ກອງປະຊຸມຄັ້ງທີ 6 ຄະນະກຳມະການລະຫວ່າງລັດຖະບານຫວຽດນາມ - ອັງໂກລາ
ພິທີເຊັນບົດບັນທຶກຊ່ວຍຈຳລະຫວ່າງ 2 ປະເທດ
(vovworld) – ວັນທີ 30/10, ຢູ່ຮ່າໂນ້ຍ ໄດ້ດຳເນີນກອງປະຊຸມຄັ້ງທີ 6, ຄະນະກຳມະການລະຫວ່າງລັດຖະບານຫວຽດນາມ - ອັງໂກລາ, ພາຍໃຕ້ການເປັນປະທານຮ່ວມຂອງລັດຖະມົນຕີສຶກສາບຳລຸງສ້າງ ຟ້າມຫວູລ້ວນ, ປະທານອະນຸກຳມະການຫວຽດນາມ ແລະ ທ່ານນາງລັດຖະມົນຕີສຶກສາມະຫາວິທະຍາໄລ ແລະ ວິທະຍາສາດເຕັກໂນໂລຢີ Maria Candida Teixeira, ປະທານອະນຸກຳມະການອັງໂກລາ. ທີ່ກອງປະຊຸມຄັ້ງນີ້, ສອງຝ່າຍຕີລາຄາໝາກຜົນການຮ່ວມມືສອງຝ່າຍໄລຍະ 2011 – 2013 ຕາມບົດບັນທຶກກອງປະຊຸມຄັ້ງທີ 5 ຂອງຄະນະກຳມະການລະຫວ່າງລັດຖະບານ, ກຳນົດທິດທາງຮ່ວມມືໄລຍະ 2013-2015. ໃນໄລຍະ 2013-2015, ສອງຝ່າຍເຫັນດີຊຸກຍູ້ການຮ່ວມມືໃນຫຼາຍຂົງເຂດ, ພິເສດແມ່ນສ້າງເງື່ອນໄຂສະດວກໃຫ້ວິສາຫະກິດສອງປະເທດພົບປະ, ຊອກຫາກາລະໂອກາດຮ່ວມມື ແລະ ລົງທຶນຢູ່ແຕ່ລະປະເທດ. ກ່ຽວກັບການສຶກສາ ແລະ ບຳລຸງສ້າງ, ສອງຝ່າຍເຫັນດີພັດທະນາ ແລະ ລະດົມແຫຼ່ງຊັບພະຍາກອນມະນຸດທັງໝົດຂອງສອງປະເທດເຂົ້າຮ່ວມບັນດາຊຸດບຳລຸງສ້າງລະດັບມະຫາວິທະຍາໄລ ແລະ ເໜືອມະຫາວິທະຍາໄລ, ເພີ່ມຈຳນວນຜູ້ຊ່ຽວຊານດ້ານການສຶກສາຫວຽດນາມ ຢູ່ບັນດາຮາກຖານສຶກສາມະຫາວິທະຍາໄລຕາມຄວາມຕ້ອງການຂອງອັງໂກລາ. ກ່ຽວກັບດ້ານສາທາລະນະສຸກ, ສອງຝ່າຍເຫັນດີເພີ່ມຈຳນວນຜູ້ຊ່ຽວຊານດ້ານການແພດຫວຽດນາມ ມາເຮັດວຽກຢູ່ອັງໂກລາ. ທັງສອງຝ່າຍກໍ່ເຫັນດີຊຸກຍູ້ການຮ່ວມມືໃນບັນດາຂົງເຂດກະສີກຳ, ສິນໃນນ້ຳ, ແຮງງານ, ທະຫານເສຍອົງຄະ ແລະ ສັງຄົມ. ພິເສດແມ່ນຍູ້ແຮງການຮ່ວມມືດ້ານແຮງງານ ເພື່ອກໍ່ສ້າງກົນໄກຮັບສະໝັກ, ຄຸ້ມຄອງຄົນງານຫວຽດນາມຢູ່ອັງໂກລາ.