ໄຂກອງປະຊຸມຄັ້ງທີ 14 ຂອງຄະນະປະຈຳສະພາແຫ່ງຊາດຊຸດທີ 13
(ພາບປະກອບ)
(vovworld) - ຕອນເຊົ້າວັນທີ 14/01, ຢູ່ຮ່າໂນ້ຍ, ຄະນະປະຈຳສະພາແຫ່ງຊາດຫວຽດນາມ ໄດ້ໄຂກອງປະຊຸມຄັ້ງທີ 14 ໂດຍພາຍໃຕ້ການເປັນປະທານຂອງທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ. ກ່າວຄຳເຫັນທີ່ກອງປະຊຸມ, ທ່ານປະທານສະພາແຫ່ງຊາດ ຊີ້ແຈ້ງວ່າ, ບາງບັນຫາໃຫຍ່ທີ່ຍັງມີຄວາມເຫັນແຕກຕ່າງກັນໃນຮ່າງກົດໝາຍ 5 ສະບັບ ຈະໄດ້ສຸມໃສ່ປຶກສາຫາລືໃນຄັ້ງນີ້ຄື; ຮ່າງກົດໝາຍວ່າດ້ວຍທີ່ດິນ (ສະບັບປັບປຸງ), ຮ່າງກົດໝາຍວ່າດ້ວຍການສຶກສາອົບຮົມກ່ຽວກັບການປ້ອງກັນຊາດ, ປ້ອງກັນຄວາມສະຫງົບ; ຮ່າງກົດໝາຍວ່າດ້ວຍການປ້ອງກັນ, ຕ້ານການກໍການຮ້າຍ; ຮ່າງກົດໝາຍວ່າດ້ວຍປ້ອງກັນ, ຫຼີກລ້ຽງ, ຫຼຸດຜ່ອນໄພທຳມະຊາດ; ຮ່າງກົດໝາຍວ່າດ້ວຍວິທະຍາສາດ ແລະ ເຕັກໂນໂລຊີ (ສະບັບປັບປຸງ). ພິເສດ, ຄະນະປະຈຳສະພາແຫ່ງຊາດ ຈະປຶກສາຫາລື ແລະ ຮັບຮອງເອົາ ມະຕິແນະນຳການປະຕິບັດມະຕິຂອງສະພາແຫ່ງຊາດກ່ຽວກັບການລົງຄະແນນສຽງໄວ້ວາງໃຈ ແລະ ປ່ອນບັດໄວ້ວາງໃຈສຳລັບຜູ້ດຳລົງຕຳແໜ່ງໂດຍສະພາແຫ່ງຊາດ, ສະພາປະຊາຊົນເລືອກຕັ້ງ ຫຼື ໃຫ້ສັດຕະຍາບັນ. ພາຍຫຼັງວາລະໄຂກອງປະຊຸມ, ຄະນະປະຈຳສະພາແຫ່ງຊາດຈະໃຫ້ຄຳຄິດຄຳເຫັນໃສ່ຮ່າງກົດໝາຍວ່າດ້ວຍການສຶກສາອົບຮົມກ່ຽວກັບປ້ອງກັນຊາດ, ປ້ອງກັນຄວາມສະຫງົບ. ໃນນັ້ນ, ມີບາງບັນຫາທີ່ຍັງມີຄວາມເຫັນແຕກຕ່າງກັນຄື; ຂອບເຂດປັບປຸງຂອງກົດໝາຍ, ສູນສຶກສາການປ້ອງກັນຊາດ, ປ້ອງກັນຄວາມສະຫງົບ; ອົງການໃຫ້ຄຳປຶກສາ, ຊີ້ນຳການປ້ອງກັນຊາດ, ປ້ອງກັນຄວາມສະຫງົບ. ກອງປະຊຸມຈະແກ່ຍາວເຖິງຮອດວັນທີ 16/01 ຈຶ່ງຈະອັດລົງ.