖິງຫຼາຍຕື້ USD. ຂໍ້ມູນຂ່າວຕົ້ນຕໍ່ຂອງເວທີປາໄສຢູ່ບາງກອກ ຄັ້ງນີ້ແມ່ນ ຕັກເຕືອນບັນດານັກວາງແຜນນະໂຍບາຍ, ບັນດາລັດຖະບານ ແລະ ພາກເອກະຊົນກ່ຽວກັບໄລຍະຫ່າງລະຫວ່າງການຈະເລີນເຕີບໂຕໄວ ແລະ ການລົງທຶນເພື່ອແນໃສ່ຫຼຸດໄພພິບັດທຳມະຊາດ.