(vovworld) - ພິທີຕ້ອນຮັບປະທານາທິບໍດີອັກຊັງຕີນ Cristina Fernandez de Kirchner ໄດ້ດຳເນີນໄປໃນວັນທີ 21/01, ຢູ່ຮ່າໂນ້ຍ. ພາຍຫຼັງພິທີຕ້ອນຮັບ, ທ່ານປະທານາທິບໍດີອັກຊັງຕີນ Cristina Fernandez de Kirchner ໄດ້ມີການເຈລະຈາກັບທ່ານປະທານປະເທດຫວຽດນາມ ເຈືອງເຕີນຊາງ; ພົບປະເຈລະຈາກັບທ່ານນາຍົກລັດຖະມົນຕີ ຫງວຽນເຕີນຢຸງ ແລະ ທ່ານປະທານສະພາແຫ່ງຊາດຫງວຽນຊິງຮຸ່ງ. ກ່ອນໜ້ານັ້ນ, ວັນທີ 19/01, ຢູ່ນະຄອນ ໂຮ່ຈິມິນ, ທ່ານປະທານາທິບໍດີອັກຊັງຕີນ ໄດ້ໄປຢ້ຽມຢາມນະຄອນໂຮ່ຈິມິນ ແລະ ມີການເຮັດວຽກກັບທ່ານປະທານຄະນະກຳມະການປະຊາຊົນນະຄອນໂຮ່ຈິມິນ ເລຮ່ວາງກວນ.
ປະທານາທິບໍດີອັກຊັງຕີນ ຢ້ຽມຢາມຫວຽດນາມ ຢ່າງເປັນທາງການ ໃນລະຫວ່າງວັນທີ 18 – 21/01, ຕາມຄຳເຊີນຂອງທ່ານປະທານປະເທດເຈືອງເຕີນຊາງ. ການຢ້ຽມຢາມຂອງທ່ານປະທານາທິບໍດີອັກຊັງຕີນ ຈະສ້າງບາດກ້າວພັດທະນາໃໝ່ໃນການພົວພັນລະຫວ່າງ 2 ປະເທດ.
ເນື່ອງໃນໂອກາດນີ້, ບັນດາໜັງສືພິມໃຫຍ່ຂອງຫວຽດນາມ ສະບັບອອກວັນທີ 21/01 ມີຫຼາຍບົດກ່ຽວກັບການພົວພັນຮ່ວມມືລະຫວ່າງ 2 ປະເທດ ຫວຽດນາມ - ອັກຊັງຕີນ. ບົດນຳຂອງໜັງສືພິມເຍິນເຢີນ (ປະຊາຊົນ) ທີ່ມີຫົວຂໍ້ວ່າ “ເພີ່ມທະວີການພົວພັນຮ່ວມມືຮອບດ້ານລະຫວ່າງຫວຽດນາມ - ອັກຊັງຕີນ” ໄດ້ຊີ້ແຈ້ງວ່າ ນັບແຕ່ 2 ປະເທດສ້າງຕັ້ງການພົວພັນທາງການທູດເມື່ອເດືອນ 10/1973, ການພົວພັນຮ່ວມມືມິດຕະພາບລະຫວ່າງ 2 ປະເທດໄດ້ຮັບການພັດທະອັນດີງາມ. ຖະແຫຼງການຮ່ວມລະຫວ່າງຫວຽດນາມ - ອັກຊັງຕີນ ໃນການຢ້ຽມຢາມ ອັກຊັງຕີນຂອງທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຢືນຢັນວ່າ ການພົວພັນຂອງ 2 ປະເທດໃນໄລຍະມໍ່ໆມານີ້ ໄດ້ມີບາດກ້າວພັດທະນາຢ່າງວ່ອງໄວໃນທຸກຂົງເຂດ ແລະ ບັນລຸລະດັບຍຸດທະສາດ. ອັກຊັງຕີນ ແລະ ຫວຽດນາມ ໄດ້ມີຫຼັກໝັ້ນທີ່ຄ້າຍຄືກັນ, ໄດ້ແບ່ງປັນ ແລະ ສະໜັບສະໜູນບັນດາທັດສະນະນຳກັນກ່ຽວກັບບັນດາບັນຫາສາກົນຢູ່ທີ່ເວທີປາໄສຫຼາຍຝ່າຍ ແລະ ອົງການຈັດຕັ້ງສາກົນຕ່າງໆ.
ບົດນຳດ້ວຍຫົວຂໍ້ວ່າ “ບາດກ້າວພັດທະນາໃໝ່ໃນການພົວພັນຮ່ວມມືລະຫວ່າງຫວຽດນາມ - ອັກຊັງຕີນ” ຂອງໜັງສືພິມ ກວນດ້ວຍເຢີນຢີນ (ກອງທັບປະຊາຊົນ) ໄດ້ເນັ້ນໜັກວ່າ ການພົວພັນຮ່ວມມືລະຫວ່າງຫວຽດນາມ - ອັກຊັງຕີນ ໄດ້ຮັບການພັດທະນາຈະນຳມາເຊິ່ງຜົນປະໂຫຍດໃຫ້ທັງ 2 ປະເທດ ກໍຄືທັງ 2 ພາກພື້ນ. ອັກຊັງຕີນ ຈະແມ່ນຂົວເຊື່ອມຕໍ່ເພື່ອໃຫ້ຫວຽດນາມ ມີສາຍພົວພັນກັບບັນດາປະເທດສະມາຊິກກຸ່ມຕະຫຼາດລວມ ອາຟະລິກາໃຕ້ ໃນຂະນະທີ່ຫວຽດນາມ ເປັນຂົວເຊື່ອມຕໍ່ລະຫວ່າງອັກຊັງຕີນ ກັບອາຊຽນ.