ຕອນຄ່ຳວັນທີ 27/12, ຢູ່ ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ໄປຢ້ຽມຢາມວິທະຍຸກະຈາຍສຽງຫວຽດນາມ. ນີ້ແມ່ນຄວາມເປັນກຽດທີ່ໃຫຍ່ຫຼວງຂອງການນຳ, ນັກຂ່າວ, ພາລະກອນ, ນັກເຕັກນິກຂອງວິທະຍຸກະຈາຍສຽງຫວຽດນາມ ກ່ອນທີ່ກ້າວເຂົ້າສູ່ປີໃໝ່, ເຊິ່ງແມ່ນປີທີ່ລັດຖະບານເລືອກເຝັ້ນເປັນປີແຫ່ງຄວາມປອດໄພທາງຄົມມະນາຄົມແຫ່ງຊາດ. ໃນນັ້ນຊ່ອງ VOV ຄົມມະນາຄົມເວົ້າສະເພາະ ແລະ ວິທະຍຸກະຈາຍສຽງຫວຽດນາມເວົ້າລວມ ພວມມີການປະກອບສ່ວນຢ່າງຕັ້ງໜ້າ ໃນການຫຼຸດຜ່ອນສະພາບລົດຕິດ ແລະຮັບປະກັນຄວາມເປັນລະບຽບຮຽບຮ້ອຍ ຮັບປະກັນຄວາມປອດໄພທາງຄົມມະນາຄົມ. ກ່າວຄວາມເຫັນທາງຊ່ອງ VOV ຄົມມະນາຄົມ ຂອງວິທະຍຸກະຈາຍສຽງຫວຽດນາມ, ທ່ານນາຍົກໆ ຫງວຽນເຕິ໋ນຢຸງ ເນັ້ນໜັກວ່າ: ລັດຖະບານໄດ້ຖືປີ 2012 ແມ່ນ ”ປີແຫ່ງຄວາມປອດໄພທາງຄົມມະນາຄົມ”, ວາງບັນດາມາດຕະການລວມສູນໃນການຊີ້ນຳປະຕິບັດຢ່າງຂ້ຽວຂາດ ເພື່ອແນໃສ່ສ້າງຄວາມເປັນລະບຽບຮຽບຮ້ອຍ, ຮັບປະກັນຄວາມປອດໄພທາງຄົມມະນາຄົມໃນທົ່ວປະເທດ ແລະ ຫຼຸດຜ່ອນສະພາບລົດຕິດຢູ່ບັນດານະຄອນໃຫຍ່.
ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ຍ້ອງຍໍຊົມເຊີຍບັນດາຄວາມມານະພະຍາຍາມ ແລະ ຜົນງານທີ່ສຳຄັນ ເຊິ່ງ ວິທະຍຸກະຈາຍສຽງຫວຽດນາມ ບັນລຸໄດ້ໃນປີຜ່ານມາ, ພິເສດແມ່ນເລື່ອງຜັນຂະຫຍາຍການສ້າງຊ່ອງ VOV ຄົມມະນາຄົມ ຢູ່ ຮ່າໂນ້ຍ ແລະ ນະຄອນ ໂຮ່ຈີມິນ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ເນັ້ນໜັກວ່າ:
”ຂ້າພະເຈົ້າຮຽກຮ້ອງໃຫ້ວິທະຍຸກະຈາຍສຽງຫວຽດນາມ ຮີບເຮັ່ງສ້າງສຳເລັດບັນດາລະບຽບການອັນຈຳເປັນ ເພື່ອຜັນຂະຫຍາຍໂຄງການ VOV ຄົມມະນາຄົມ ໂດຍໄວ, ໃຫ້ກາຍເປັນຊ່ອງສະໜອງຂໍ້ມູນຂ່າວທີ່ມີປະໂຫຍດ, ປະກອບສ່ວນຕັ້ງໜ້າເຂົ້າໃນການຮັບປະກັນຄວາມເປັນລະບຽບຮຽບຮ້ອຍ, ຄວາມປອດໄພທາງຄົມມະນາຄົມໃນທົ່ວປະເທດ”.
ເນື່ອງໃນໂອກາດກ້າວເຂົ້າສູ່ປີໃໝ່, ທ່ານໄດ້ຝາກຄຳຢື້ຢາມຖາມຂ່າວອັນສະໜິດສະໜົມ ແລະ ຄຳອວຍພອນທີ່ດີທີ່ສຸດເຖິງປະຊາຊົນ, ທະຫານ, ຕຳຫຼວດ, ທ່ານຜູ້ຟັງວິທະຍຸກະຈາຍສຽງຫວຽດນາມ ພ້ອມກັບພະນັກງານ, ນັກຂ່າວ, ນັກສິລະປິນ ທຸກຄົນຂອງວິທະຍຸກະຈາຍສຽງຫວຽດນາມ. ກໍ່ຄືອວຍພອນວິທະຍຸກະຈາຍສຽງຫວຽດນາມສືບຕໍ່ພັດທະນາ, ຍາດໄດ້ຜົນງານອັນໃຫຍ່ຫຼວງຫຼາຍຢ່າງກວ່າອີກ, ສົມກັບຄວາມໄວ້ເນື້ອເຊື່ອໃຈ ແລະຄວາມຮັກຂອງພັກ ແລະ ປະຊາຊົນທົ່ວປະເທດ.