ນາຍົກລັດຖະມົນຕີຫງວຽນເຕີນຢູ້ງເຂົ້າຮ່ວມພິທີສະຫຼອງກອງທຶນປ່ຽນໃໝ່ເຕັກໂນໂລຢີແຫ່ງຊາດ
ນາຍົກລັດຖະມົນຕີຫງວຽນເຕີນຢູ້ງເຂົ້າຮ່ວມພິທີສະຫຼອງກອງທຶນປ່ຽນໃໝ່
ເຕັກໂນໂລຢີແຫ່ງຊາດ
(ພາບ: VGP/Nhật Bắc)
|
(vovworld) – ຕອນບ່າຍວັນທີ 8/1, ກະຊວງວິທະຍາສາດ ແລະ ເຕັກໂນໂລຢີ ຈັດຕັ້ງພິທີເປີດສະຫຼອງກອງທຶນປ່ຽນໃໝ່ເຕັກໂນໂລຢີແຫ່ງຊາດ. ເລື່ອງສ້າງຕັ້ງກອງທຶນປ່ຽນໃໝ່ເຕັກໂນໂລຢີແຫ່ງຊາດສະແດງໃຫ້ເຫັນຄວາມຕັດສິນໃຈຂອງລັດຖະບານເພື່ອແນໃສ່ຍົກສູງຄຸນນະພາບການເຕີບໂຕຂອງພື້ນຖານເສດຖະກິດ, ປ່ຽນໃໝ່ຮູບແບບການເຕີບໂຕຕາມທິດຖືວິທະຍາສາດເຕັກໂນໂລຢີ ແລະ ການເຄື່ອນໄຫວປ່ຽນໃໝ່ຢ່າງມີຫົວຄິດປະດິດສ້າງເປັນພື້ນຖານ, ສ້າງກຳລັງໜູນໃຫ້ແກ່ການພັດທະນາແບບຍືນຍົງຂອງປະເທດຊາດ.
ກ່າວຄຳເຫັນທີ່ພິທີ, ທ່ານນາຍົກລັດຖະມົນຕີ ຫງວຽນເຕີນຢູ້ງ ຕີລາຄາສູງຄວາມມານະພະຍາຍາມຂອງກະຊວງວິທະຍາສາດ ແລະ ເຕັກໂນໂລຢີ ທີ່ໄດ້ແກ້ໄຂຄວາມຫຍຸ້ງຍາກຫຼາຍຢ່າງເພື່ອກໍ່ສ້າງ ແລະ ສ້າງຕັ້ງກອງທຶນປ່ຽນໃໝ່ເຕັກໂລໂນຢີແຫ່ງຊາດ ແນໃສ່ຍູ້ແຮງການປ່ຽນໃໝ່ເຕັກໂນໂລຢີຂອງປະເທດຊາດຜ່ານການໜູນຊ່ວຍໃຫ້ບັນດາອົງການ, ວິສາຫະກິດ, ບຸກຄົນ. ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ:
“ປ່ຽນໃໝ່ເຕັກໂນໂລຢີແມ່ນມາດຕະການມີຄວາມໝາຍຕັດສິນຊີ້ຂາດເພື່ອໃຫ້ວິສາຫະກິດ ຫວຽດນາມ ຍົກສູງກຳລັງແກ່ງແຍ້ງ, ປ່ຽນໃໝ່ເຕັກໂນໂລຢີເພື່ອມີຜະລິດຕະພັນໃໝ່, ບໍລິການໃໝ່ທີ່ມີສະມັດຕະພາບສູງ, ມີປະສິດທິຜົນສູງເພື່ອຍົກສູງກຳລັງແກ່ງແຍ້ງ. ຍົກສູງກຳລັງແກ່ງແຍ້ງຂອງຜະລິດຕະພັນ, ຂອງການບໍລິການ, ຍົກສູງກຳລັງແກ່ງແຍ້ງຂອງວິສາຫະກິດກໍ່ແມ່ນຍົກສູງກຳລັງແກ່ງແຍ້ງແຫ່ງຊາດ, ຕອບສະໜອງຄຳຮຽກຮ້ອງກໍ່ສ້າງ, ພັດທະນາ ແລະ ປົກປັກຮັກສາປະເທດຊາດ. ພວກເຮົາພວມດຳລົງຊີວິດໃນໄລຍະໂລກາພິວັດ ແລະ ການແກ່ງແຍ້ງຢ່າງຂ້ຽວຂາດເພື່ອພັດທະນາ. ປະເທດໃດນຳໃຊ້ວິທະຍາສາດ ເຕັກໂນໂລຢີໃໝ່ໄວ ແລະ ດີເພື່ອຍົກສູງສະມັດຕະພາບ, ຄຸນນະພາບປະສິດທິຜົນຂອງຜະລິດຕະພັນ, ຂອງການບໍລິການ ປະເທດນັ້ນຈະພັດທະນາໄວ ແລະ ໝັ້ນຄົງເຂັ້ມແຂງ.”