ວຽກງານການຕ່າງປະເທດຂອງຫວຽດນາມໃນປີ2013ບັນລຸຜົນງານສຳຄັນຫຼາຍຢ່າງ
ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ ກ່າວຄຳເຫັນທີ່ງານລ້ຽງ
(vovworld) – ກ່າວຄຳເຫັນທີ່ງານລ້ຽງບັນດາເອກອັກຄະລັດຖະທູດ, ຜູ້ຕາງໜ້າ, ຫົວໜ້າຜູ້ຕາງໜ້າບັນດາອົງການສາກົນ, ຫົວໜ້າສະຖານກົງສູນໃຫຍ່ປະເທດຕ່າງໆປະຈຳຫວຽດນາມ, ຖືກຈັດຂຶ້ນໃນຕອນຄຳ່ວັນທີ 20/1, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ ເນັ້ນໜັກບົດບາດຂອງວຽກງານການຕ່າງປະເທດຂອງຫວຽດນາມ ໃນການເປີດກ້ວາງ ແລະ ປັບປຸງການພົວພັນຮ່ວມມືມິດຕະພາບກັບບັນດາປະເທດໃນພາກພື້ນ ແລະ ໃນໂລກ. ປີ 2013, ວຽກງານການຕ່າງປະເທດຂອງພັກ, ລັດ ຫວຽດນາມ ສືບຕໍ່ບັນລຸໄດ້ຜົນງານສຳຄັນຫຼາຍຢ່າງ, ການພົວພັນມິດຕະພາບ ການຮ່ວມມືກັບບັນດາປະເທດໄດ້ຮັບການປັບປຸງ ແລະ ເບີດກ້ວາງ, ສະພາບແວດລ້ອມສັນຕິພາບ, ສະຖຽນລະພາບໄດ້ຮັບການຮັກສາໄວ້. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບິ່ງມິງ ເນັ້ນໜັກວ່າ:
“ພວກຂ້າພະເຈົ້າເຊື່ອໝັ້ນຢ່າງແນວແນ່ວ່າ ການຮ່ວມມື, ການໜູນຊ່ວຍ ແລະ ການຊ່ວຍເຫຼືອເຊິ່ງກັນ ແລະ ກັນ, ເພີ່ມທະວີການສ້າງຄວາມໄວ້ເນື້ອເຊື່ອໃຈ, ເຄົາລົບນັບຖືຜົນປະໂຫຍດຂອງກັນແມ່ນພື້ນຖານ, ແມ່ນວິທີພື້ນຖານ ແລະ ມີປະສິດທິຜົນທີ່ສຸດເພື່ອໃຫ້ພວກເຮົາຜ່ານຜ່າຄວາມຫຍຸ້ງຍາກ, ມຸ່ງໄປເຖິງຈຸດໝາຍສັນຕິພາບ ແລະ ພັດທະນາ. ໃນຄວາມມານະພະຍາຍາມນັ້ນ, ບົດບາດເປັນຂົວເຊື່ອມຕໍ່ຢ່າງຕັ້ງໜ້າ, ຂະຫຍັນຂັນເຄື່ອນຂອງພວກເພື່ອນມີຄວາມໝາຍສຳຄັນທີ່ສຸດເພື່ອຊຸກຍູ້ການພົວພັນລະຫວ່າງປະເທດ, ອົງການຈັດຕັ້ງຂອງພວກເພື່ອນ ແລະ ຫວຽດນາມ, ເພື່ອໃຫ້ບັນດາປະເທດພວກເຮົາພັດທະນານັບມື້ນັບດີງາມໃນປະຊາຄົມມິດຕະພາບແລະຈະເລີນຮຸ່ງເຮືອງ. ”
ໂດຍຕາງໜ້າໃຫ້ຄະນະທູຕານຸທູດ, ຫົວໜ້າຄະນະການທູດ ປະຈຳ ຫວຽດນາມ, ທ່ານເອກອັກຄະລັດຖະທູດ ມາຣົກ El Houcine Fardani ຢັ້ງຢືນວ່າ: ຄະນະການທູດ ປະຈຳ ຫວຽດນາມ ພ້ອມແລ້ວທີ່ຈະພ້ອມກັບຫວຽດນາມ ພັດທະນາ ແລະ ຊຸກຍູ້ການພົວພັນຮ່ວມມືລະຫວ່າງ ຫວຽດນາມ ແລະ ບັນດາປະເທດ ກໍ່ຄືກັບບັນດາອົງການຈັດຕັ້ງສາກົນ, ບົນຈິດໃຈຮ່ວມມືສັນຕີພາບຕາງຝ່າຍຕ່າງມີຜົນປະໂຫຍດ.