(ພາບ:hanoimoi.com.vn)
( vovworld ) – ຕອນເຊົ້າວັນທີ 3/8, ຢູ່ຮ່າໂນ້ຍ, ກະຊວງກະສິກຳ ແລະ ພັດທະນາຊົນນະບົດ, ອົງການອານຫານ ແລະ ກະເສດສະຫະປະຊາຊາດ (FAO), ສະຖານທູດອິດສະຣາແອນ ປະຈຳຫວຽດນາມ ໄດ້ສົມທົບກັນຈັດເວທີປາໄສໂອ້ລົມສົນທະນານະໂຍບາຍກ່ຽວກັບ “ການນຳໃຊ້ເຕັກໂນໂລຊີສູງໃນກະສິກຳຜ່ານບັນດາຄູ່ຮ່ວມມືພາກລັດ-ພາກເອກະຊົນ“. ເວທີປາໄສແມ່ນໂອກາດໃຫ້ບັນດາກະຊວງ, ຄະນະ, ຂະແໜງການຂອງຫວຽດນາມ ແນະນຳບັນດານະໂຍບາຍ, ສົ່ງເສີມ ແລະ ຮ່ວມມືລົງທຶນເຂົ້າໃນຂົງເຂດເຕັກໂນໂລຊີສູງໃຫ້ແກ່ກະສິກຳເພື່ອແນໃສ່ເພີ່ມທະວີປະສິດທິພາບ ແລະ ຄຸນຄ່າດ້ານເສດຖະກິດໃຫ້ແກ່ບັນດາຜະລິດຕະພັນກະເສດຫວຽດນາມ. ທີ່ເວທີປາໄສ, ບັນດາຜູ້ແທນກໍ່ໄດ້ແບ່ງປັນບົດຮຽນໃນການນຳໃຊ້ເຕັກໂນໂລຊີສູງໃນຂົງເຂດຜະລິດກະສິກຳຂອງບາງປະເທດຄື: ອິດສະຣາແອນ, ໂຮນລັງ, ຊູແອດ, ນອກແວ, ຍີ່ປຸ່ນ…ທ່ານ Cao Duc Phat ລັດຖະມົນຕີວ່າການກະຊວງກະສິກຳ ແລະ ພັດທະນາຊົນນະບົດຫວຽດນາມ ຢືນຢັນວ່າ:
“ໃນຊຸມປີທີ່ຜ່ານມາ, ຍາມໃດ, ລັດຖະບານຫວຽດນາມ ກໍເອົາໃຈໃສ່ຍູ້ແຮງການຄົ້ນຄ້ວາຖ່າຍຖອດເຕັກໂນໂລຊີ ແລະ ນຳໃຊ້ວິທະຍາສາດເຕັກໂນໂລຊີ ເພື່ອຫັນພື້ນຖານກະສິກຳ ຊົນນະບົດເປັນທັນສະໄໝ. ລັດຖະບານ ແລະ ກະຊວງກະສິກຳ ແລະ ພັດທະນາຊົນນະບົດ ກໍ່ພວມຕັ້ງໜ້າຜັນຂະຫຍາຍກົດໝາຍວ່າດ້ວຍເຕັກໂນໂລຊີສູງ, ສ້າງແຜນຮ່າງກະສິກຳສັງລວມນຳໃຊ້ເຕັກໂນໂລຊີສູງ. ການນຳໃຊ້ເຕັກໂນໂລຊີສູງເຂົ້າໃນການຜະລິດພວມຖືກຖືວ່າ ແມ່ນປັດໄຈສຳຄັນເພື່ອຊຸກຍູ້ວິວັດການສ້າງໂຄງປະກອບກະສິກຳ ແລະ ສ້າງຊົນນະບົດໃໝ່ຄືນໃໝ່“