ການນຳພັກ, ລັດເຂົ້າຮ່ວມງານໂຮມຊຸມນຸມມິດຕິງ
(ພາບປະກອບ:ອິນເຕີແນັດ)
( vovworld ) – ງານໂຮມຊຸມນຸມມິດຕິງສະເຫຼີມສະຫຼອງ 65 ປີແຫ່ງວັນທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດ (27/7/1947-27/7/2012) ໄດ້ຖືກຈັດຂຶ້ນຢ່າງສົມກຽດໃນຕອນເຊົ້າວັນທີ 27/7 ຢູ່ຮ່າໂນ້ຍ ໂດຍມີການ ເຂົ້າຮ່ວມທ່ານເລຂາທິການໃຫ່ຍ Nguyen Phu Trong, ອະດີດເລຂາທິການໃຫ່ຍ Le Kha Phieu, ອະດີດປະທານປະເທດ Tran Duc Luong, ທ່ານນາຍົກລັດຖະມົນຕີ Nguyen Tan Dung, ທ່ານປະທານສະພາແຫ່ງຊາດ Nguyen Sinh Hung….ພ້ອມດ້ວຍບັນດາຜູ້ຕາງໜ້າທະຫານເສຍອົງຄະ, ທະຫານເຈັບປ່ວຍ, ຄອບຄົວນັກຮົບເສຍສະຫຼະຊີວິດເພື່ອຊາດ, ແມ່ຫວຽດນາມວິລະຊົນ ຜູ້ຕາງໜ້າປະຊາຊົນທຸກຊັ້ນວັນນະນັບພັນໆຄົນ….
ກ່າວຄຳເຫັນທີ່ງານໂຮມຊຸມນຸມມິດຕິງ, ທ່ານນາຍົກລັດຖະມົນຕີ Nguyen Tan Dung ໄດ້ຫວນຄືນມູນເຊື້ອການຕໍ່ສູ້ຢ່າງພິລາດອາດຫານເພື່ອປົກປັກຮັກສາປະເທດຊາດຂອງປະຊາຊົນຫວຽດນາມ, ທ່ານເນັ້ນໜັກວ່າ:
“ບັນດາການເສຍສະຫຼະ, ຄຸນງາມຄວາມດີອັນໃຫ່ຍຫຼວງນີ້ ໄດ້ເຮັດໃຫ້ຊາດຫວຽດນາມມີຄວາມສະຫງ່າລາສີ, ເຂົາເຈົ້າເສຍສະຫຼະຊີວິດເພື່ອການຄົງຕົວ ແລະ ຂະຫຍາຍຕົວຂອງປະເທດຊາດ. ເລືອດເນື້ອຂອງບັນດານັກຮົບເສຍສະຫຼະຊີວິດເພື່ອຊາດໄດ້ເຮັດໃຫ້ຜືນທຸງປະຕິວັດແດງເຮື່ອຂຶ້ນຕື່ມ, ການເສຍສະຫຼະຊີວິດຢ່າງອົງອາດກ້າຫານຂອງບັນດານັກຮົບແມ່ນເພື່ອຄວາມເປັນເອກະລາດ, ເສລີພາບຂອງປະເທດຊາດ. ປະຊາຊົນຫວຽດນາມ ຈະຈາລຶກບຸນຄຸນຂອງບັນດານັກຮົບວິລະຊົນ, ເສຍສະຫຼະຊີວິດເພື່ອຊາດຕະຫຼອດໄປ“.
(ພາບ:vinhcity.gov.vn)
ທ່ານນາຍົກລັດຖະມົນຕີ Nguyen Tan Dung ຢືນຢັນວ່າ, ວັນທະຫານເສຍອົງຄະ, ນັກຮົບເສຍສະຫຼະຊີວິດເພື່ອຊາດ ແມ່ນມູນເຊື້ອຫຼັກສິນທຳ “ກິນເຂົ້າຄິດຮອດຄຸນນາ, ກິນປາຄິດຮອດຄຸນນ້ຳ“ ຂອງຊາດຫວຽດນາມ ແລະ ຮຽກຮ້ອງວ່າ:
“ບັນດາຂັ້ນ, ຂະແໜງການ, ຫົວໜ່ວຍຕ່າງໆຕ້ອງສືບຕໍ່ຈັດຕັ້ງປະຕິບັດລັດຖະບັນຍັດໃຫ້ບຸລິມະສິດຜູ້ມີຄຸນງາມຄວາມດີຕໍ່ການປະຕິວັດ ແລະ ບັນດານະໂຍບາຍບຸລິມະສິດທີ່ກ່ຽວຂ້ອງໃຫ້ເປັນຢ່າງດີ. ພິເສດແມ່ນເອົາໃຈໃສ່ເຖິງວຽກງານສຶກສາອົບຮົມ, ສອນວິຊາຊີບ, ສ້າງວຽກເຮັດງານທຳໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດ ແລະ ຍາດຕິພີ່ນອ້ງຂອງເຂົາເຈົ້າ: ສູ້ຊົນຮອດທ້າຍປີ 2013 ຈະໜູນຊ່ວຍແກ້ໄຂດ້ານເຮືອນຢູ່ໃຫ້ແກ່ຜູ້ມີຄຸນງາມຄວາມດີຕໍ່ການປະຕິວັດທີ່ພວມປະສົບກັບຄວາມຫຍຸ້ງຍາກດ້ານເຮືອນຢູ່ໃນຂັ້ນພື້ນຖານ, ພ້ອມທັງສືບຕໍ່ເພີ່ມເຕີມສຳເລັດນະໂຍບາຍໃຫ້ບຸລິມະສິດໃຫ້ນັບມື້ນັບດີກ່ວາ, ສອດຄ່ອງກັບສະພາບການພັດທະນາເສດຖະກິດສັງຄົມຂອງປະເທດຊາດ……“