ທ່ານ ຫງວຽນແຫ້ງຝຸກ, ຫົວໜ້າຫ້ອງວ່າການສະພາແຫ່ງຊາດ
(ພາບ: ອິນເຕີແນດ)
(vovworld) – ຕົ້ນອາທິດໜ້າ, ສະມາຊິກໃນລັດຖະບານ 4 ທ່ານ ຈະຕອບຄຳຊັກຖາມໃນສະພາແຫ່ງຊາດ, ນັ້ນແມ່ນທ່ານລັດຖະມົນຕີກະຊວງພາຍໃນ ຫງວຽນທ໋າຍບິ່ນ, ທ່ານລັດຖະມົນຕີກະຊວງກະສີກຳ ແລະ ພັດທະນາຊົນນະບົດ ກາວດຶກຟາດ, ທ່ານລັດຖະມົນຕີກະຊວງຖະແຫຼງຂ່າວ ແລະ ສື່ສານ ຫງວຽນບັກຊອນ, ທ່ານຫົວໜ້າສານປະຊາຊົນສູງສຸດ ເຈືອງຮ່ວາບິ່ນ. ຫຼັງຈາກນັ້ນ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ກໍ່ຈະຕອບຊັກຖາມບັນຫາຕ່າງໆ ເຊິ່ງບັນດາ ສສຊ ມີຄວາມສົນໃຈໂດຍກົງ. ຄາດວ່າວາລະຊັກຖາມຈະດຳເນີນໃນລະຫວ່າງວັນທີ 19-21/11.
ກ່ຽວກັບບັນຊີລາຍຊື່ຜູ້ຕອບຄຳຊັກຖາມ, ທ່ານ ຫງວຽນແຫ້ງຝຸກ, ຫົວໜ້າຫ້ອງວ່າການສະພາແຫ່ງຊາດ, ໃຫ້ຮູ້ວ່າ:
“ເມື່ອເລືອກເຝັ້ນບັນດາລັດຖະມົນຕີຕອບຄຳຊັກຖາມ ແມ່ນອີງບົນພື້ນຖານບັດຂໍຄວາມເຫັນຂອງບັນດາ ສສຊ. ທີສອງແມ່ນ ອີງຕາມບົດລາຍງານຂອງແນວໂຮມປະເທດຊາດກ່ຽວກັບບັນດາບັນຫາທີ່ຜູ້ມີສິດເລືອກຕັ້ງສົນໃຈ. ທີສາມແມ່ນໃຫ້ບຸລິມາສິດແກ່ບັນດາລັດຖະມົນຕີບໍ່ທັນມີໂອກາດຕອບຊັກຖາມນັບແຕ່ຕົ້ນອາຍຸການມາຮອດປະຈຸບັນ“.
ຕາມທ່ານ ຫງວຽນແຫ້ງຝຸກ ແລ້ວ, ວາລະຊັກຖາມຄັ້ງນີ້ມີການປ່ຽນໃໝ່ຫຼາຍຢ່າງ:
“ກ່ຽວກັບເວລາຊັກຖາມໃນຄັ້ງນີ້ແມ່ນ 3 ວັນ, ໃນນັ້ນມີວາລະໜຶ່ງຮອງນາຍົກລັດຖະມົນຕີຈະລາຍງານກ່ຽວກັບໝາກຜົນແຫ່ງການປະຕິບັດມະຕິຂອງສະພາແຫ່ງຊາດ ກ່ຽວກັບການຊັກຖາມ ແລະ ຕອບຄຳຊັກຖາມຢູ່ກອງປະຊຸມສະໄໝສາມັນເທື່ອທີ 3, ທີ 4 ແລະ ທີ 5. ຫຼັງຈາກນັ້ນ, ບັນດາ ສສຊ ຈະປຶກສາຫາລືຢູ່ຫໍປະຊຸມ“.
ກ່ຽວກັບເນື້ອໃນການຊັກຖາມ, ທ່ານ ຫງວຽນແຫ້ງຝຸກ ໃຫ້ຮູ້ວ່າ ມີຫຼາຍຄຳຖາມຂອງ ສສຊ ທີ່ກ່ຽວຂ້ອງເຖິງວຽກງານຄຸ້ມຄອງລັດກ່ຽວກັບສື່ສານ, ຂ່າວສານ, ສິ່ງທີ່ຍັງຄົງຄ້າງກ່ຽວກັບການຄຸ້ມຄອງອິນເຕີແນດ ແລະ ຮັບປະກັນຄວາມປອດໄພທາງອິນເຕີແນດ, ສະພາບການຕັດສິນລົງໂທດບໍ່ຖືກຕ້ອງຂອງສານ, ການຍົກສູງຄຸນນະພາບຖັນແຖວພະນັກງານຂະແໜງສານ, ບັນຫາເສດຖະກິດ - ສັງຄົມ...