(vovworld) - ໃນລະຫວ່າງວັນທີ 25 – 26/05, ທ່ານຮອງລັດຖະມົນຕີການຕ່າງປະເທດ ວູຮົ່ງນາມ ໄດ້ໄປຢ້ຽມຢາມ ແລະ ເຮັດວຽກຢູ່ມຽນມາ ເພື່ອແນໃສ່ຊູກຍູ້ການພົວພັນຮ່ວມມືລະຫວ່າງ 2 ປະເທດເວົ້າລວມ ແລະ 2 ກະຊວງການຕ່າງປະເທດເວົ້າສະເພາະ ໃນສະພາບທີ່ພັກສະຫະພັນແຫ່ງຊາດເພື່ອປະຊາທິປະໄຕ (NLD) ຫາກໍຂຶ້ນກຳອຳນາດ ແລະ ສ້າງຕັ້ງລັດຖະບານໃໝ່ໃນວັນທີ 01/04 ຜ່ານມາ. ໃນຂອບເຂດການຢ້ຽມຢາມ, ທ່ານຮອງລັດຖະມົນຕີການຕ່າງປະເທດ ວູຮົ່ງນາມ ໄດ້ມີການເຈລະຈາກັບການນຳຂັ້ນສູນຫຼາຍທ່ານຂອງປະເທດນີ້.
ທີ່ບັນດາການເຈລະຈາ ແລະ ປຶກສາຫາລື, ທ່ານຮອງລັດຖະມົນຕີການຕ່າງປະເທດ ວູຮົ່ງນາມ ຢືນຢັນວ່າ, ຍາມໃດຫວຽດນາມ ກໍ່ເຄົາລົບ ແລະ ຕີລາຄາສູງການພົວພັນມິດຕະພາບທີ່ເປັນມູນເຊື້ອ ແລະ ຄວາມມານະພະຍາຍາມຮ່ວມມືຫວຽດນາມ - ມຽນມາ ໃນ 4 ທົດສະວັດຜ່ານມາ; ຊີ້ແຈ້ງບາງຜົນງານພົ້ນເດັ່ນລະຫວ່າງ 2 ປະເທດໃນຊຸມປີມໍ່ໆມານີ້ ທີ່ໄດ້ສະແດງໃຫ້ເຫັນຄວາມມານະພະຍາຍາມຂອງລັດຖະບານ, ວິສາຫະກິດ ແລະ ປະຊາຊົນ 2 ປະເທດ… 2 ຝ່າຍຢືນຢັນວ່າ ຈະສົມທົບກັນຢ່າງແໜ້ນແຟ້ນ ເພື່ອຊຸກຍູ້ການຮ່ວມມືດ້ານປ້ອງກັນຊາດປ້ອງກັນຄວາມສະຫງົບ ກໍຄື 12 ຂົງເຂດໃຫ້ບຸລິມະສິດ (ທີ່ໄດ້ຍົກອອກມາໃນຖະແຫຼງການຮ່ວມລະຫວ່າງ 2 ປະເທດໃນປີ 2010), ສ້າງເງື່ອນໄຂສະດວກໃຫ້ວິສາຫະກິດ 2 ປະເທດ, ເພີ່ມທະວີການຈັດຕັ້ງບັນດາການເຄື່ອນໄຫວສົ່ງເສີມການທ່ອງທ່ຽວ ແລະ ລົງທຶນ ເພື່ອຊ່ວຍເພີ່ມທະວີການພົວພັນຮ່ວມມືມິດຕະພາບລະຫວ່າງ 2 ປະເທດ; ເພີ່ມທະວີຄວາມສາມັກຄີໃນປະຊາຄົມອາຊຽນ, ສະໜັບສະໜູນເຊິ່ງກັນ ແລະ ກັນໃນບັນດາເວທີປາໄສສາກົນ ກໍຄືບັນດາກົນໄກຮ່ວມມືໃນອະນຸພາກພື້ນ.