(vovworld) - ເນື່ອງໃນໂອກາດສະເຫຼີມສະຫຼອງ 51 ປີໄພພິບັດທາດພິດສີສົ້ມດີໂອຊິນຢູ່ຫວຽດນາມ, ຕອນຄໍ່າວັນທີ 5/8, ຢູ່ນະຄອນໂຮ່ຈິມິນ ໄດ້ດຳເນີນລາຍການສະແດງສິນລະປະດ້ວຍຫົວຂໍ້ວ່າ “ຄວາມຫວັງຢາກມີຊີວິດ” ຄັ້ງທີ 6. ນີ້ແມ່ນໜຶ່ງໃນບັນດາການເຄື່ອນໄຫວຂອງເດືອນເຄື່ອນໄຫວ “ເພື່ອຜູ້ປະສົບເຄາະຮ້າຍຈາກທາດພິດສີສົ້ມດີໂອຊິນ ແລະ ຄົນພິການທີ່ທຸກຍາກປີ 2012” ຂອງສະພາກາແດງນະຄອນໂຮ່ຈິມິນ ເພື່ອແນໃສ່ຂົນຂວາຍແຫຼ່ງທຶນເບິ່ງແຍງດູແລ, ຊ່ວຍເຫຼືອ ຜູ້ປະສົບເຄາະຮ້າຍຈາກທາດພິດສີສົ້ມດີໂອຊິນ. ຜ່ານລາຍການສິນລະປະ ແລະ ການຍ່າງເພື່ອຜູ້ປະສົບເຄາະຮ້າຍຈາກທາດພິດສີສົ້ມດີໂອຊິນທີ່ດຳເນີນກ່ອນໜ້ານັ້ນ, ບັນດາຫົວໜ່ວຍ, ໝູ່ຄະນະ ແລະ ສ່ວນບຸກຄົນບໍລິຈາກເງິນໄດ້ເກືອບ 3 ຕື້ດົງໃຫ້ແກ່ກອງທຶນຊ່ວຍເຫຼືອຜູ້ປະສົບເຄາະຮ້າຍຈາກທາດພິດສີສົ້ມດີໂອຊິນ, ສະພາກາແດງນະຄອນໂຮ່ຈິມິນ. ທ່ານນາງ Nguyen Thi Hue, ປະທານ ສະພາກາແດງນະຄອນໂຮ່ຈິມິນ, ໃຫ້ຮູ້ວ່າ.
“ພວກຂ້າພະເຈົ້າເຫັນວ່າ, ຄຸນນະທາດ, ມະນາຈິດ, ເຈດຈຳນົງຂອງບັນດາຜູ້ ປະສົບເຄາະຮ້າຍຈາກທາດພິດສີສົ້ມດີໂອຊິນແມ່ນດີຫຼາຍ. ເຂົ້າເຈົ້າໄດ້ພ້ອມກັບພວກຂ້າພະເຈົ້າປຶກສາຫາລືເພື່ອປົວແປງ, ຍົກສູງຊີວິດການເປັນຢູ່ ກໍຄືສຸຂະພາບໃຫ້ຄອບຄົວຂອງຕົນ. ພວກຂ້າພະເຈົ້າຂໍຂອບໃຈການຮ່ວມແຮງຮ່ວມໃຈຂອງບັນດາວິສາຫະກິດທີ່ໄດ້ ຊອກຫາວິທີຊ່ວຍເຫຼືອໃຫ້ແກ່ຜູ້ປະສົບເຄາະຮ້າຍຈາກທາດພິດສີສົ້ມດີໂອຊິນ. ພວກຂ້າພະເຈົ້າຮູ້ສຶກຕື້ນຕັນໃຈຫຼາຍຕໍ່ນ້ຳໃຈທີ່ມີລັກສະນະວັດທະນະທຳມະນຸດ ແລະ ສິນລະທຳຂອງມະນຸດເຊິ່ງບັນດາວິສາຫະກິດໄດ້ສະຫງວນໃຫ້ແກ່ບັນດາຜູ້ປະສົບເຄາະຮ້າຍຈາກທາດພິດສີສົ້ມດີໂອຊິນ”.