ທ່ານຫວາງອີໃນການຢ້ຽມຢາມໄທ
(ພາບ:Reuters)
(vovworld) – ຈີນ ຖືການພົວພັນກັບບັນດາປະເທດໃນພາກພື້ນອາຊີຕາເວັນອອກສ່ຽງໃຕ້ເປັນສຳຄັນ ແລະ ຢາກຖືສະຫະສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ເປັນພາກພື້ນໄດ້ຮັບບຸລິມະສິດ, ສຳຄັນອັນດັບໜຶ່ງໃນນະໂຍບາຍການຕ່າງປະເທດຂອງຕົນ. ນີ້ແມ່ນຄຳຢືນຢັນຂອງທ່ານຫວາງອີ, ລັດຖະມົນຕີການຕ່າງປະເທດຈີນ ພາຍຫຼັງການໄປປະຕິບັດງານຢູ່ 4 ປະເທດໃນພາກພື້ນຄື: ໄທ, ອິນໂດເນເຊຍ, ສິງກະໂປ ແລະ ບຣູໄນ. ວັນທີ 5/5, ກ່າວຄຳເຫັນກັບວົງການນັກຂ່າວຢູ່ນະຄອນຫຼວງປັກກິງ, ລັດຖະມົນຕີການຕ່າງປະເທດຈີນ ຫວາງອີ ຊີ້ແຈງວ່າ: ຈີນ ເດັດດ່ຽວສະໜັບສະໜູນການພັດທະນາຢ່າງໃຫ່ຍໂຕເຂັ້ມແຂງຂອງອາຊຽນ, ສະໜັບສະໜູນອາຊຽນ ຊຸກຍູ້ວິວັດການສ້າງປະຊາຄົມລວມ. ຈີນ ຢາກປັບປຸງການພົວພັນຄູ່ຮ່ວມມືຍຸດທະສາດກັບອາຊຽນ, ຮ່ວມມືບົນທະເລ ແລະ ເປີດກ້ວາງການພົວພັນດ້ານເສດຖະກິດຍຸດທະສາດຮອບດ້ານ, ພ້ອມກັນປັບປຸງສັນຕິພາບ, ສະຖຽນລະພາບ ແລະ ຄວາມວັດທະນາຖາວອນຂອງພາກພື້ນ. ທ່ານຫວາງອີ ໃຫ້ຮູ້ວ່າ: ຈີນ ແລະ ອາຊຽນ ກໍ່ເຫັນດີເປັນເອກະສັນນຳກັນໃນວິວັດການປະຕິບັດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງມີປະສິດທິຜົນ ແລະ ຮອບດ້ານ.