ການນຳນະຄອນໂຮ່ຈິມິນພົບປະກັບບັນດາສຳນັກງານຜູ້ຕາງໜ້າຂອງຕ່າງປະເທດເນືອງໃນໂອກາດບຸນປີໃໝ່ປີມະເມຍ 2014
ທ່ານປະທານຄະນະ ກຳມະການປະຊາຊົນນະຄອນໂຮ່ຈິມິນ ເລຮ່ວາງກວນ (ເບື້ອງຊ້າຍ) ຈັບມືທ່ານ Anatoni Borovik ຫົວໜ້າກົງສູນໃຫຍ່ແຫ່ງ ສ. ລັດເຊຍປະຈຳຫວຽດນາມ
|
(vovworld)- ຕອນຄ່ຳວັນທີ 23/1, ການນຳນະຄອນໂຮ່ຈິມິນໄດ້ມີການພົບປະສ້າງສັນກັບບັນດາສຳນັກງານຜູ້ຕາງໜ້າຂອງຕ່າງປະເທດເນືອງໃນໂອກາດບຸນປີໃໝ່ປະຈຳຊາດຫວຽດນາມ ປີມະເມຍ 2014 ຊຶ່ງມີການເຂົ້າຮ່ວມ ຂອງຜູ້ຕາງໜ້າບັນດາສະຖານກົງສູນໃຫຍ່, ບັນດາອົງການສຳນັກງານເສດຖະກິດ - ການຄ້າ - ວັດທະນະທຳ, ບັນດາອົງການຈັດຕັ້ງສາກົນ, ບັນດາອົງການທີ່ບໍ່ຂຶ້ນກັບລັດຖະບານ ແລະ ສະຫະສະມາຄົມວິສາຫະກິດປະເທດຕ່າງໆປະຈຳນະຄອນໂຮ່ຈິມິນ ຈຳນວນເກືອບ 200 ຄົນ. ທີ່ການພົບປະ, ທ່ານປະທານຄະນະ ກຳມະການປະຊາຊົນນະຄອນໂຮ່ຈິມິນ ເລຮ່ວາງກວນ ໄດ້ໃຫ້ບັນດາຜູູ້ແທນທີ່ເຂົ້າຮ່ວມຮັບຊາບກ່ຽວກັບສະພາບການເສດຖະກິດສັງຄົມຂອງນະຄອນໃນປີ 2013 ແລະ ບັນດາການກຳນົດທິດພັດທະນາໃນປີ 2014 ຂອງຫວຽດນາມເວົ້າລວມ ແລະ ຂອງນະຄອນໂຮ່ຈິມິນເວົ້າສະເພາະ ຊຶ່ງໄດ້ບັນລຸບັນດາໝາກຜົນທີ່ດີງາມໃນທຸກຂົງເຂດ, ປະກອບສ່ວນເພີ່ມທະວີສາຍພົວພັນສາມັກຄີມິດຕະພາບ, ຍູ້ແຮງການສົ່ງເສີມການຄ້າ, ການລົງທຶນ, ການທ່ອງທ່ຽວ, ວັດທະນະທຳສັງຄົມ.....
ກ່າວຄຳເຫັນທີ່ການພົບປະ, ທ່ານ Anatoni Borovik ຫົວໜ້າກົງສູນໃຫຍ່ແຫ່ງ ສ. ລັດເຊຍປະຈຳຫວຽດນາມເນັ້ນໜັກວ່າ :
“ ປີ 2013 ໄດ້ຮັບຖືວ່າ ແມ່ນປິທີ່ນະຄອນໂຮ່ຈິມິນປະສັບຜົນສຳເລັດດ້ວຍບັນດາໝາກຜົນເປັນໜ້າຊື່ນຊົມໃນຂົງເຂດຕ່າງໆ. ດັດຊະນີການເຕີບໂຕຄິດສະເລ່ຍເພີ່ມຂຶ້ນເກືອບທົບ 2 ເທົ່າເມື່ອທຽບໃສ່ທົ່ວປະເທດ. ໃນນາມຜູ້ຕາງໜ້າຄະນະຜູ້ແທນກົງສູນ, ຂ້າພະເຈົ້າຢັ້ງຢືນ ແລະ ເຄົາລົບຕໍ່ການໜູນຊ່ວຍຢ່າງຕັ້ງໜ້າຂອງການນຳນະຄອນໃນການຮັກສາ ແລະ ພັດທະນາການພົວພັນຮ່ວມມືກັບບັນດາຄູ່ຮ່ວມມືຕ່າງປະເທດ, ປະກອບສ່ວນປັບປຸງນ້ຳໃຈມິດຕະພາບ ແລະ ຄວາມເຂົ້າໃຈຊຶ່ງກັນ ແລະ ກັນລະຫວ່າງປະຊາຊົນບັນດາປະເທດ” .