ສະຫະພັນ ອາຮັບ ຢາກສ້າງຕັ້ງກຳລັງຮັກສາສັນຕິພາບຢູ່ ຊີຣີ
ສະພາບການຢູ່ປະເທດ ຊີຣີ
(ພາບ: quocphong.baodatviet.vn)
( vovworld ) – ກອງປະຊຸມລັດຖະມົນຕີການຕ່າງປະເທດບັນດາປະເທດສະຫະພັນ ອາຣັບ ຫລື AL ທີ່ດຳເນີນໄປໃນວັນທີ 12/2 ຢູ່ນະຄອນຫຼວງ ກາຍໂຮ ປະເທດ ອີຢີບ ເພື່ອແນໃສ່ສືບຕໍ່ຊອກຫາບັນດາມາດຕະການໃຫ້ແກ່ບັນຫາ ຊີຣີ ໄດ້ອັດລົງແຕ່ເກືອບຄືວ່າ ບໍ່ມີມາດຕະການລະອຽດໃດໆໄດ້ຮັບການຮັບຮອງເອົາ. ທີ່ກອງປະຊຸມ, ລັດຖະມົນຕີການຕ່າງປະເທດຂອງປະເທດເຂດອ່າວ ເປີເຊຍ ຈຳນວນໜື່ງ ໄດ້ສະເໜີໃຫ້ AL ຮັບຮູ້ສະພາປົກຄອງໄລຍະຂ້າມຜ່ານແຫ່ງຊາດ ຊີຣີ ຫລື NTC ຊື່ງແມ່ນກຸ່ມລຸກຮື້ຂື້ນຕ້ານລັດຖະບານຂອງທ່ານ Al Atxat ເປັນນຜູ້ຕາງໜ້າອັນຊອບທຳໃຫ້ແກ່ປະຊາຊົນ ຊີຮີ. ແຕ່ຂໍ້ສະເໜີນີ້ ບໍ່ໄດ້ຮັບການຮັບຮູ້ຈາກບັນດາປະເທດໃນກຸ່ມ, ຍ້ອນບັນດາຄວາມບໍ່ລົງລອຍກັນ ກ່ຽວກັບບັນດາບ້ວງເງິນກູ້ຢືມໂດຍກົງ ແລະການໜູນຊ່ວຍດ້ານການທະຫານ ສຳລັບບັນດາກຸ່ມປະກອບອາວຸດຕ້ານລັດຖະບານຂອງທ່ານ Al Atxat . ກ່ອນໜ້ານັ້ນ, ລັດຖະມົນຕີການຕ່າງປະເທດບັນດາປະເທດສະຫະພັນ ອາຣັບ ໄດ້ເຫັນດີເປັນເອກະສັນຮັບຮອງເອົາຄຳຮຽກຮ້ອງສະຫະປະຊາຊາດ ຜັນຂະຫຍາຍກຳລັງປົກປັກຮັກສາສັນຕິພາບລວມຢູ່ ຊີຣີ ແລະປະຊາຄົມໂລກ ດຳເນີນບັນດາການເຄື່ອນໄຫວໜູນຊ່ວຍຢ່າງຮີບດ່ວນ ໃຫ້ແກ່ສາມັນຊົນຂອງປະເທດນີ້. ແຕ່ສະຫະພັນ ອາຣັບ ກໍບໍ່ບັນລຸໄດ້ຄວາມເຫັນດີເຫັນພ້ອມ ໃນເລື່ອງຍົກອອກຮ່າງມະຕິສະບັບສຸດທ້າຍ ເພື່ອຊອກຫາການສະໜັບສະໜູນຂອງສະພາຄວາມໝັ້ນຄົງສະຫະປະຊາຊາດ.
ພາຍຫຼັງການປະຊຸມ, ລັດຖະມົນຕີການຕ່າງປະເທດບັນດາປະເທດສະມາຊິກຂອງສະຫະພັນ ອາຣັບ ຕົກລົງຈະຢຸດຕິພາລະກຳຕິດຕາມກວດກາຂອງສະຫະພັນ ອາຣັບ ຢູ່ ຊີຣີ ພ້ອມທັງຮຽກຮ້ອງໃຫ້ສະພາຄວາມໝັ້ນຄົງສະຫະປະຊາຊາດ ຈົ່ງສ້າງຕັ້ງກຳລັງປົກປັກຮັກສາສັນຕິພາບຮ່ວມ ເພື່ອຕິດຕາມກວດກາຄຳສັ່ງຢຸດຍິງ. ດ້ານອື່ນອີກ, ສະຫະພັນ ອາຣັບ ກໍຕົກລົງຈະພົວພັນກັບຝ່າຍຄ້ານຢູ່ ຊີຣີ ແລະຈະໜູນຊ່ວຍກຳລັງນີ້ທັງດ້ານການເມືອງ ແລະວັດຖຸ. AL ກໍຈະເພີ່ມທະວີບັນດາຄຳສັ່ງລົງໂທດດ້ານເສດຖະກິດກັບລັດຖະບານ ຊີຣີ ແລະຢືນຢັນການຢຸດການພົວພັນດ້ານການຄ້າກັບປະເທດນີ້ຄືນໃໝ່.
ນັກຂ່າວ VOV ປະຈຳ ອີຢີບ