ເພີ່ມທະວີການພົວພັນມິດຕະພາບແລະການຮ່ວມມືຫລາຍດ້ານລະຫວ່າງຫວຽດນາມແລະບັນດາປະເທດອາຊຽນ
(ທ່ານນາຍົກລັດຖະມົນຕີ ຫງວຽນຊວນຟຸກ ຕ້ອນຮັບບັນດາ
ເອກອັກຄະລັດຖະທູດຂອງບັນດາປະເທດສະມາຊິກ ອາຊຽນ)
(vovworld) - ຕອນບ່າຍວັນທີ 11/05, ຢູ່ສຳນັກງານລັດຖະບານ, ກ່າວຄຳເຫັນທີ່ການຕ້ອນຮັບບັນດາເອກອັກຄະລັດຖະທູດຂອງບັນດາປະເທດສະມາຊິກ ອາຊຽນ, ທ່ານນາຍົກລັດຖະມົນຕີ ຫງວຽນຊວນຟຸກ ເຊື່ອໝັ້ນວ່າ: ບັນດາເອກອັກຄະລັດຖະທູດຈະສືບຕໍ່ປະກອບສ່ວນຈົນສຸດຄວາມສາມາດຂອງຕົນເຂົ້າໃນການເພີ່ມທະວີການພົວພັນມິດຕະພາບ ແລະ ການຮ່ວມມືຫລາຍດ້ານກັບ ຫວຽດນາມ. ທ່ານນາຍົກລັດຖະມົນຕີ ຖືວ່າ: ບັນດາປະເທດສະມາຊິກຄວນມານະພະຍາຍາມສ້າງ ອາຊຽນ ສາມັກຄີ, ເອກະພາບ, ພິເສດແມ່ນໃນສະພາບແວດລ້ອມຍຸດທະສາດໃນພາກພື້ນມີການຫັນປ່ຽນຫລາຍຢ່າງ ແລະ ການແກ່ງແຍ້ງກັນດ້ານຍຸດທະສາດລະຫວ່າງບັນດາປະເທດມະຫາອຳນາດນັບມື້ນັບເພີ່ມຂຶ້ນ. ຫວຽດນາມ ໃຫ້ຄຳໝັ້ນສັນຍາຈະສົມທົບກັນຢ່າງແໜ້ນແຟ້ນກັບບັນດາປະເທດ ອາຊຽນ ສືບຕໍ່ເປັນເຈົ້າການ, ຕັ້ງໜ້າປະກອບສ່ວນເຂົ້າໃນການຮັກສາບົດບາດເປັນເຈົ້າພາທາງ, ເພີ່ມທະວີຄວາມສາມັກຄີ, ເອກະພາບຂອງ ອາຊຽນ ໃນການແກ້ໄຂບັນດາບັນຫາຍຸດທະສາດຢູ່ພາກພື້ນ, ໃນການພົວພັນຂອງ ອາຊຽນ ກັບບັນດາຄູ່ຮ່ວມມືພາຍນອກ, ກໍ່ຄືໃນການສ້າງໂຄງປະກອບພາກພື້ນບົນພື້ນຖານບັນດາເວທີປາໄສ ໂດຍ ອາຊຽນ ນຳພາ.
ຕໍ່ໜ້າບັນດາການຜັນແປຢ່າງສັບສົນຢູ່ ທະເລຕາເວັນອອກ. ທ່ານນາຍົກລັດຖະມົນຕີ ສະເໜີບັນດາປະເທດສືບຕໍ່ເພີ່ມທະວີການສົມທົບກັນ ເພື່ອເສີມຂະຫຍາຍບົດບາດເປັນໃຈກາງຂອງ ອາຊຽນ; ຮັກສາຄວາມສາມັກຄີ ແລະ ຫຼັກໝັ້ນລວມຂອງ ອາຊຽນ ໃນບັນຫາທະເລຕາເວັນອອກ; ຊຸກຍູ້ແກ້ໄຂບັນດາການຂັດແຍ້ງກັນດ້ວຍສັນຕິວິທີ, ບົນພື້ນຖານກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982; ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ, ບັນລຸໄດ້ປະມວນຂໍ້ກຳນົດການປະພຶດຢູ່ທະເລຕາເວັນອອກ (COC) ໂດຍໄວ ເພື່ອປົກປັກຮັກສາສັນຕິພາບ, ສະຖຽນລະພາບ, ຄວາມສະຫງົບ, ຄວາມປອດໄພ ແລະ ການຮ່ວມມືຢູ່ພາກພື້ນ.