(vovworld) - ວັນທີ 23/3, ໃນຂອບເຂດສັບປະດາສະເຫຼີມສະຫຼອງ 40 ປີແຫ່ງວັນເຊັນສັນຍາ ປາຣີ ຢູ່ນະຄອນ Choisy Le Roi, ທ່ານນາງອະດີດຮອງປະທານປະເທດ ຫວຽດນາມ ຫງວຽນທິບິ່ງ ພ້ອມກັບການນຳນະຄອນ ໄດ້ຕັດແຖບຜ້າເປີດສະຫຼອງສະໜາມຫຼວງທີ່ມີຊື່ວ່າ “ສັນຍາ ປາຣີ”. ສະໜາມຫຼວງແຫ່ງໃໝ່ ດ້ວຍສັນຍາລັກສັນຕິພາບຈະເຊື່ອມຕໍ່ນ້ຳໃຈມິດຕະພາບທີ່ເປັນມູນເຊື້ອລະຫວ່າງ ຫວຽດນາມ ແລະ ນະຄອນ Choisy Le Roi, ແຫ່ງທີ່ເຄີຍຕ້ອນຮັບ ແລະ ຊ່ວຍເຫຼືອຄະນະຜູ້ແທນ ຫວຽດນາມ ໃນໄລຍະ 5 ປີດຳເນີນການເຈລະຈາ ປາຣີ. ກ່າວຄຳເຫັນນະພິທີເປີດສະຫຼອງ, ທ່ານນາງອະດີດຮອງປະທານປະເທດ ຫວຽດນາມ ຫງວຽນທິບິ່ງ ໄດ້ທົບທວນຄືນຄວາມໝາຍຂອງສັນຍາ ປາຣີ ແລະ ການປະກອບສ່ວນສຳຄັນຂອງນະຄອນ Choisy Le Roi ເຂົ້າໃນຜົນງານປະຫວັດສາດຂອງປະຊາຊົນ ຫວຽດນາມ ແລະ ຂອງປະຊາຊົນ ຝຣັ່ງ, ປະຊາຊົນຜູ້ຮັກຫອມສັນຕິພາບໃນທົ່ວໂລກ:
“40 ໄດ້ລ່ວງເລີຍໄປ, ພວກຂ້າພະເຈົ້າມີຄວາມຜາສຸກຫຼາຍທີ່ມີໜ້າໃນເຫດການນີ້, ໃນບັນຍາກາດໃໝ່ ແຕ່ຍາມໃດກໍ່ເຕັມໄປດ້ວຍຄວາມສຸດອົກສຸດໃຈ, ນ້ຳໃຈມິດຕະພາບ, ບໍລິສຸດຜຸດຜ່ອງ. ພິເສດ, ພວກຂ້າພະເຈົ້າມີຄວາມຕື້ນຕັນໃຈຕໍ່ບັນດາແນວຄວາມຄິດ, ການເຄື່ອນໄຫວຕ່າງໆທີ່ມີຄວາມໝາຍເຊິ່ງນະຄອນ Choisy Le Roi ຈັດຕັ້ງເພື່ອສະເຫຼີມສະຫຼອງ 40 ປີແຫ່ງວັນເຊັນສັນຍາ ປາຣີ ”
ທ່ານ Daniel Davisse, ເຈົ້າຄອງນະຄອນ Choisy Le Roi ແລະ ເອກອັກຄະລັດຖະທູດ ຫວຽດນາມ ປະຈຳ ຝຣັ່ງ ເຢືອງຈີ໋ຢູງ ລ້ວນແຕ່ເນັ້ນໜັກເລື່ອງສືບຕໍ່ຊຸກຍູ້ນ້ຳໃຈມິດຕະພາບທີ່ເປັນມູນເຊື້ອ ຫວຽດນາມ - ຝຣັ່ງ ເວົ້າລວມ, ລະຫວ່າງ ຫວຽດນາມ ກັບ Choisy Le Roi ເວົ້າສະເພາະ ໃຫ້ແຂງແຮງກ່ວາອີກ. ທ່ານນາງອະດີດຮອງປະທານປະເທດ ຫວຽດນາມ ຫງວຽນທິບິ່ງ ພ້ອມກັບການນຳນະຄອນ Choisy Le Roi, ເອກອັກຄະລັດຖະທູດ ຫວຽດນາມ ປະຈຳ ຝຣັ່ງ ແລະ ການນຳເມືອງ ດົ໋ງດາ (ນະຄອນຫຼວງ ຮ່າໂນ້ຍ) - ຫົວໜ່ວຍເປັນແຮກສ່ຽວ ກັບນະຄອນ Choisy Le Roi ໄດ້ພ້ອມກັນຕັດແຖບຜ້າເປີດແຜ່ນສີລາສິລະປະເພື່ອສັນຕິພາບ.