(vovworld) - ຕອນເຊົ້າວັນທີ 26/9, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ໃຫ້ການຕ້ອນຮັບທ່ານພົນເອກ ສຸກຳພົນ ສຸວັນນະທັດ, ລັດຖະມົນຕີປ້ອງກັນປະເທດໄທ ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທ່ານນາຍົກລັດຖະມົນຕີ Nguyen Tan Dung ໄດ້ຢືນຢັນວ່າ ຫວຽດນາມ ຈະມານະພະຍາຍາມຈົນສຸດຄວາມສາມາດຂອງຕົນ ເພື່ອພ້ອມກັບໄທ ສືບຕໍ່ພັດທະນາ, ຍົກການພົວພັນຮ່ວມມືຂອງສອງປະເທດຂຶ້ນສູ່ລະດັບສູງໃໝ່. ທ່ານນາຍົກລັດຖະມົນຕີ Nguyen Tan Dung ສະເໜີໃຫ້ກະຊວງປ້ອງກັນປະເທດ ຂອງສອງປະເທດຈົ່ງຜັນຂະຫຍາຍປະຕິບັດບັນດາການເຄື່ອນໄຫວຮ່ວມມືດ້ານປ້ອງກັນປະເທດ ເຊິ່ງສອງປະເທດໄດ້ເປັນເອກະພາບນຳກັນຢ່າງມີປະສິດທິຜົນ, ພິເສດແມ່ນການຮ່ວມມືລາດຕະເວນຮ່ວມບົ່ນທະເລ. ທ່ານພົນເອກ ສຸກຳພົນ ສຸວັນນະທັດ ກໍຢືນຢັນວ່າ ກະຊວງປ້ອງກັນປະເທດໄທ ຈະສົມທົບກັບກະຊວງປ້ອງກັນຊາດຫວຽດນາມ ຢ່າງແໜ້ນແຟ້ນ ເພື່ອແນໃສ່ຜັນຂະຫຍາຍບັນດາຂໍ້ຕົກລົງຮ່ວມມືດ້ານປ້ອງກັນຊາດ ເຊິ່ງສອງປະເທດໄດ້ເປັນເອກະພາບນຳກັນຢ່າງກວ້າງຂວາງ ແລະ ມີປະສິດທິຜົນ, ຕັ້ງໜ້າປະກອບສ່ວນຊຸກຍູ້ການພົວພັນຮ່ວມມືລວມລະຫວ່າງສອງປະເທດໃນທຸກຂົງເຂດ.
ແລະໃນຕອນເຊົ້າວັນດຽວກັນ, ພິທີ່ຕ້ອນຮັບທ່ານພົນເອກ ສຸກຳພົນ ສຸວັນນະທັດ ແລະ ຄະນະຜູ້ແທນກະຊວງປ້ອງກັນປະເທດແຫ່ງລາຊະອານາຈັກໄທ ທີ່ມາຢ້ຽມຢາມຫວຽດນາມ ຢ່າງເປັນທາງການ ຕາມຄຳເຊີນຂອງທ່ານພົນເອກ Phung Quang Thanh, ລັດຖະມົນຕີປ້ອງກັນປະເທດຫວຽດນາມ, ເຊິ່ງໄດ້ຈັດຂຶ້ນຢູ່ສຳນັກງານກະຊວງປ້ອງກັນປະເທດ. ພາຍຫຼັງພິທີຕ້ອນຮັບ, ຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ໂດຍທ່ານພົນເອກ Phung Quang Thanh ເປັນຫົວໜ້າຄະນະ ໄດ້ມີການເຈລະຈາກັບຄະນະຜູ້ແທນກະຊວງປ້ອງກັນປະເທດແຫ່ງລາຊະອານາຈັກໄທ ໂດຍທ່ານພົນເອກ ສຸກຳພົນ ສຸວັນນະທັດ ເປັນຫົວນ້າຄະນະ. ສອງຝ່າຍໄດ້ແຈ້ງໃຫ້ຊາບກ່ຽວກັບສະພາບການພັດທະນາເສດຖະກິດສັງຄົມຂອງແຕ່ລະປະເທດ; ຕີລາຄາໝາກຜົນຂອງການຮ່ວມມືລະຫວ່າງສອງກະຊວງປ້ອງກັນປະເທດໃນໄລຍະຜ່ານມາ. ພາຍຫຼັງການເຈລະຈາ, ລັດຖະມົນຕີສອງທ່ານ ໄດ້ລົງນາມກ່ຽວກັບສັນຍາຮ່ວມມືລະຫວ່າງກະຊວງປ້ອງກັນປະເທດ ສ.ສ ຫວຽດນາມ ແລະ ກະຊວງປ້ອງກັນປະເທດແຫ່ງລາຊະອານາຈັກໄທ. ຂໍ້ຕົກລົງຮ່ວມມືນີ້ແມ່ນພື້ນຖານນິຕິກຳ ເພື່ອຊຸກຍູ້ການພົວພັນຮ່ວມມືດ້ານປ້ອງກັນຊາດສອງຝ່າຍໃນບາງຂົງເຂດໃຫ້ດີກວ່າອີກຄື; ການເຈລະຈາປ້ອງກັນຊາດ, ບຳລຸງສ້າງ, ລາດຕະເວນຮ່ວມບົ່ນທະເລ, ຮັບມືກັບສິ່ງທ້າທາຍຕໍ່ຄວາມສະຫງົບທີ່ບໍ່ເຄີຍມີມາ, ພັດທະນາແຫຼ່ງກຳລັງ… ເພື່ອແນໃສ່ເພີ່ມທະວີການພົວພັນມິດຕະພາບ, ຄວາມເຂົ້າໃຈ ຄວາມໄວ້ເນື້ອເຊື່ອໃຈ, ເພື່ອສັນຕິພາບ, ສະຖຽນລະພາບ, ພັດທະນາຢ່າງວັດທະນາຖາວອນໃນພາກພື້ນ.