ທ່ານນາຍົກລັດຖະມົນຕີ ອີຕາລີ MatteoRenzi ເລີ່ມຕົ້ນການຢ້ຽມຢາມຫວຽດນາມຢ່າງເປັນທາງການ
ທ່ານນາຍົກລັດຖະມົນຕີ ອີຕາລີ Matteo Renzi
(ພາບ:AFP/TTXVN)
(vovworld) – ໂດຍໄດ້ຮັບຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນເຕີ໋ນຢູ້ງ, ທ່ານນາຍົກລັດຖະມົນຕີ ອີຕາລີ Matteo Renzi ເດີນທາງມາຢ້ຽມຢາມ ຫວຽດນາມ ຢ່າງເປັນທາງການນັບແຕ່ວັນທີ 9 – 10/6/2014. ການຢ້ຽມຢາມ ຫວຽດນາມ ຂອງທ່ານນາຍົກລັດຖະມົນຕີ ອີຕາລີ Matteo Renzi ປະກອບສ່ວນຊຸກຍູ້ສາຍພົວພັນຮ່ວມມືລະຫວ່າງສອງປະເທດໃນທຸກຂົງເຂດ, ເປັນຕົ້ນແມ່ນດ້ານການເມືອງ, ເສດຖະກິດ, ການຄ້າ.
ບັນດາໜັງສືພິມສຳຄັນຂອງ ຫວຽດນາມສະບັບອອກວັນທີ 9/6 ໄດ້ລົງພິມຂ່າວ, ບົດຕ່າງໆກ່ຽວກັບການຢ້ຽມຢາມ ຫວຽດນາມ ຂອງທ່ານນາຍົກລັດຖະມົນຕີ ອີຕາລີ Matteo Renzi. ບົດນຳທີ່ມີຫົວຂໍ້ວ່າ “ ນຳສາຍພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ ຂຶ້ນສູ່ລະດັບສູງໃໝ່” ຂອງໜັງສືພິມ ເຍີນເຢີນ (ສຽງຂອງພັກກອມມູນິດ ຫວຽດນາມ) ຢືນຢັນການຢ້ຽມຢາມ ຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີ Matteo Renzi ແມ່ນໂອກາດເພື່ອໃຫ້ສອງຝ່າຍແລກປ່ຽນບັນດາມາດຕະການຊຸກຍູ້ການພົວພັນຄູ່ຮ່ວມມືຍຸດທະສາດສອງປະເທດໃນຂົງເຂດເສດຖະກິດ, ການຄ້າ, ການລົງທຶນ. ໜັງສືພິມ ກວນໂດ້ຍເຍີນເຢີນ (ສຽງຂອງກອງທັບປະຊາຊົນ ຫວຽດນາມ) ມີບົດນຳ “ ຍູ້ແຮງການຮ່ວມມືຢ່າງແທດຈິງໃນຂອບເຂດການພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ”. ບົດນຳຖືວ່າການຢ້ຽມຢາມ ຫວຽດນາມ ຂອງທ່ານນາຍົກລັດຖະມົນຕີ Matteo Renzi ໄດ້ເປີດຫຼາຍມາດຕະການຍູ້ແຮງການຮ່ວມມືຢ່າງແທດຈິງໃນທຸກຂົງເຂດໃນຂອບເຂດການພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ, ແນໃສ່ຂຸດຄົ້ນຄວາມສາມາດບົ່ມຊອ້ນສອງຝ່າຍຢ່າງສູງສຸດ.
ເນື່ອງໃນໂອກາດນີ້, ວິທະຍຸກະຈາຍສຽງ ຫວຽດນາມ ສົ່ງເຖີງທ່ານຜູ້ຟັງບົດຂຽນກ່ຽວກັບ “ ສາຍພົວພັນຮ່ວມມື ຫວຽດນາມ - ອີຕາລີ”. ເຊີນທ່ານຕິດຕາມຮັບຟັງພາຍຫຼັງພາກຂ່າວນີ້…