ປະທານຄະນະກຳມະການສູນກາງແນວໂຮມປະເທດຊາດຫວຽດນາມພົບປະກັບ
ຊາວຫວຽດນາມອາໄສຢູ່ຕ່າງປະເທດ
(ພາບ: baomoi.com)
|
(vovworld) - ຕອນບ່າຍວັນທີ 25/1, ຢູ່ນະຄອນ ໂຮ່ຈີມິນ, ທ່ານປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຫງວຽນທ້ຽນເຍີນ ໄດ້ພົບປະ, ແລກປ່ຽນກັບພໍ່ແມ່ປະຊາຊົນຊາວ ຫວຽດນາມ ອາໄສຢູ່ຕ່າງປະເທດຜູ້ທີ່ດີເດັ່ນ, ເຊິ່ງແມ່ນກຳມະການຄະນະກຳມະການສູນກາງແນວໂຮມປະເທດຊາດ ຫວຽດນາມ ຊຸດທີ 8. ທີ່ການພົບປະ, ຜູ້ຕາງໜ້າພໍ່ແມ່ປະຊາຊົນຊາວ ຫວຽດນາມ ອາໄສຢູ່ຕ່າງປະເທດຜູ້ດີເດັ່ນຢູ່ປະເທດຕ່າງໆຄື: ຍີ່ປຸ່ນ, ເຢຍລະມັນ, ອາເມລິກາ, ອັງກິດ, ໂປໂລຍ, ແດນມາກ, ສ. ເກົາຫຼີ, ລາວ, ກຳປູເຈຍ… ໄດ້ແຈ້ງໃຫ້ຊາບບາງເນື້ອໃນພື້ນຖານກ່ຽວຂ້ອງເຖິງຊີວິດດ້ານເສດຖະກິດ, ວັດທະນະທຳ, ການສຶກສາຢູ່ປະເທດປະຈຳຖິ່ນ, ພ້ອມທັງແບ່ງປັນບັນດາຄວາມຫຍຸ້ງຍາກ, ສິ່ງສະດວກໃນວຽກງານເຕົ້າໂຮມ, ຂົນຂວາຍພໍ່ແມ່ປະຊາຊົນຫວຽດນາມ ອາໄສຢູ່ຕ່າງປະເທດເຂົ້າຮ່ວມການເຄື່ອນໄຫວວົງຄະນະຍາດ, ມຸ່ງໄປສູ່ບ້ານເກີດເມືອງນອນ, ປະເທດຊາດ.
ທ່ານ ຫງວຽນທ້ຽນເຍີນ ເນັ້ນໜັກວ່າ: ພັກ ແລະ ລັດ ຍາມໃດກໍ່ເອົາໃຈໃສ່ ແລະ ຕີລາຄາສູງບັນດາການປະກອບສ່ວນຂອງພໍ່ແມ່ປະຊາຊົນຊາວ ຫວຽດນາມ ອາໄສຢູ່ຕ່າງປະເທດ ແລະ ຢືນຢັນປະຊາຄົມຊາວ ຫວຽດນາມ ອາໄສຢູ່ຕ່າງປະເທດ ແມ່ນພາກສ່ວນໜຶ່ງບໍ່ອາດຕັດແຍກອອກຈາກຊາດ ຫວຽດນາມ ໄດ້. ຮັບຮູ້ບັນດາຄຳເຫັນປະກອບ ແລະ ແບ່ງປັນຂໍ້ມູນຂ່າວກ່ຽວກັບປະຊາຄົມຊາວ ຫວຽດນາມ ຢູ່ປະເທດຕ່າງໆ, ທ່ານ ຫງວຽນທ້ຽນເຍີນ ຖືວ່າ: ເລື່ອງສະໜອງຂໍ້ມູນຂ່າວສານກ່ຽວກັບປະເທດຊາດແມ່ນສຳຄັນທີ່ສຸດ ແລະ ບໍ່ອາດປະປ່ອຍໃຫ້ພໍ່ແມ່ປະຊາຊົນຊາວ ຫວຽດນາມ ອາໄສຢູ່ຕ່າງປະເທດຂາດແຄນຂໍ້ມູນຂ່າວສານກ່ຽວກັບປະເທດຊາດໄດ້.
ແລະກໍ່ໃນຕອນບ່າຍວັນທີ 25/1, ທ່ານປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ຫງວຽນທ້ຽນເຍີນ ໄດ້ລົງຢ້ຽມຢາມຄຸນພໍ່ ຫງວຽນກົງແຢງ, ປະທານຄະນະກຳມະການສາມັກຄີສາສະໜາຄຼິດ ຫວຽດນາມ ຊຶ່ງພວມປິ່ນປົວຢູ່ໂຮງໝໍ ທົ໋ງເຍີດ, ນະຄອນໂຮ່ຈີມິນ.