ໄຂກອງປະຊຸມ CG ກາງສະໄໝ ຢ່າງເປັນທາງການ
ທ່ານຮອງນາຍົກລັດຖະມົນຕີ Hoang Trung Hai ເຂົ້າຮ່ວມກອງປະຊຸມ
(ພາບ: Nguyen Linh)
(vovworld) – ວັນທີ 5/6, ກອງປະຊຸມກາງສະໄໝກຸ່ມທີ່ປຶກສາບັນດານັກອຸປະຖຳໃຫ້ແກ່ຫວຽດນາມ (ຫຼື CG) ປີ 2012 ໄດ້ໄຂຂຶ້ນຢ່າງເປັນທາງການຢູ່ນະຄອນ ດົງຮ່າ, ແຂວງ ກວາງຈີ້. ດ້ວຍການເຂົ້າຮ່ວມຂອງທ່ານຮອງນາຍົກລັດຖະມົນຕີຫວຽດນາມ Hoang Trung Hai, ຜູ້ອຳນວຍການແຫ່ງຊາດທະນາຄານໂລກ (ຫຼື WB) ປະຈຳຫວຽດນາມ ທ່ານນາງ Victoria Kwa Kwa ແລະ ປະຊາຄົມບັນດານັກອຸປະຖຳ ພ້ອມກັບການນຳ 14 ແຂວງ, ນະຄອນທາງພາກກາງຫວຽດນາມ. ກອງປະຊຸມ CG ຄັ້ງທີ 13 ໄດ້ສຸມໃສ່ປຶກສາຫາລື 3 ຫົວຂໍ້ຕົ້ນຕໍ. ນັ້ນແມ່ນ, ການອັບເດດສະພາບການເສດຖະກິດມະຫາພາກຫວຽດນາມ: ສະພາບການເສດຖະກິດມະຫາພາກ ແລະ ການເຕີບໂຕ, ຜົນງານໃນຂະບວນວິວັດແຫ່ງການລົບລ້າງຄວາມອຶກຫິວ ຫຼຸດຜ່ອນຄວາມທຸກຍາກ, ການທ້າທາຍໃນປະຈຸບັນໃນພາລະກິດຫຼຸດຜ່ອນຄວາມທຸກຍາກ ຢູ່ຫວຽດນາມ, ບັນດາການທ້າທາຍຕົ້ນຕໍ ແລະ ເນື້ອໃນໃນນະໂຍບາຍຫຼຸດຜ່ອນຄວາມທຸກຍາກ ຢູ່ບັນດາແຂວງແຄມທະເລທາງພາກກາງ, ຄຸ້ມຄອງຜົນຮ້າຍຈາກໄພພິບັດທຳມະຊາດ, ສະພາບການປະຈຸບັນ ແລະ ບັນດາບັນຫາຕົ້ນຕໍໃນການນຳໃຊ້ນະໂຍບາຍລະດັບຊາດ ແລະ ລະດັບແຂວງ ກ່ຽວກັບການຄຸ້ມຄອງຄວາມສ່ຽງຈາກໄພພິບັດທຳມະຊາດ ຢູ່ບັນດາແຂວງແຄມທະເລທາງພາກກາງ. ກອງປະຊຸມ CG ກາງສະໄໝຄັ້ງນີ້, ໄດ້ສຸມໃສ່ປຶກສາຫາລື ກ່ຽວກັບລັກສະນະໂປ່ງໃສດ້ານການເງິນ ໃນການນຳໃຊ້ແຫຼ່ງທຶນ ODA ຊ່ວຍເຫຼືອລ້າ ແລະ ປະສິດທິຜົນໃນການເຄື່ອນໄຫວຂອງລັດວິສາຫະກິດ, ແທນໃຫ້ແກ່ການລົງເລິກວຽກງານເຈລະຈາຊອກຫາທຶນຊ່ວຍເຫຼືອ.
ກ່າວຄຳເຫັນທີ່ກອງປະຊຸມ, ທ່ານຮອງລັດຖະມົນຕີ Hoang Trung Hai ໄດ້ຢືນຢັນວ່າ, ໃນຊຸມປີທີ່ຜ່ານມາ, ບັນດານັກອຸປະຖຳຕ່າງປະເທດໄດ້ໜູນຊ່ວຍໃຫ້ແກ່ລັດຖະບານຫວຽດນາມ ດ້ວຍຫຼາຍໂຄງການໃນທຸກຂົງເຂດ, ພິເສດແມ່ນການຫຼຸດຜ່ອນຄວາມທຸກຍາກ ແລະ ຜົນຮ້າຍຈາກໄພທຳມະຊາດຢູ່ເຂດພາກກາງ. ອັດຕາສ່ວນຄອບຄົວທຸກຍາກຢູ່ພາກກາງໄດ້ຫຼຸດຜ່ອນຢ່າງວ່ອງໄວ ແຕ່ຍັງຢູ່ລະດັບສູງຢູ່, ພິເສດແມ່ນທາງທິດເໜືອພາກກາງ, ອັດຕາສ່ວນທຸກຍາກສູງກວ່າລະດັບປານກາງໃນທົ່ວປະເທດ ເພື່ອບັນລຸຈຸດໝາຍຫຼຸດຜ່ອນຄວາມທຸກຍາກຢ່າງໄວ ແລະ ໝັ້ນຄົງຢູ່ເຂດພາກກາງ ລັດຖະບານຫວຽດນາມ ແລະ ບັນດາທ້ອງຖິ່ນທາງພາກກາງ ໄດ້ສຸມໃສ່ປະຕິບັດບັນດາມາດຕະການນະໂຍບາຍຫຼຸດຜ່ອນຄວາມທຸກຍາກຢ່າງຄົບຊຸດ. ໃນໄລຍະທີ່ຈະມາເຖິງ, ລັດຖະບານຫວຽດນາມ ປາດຖະໜາຢາກໄດ້ຮັບການຊ່ວຍເຫຼືອຈາກບັນດານັກອຸປະຖຳຕ່າງປະເທດ. ທ່ານຮອງນາຍົກລັດຖະມົນຕີ Hoang Trung Hai ຢືນຢັນວ່າ.
“ລັດຖະບານຫວຽດນາມ ຕີລາຄາສູງບັນດາການຊ່ວຍເຫຼືອນັ້ນ ແລະ ປາດຖະໜາວ່າ ບັນດານັກອຸປະຖຳສືບຕໍ່ຊ່ວຍເຫຼືອໃຫ້ແກ່ການພັດທະນາເສດຖະກິດ, ສັງຄົມ, ຫຼຸດຜ່ອນຄວາມທຸກຍາກຢ່າງໝັ້ນຄົງໃນຊຸມປີທີ່ຈະມາເຖິງ. ພວກຂ້າພະເຈົ້າໃຫ້ຄຳໝັ້ນສັນຍາວ່າ ຈະນຳໃຊ້ແຫຼ່ງທຶນຂອງນັກອຸປະຖຳຢ່າງມີປະສິດທິຜົນ, ໂປ່ງໃສ, ຕ້ານການຫຍໍ້ທໍ້. ເຊື້ອໝັ້ນວ່າ, ການເຈລະຈາຈະປະກອບສ່ວນຊຸກຍູ້ການຮ່ວມມືລະຫວ່າງລັດຖະບານຫວຽດນາມ ແລະ ບັນດານັກອຸປະຖຳຕ່າງປະເທດ”.