(vovworld) - ຜູ້ອຸປະໂພກ ບໍລິໂພກຫວຽດນາມ ນັບມື້ນັບຕີລາຄາສູງ ແລະ ໃຫ້ບຸລິມະສິດຊົມໃຊ້ສິນຄ້າທ່ີຜະລິດຢູ່ພາຍໃນປະເທດ, ປະກອບສ່ວນຊຸກຍູ້ການຜະລິດ ແລະ ຊົມໃຊ້ຢູ່ພາຍໃນປະເທດ. ນີ້ແມ່ນຂໍ້ສັງເກດທີ່ກອງປະຊຸມສະຫຼຸບ 3 ປີແຫ່ງການຜັນຂະຫຍາຍປະຕິບັດບັ້ນຂົນຂວາຍ “ຊາວຫວຽດນາມ ບຸລິມະສິດຊົມໃຊ້ສິນຄ້າຫວຽດນາມ” ເຊິ່ງຖືກຈັດຂຶ້ນໃນຕອນເຊົ້າວັນທີ 14/12, ຢູ່ທີ່ຮ່າໂນ້ຍ, ທ່ານຮອງນາຍົກລັດຖະມົນຕີຫວຽດນາມ ຫ່ວາງຈຸງຫາຍ, ປະທານຄະນະກຳມະການແນວໂຮມປະເທດຊາດຫວຽດນາມ ຮີ່ນດ໋າມ ພ້ອມກັບບັນດາການນຳກະຊວງ, ຂະແໜງການສູນກາງ ແລະ ບາງແຂວງ, ນະຄອນພ້ອມກັນເຂົ້າຮ່ວມ.
ກ່າວຄຳເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີ ຫ່ວາງຈຸງຫາຍ ເນັ້ນໜັກວ່າ; ເພື່ອໃຫ້ບັ້ນຂົນຂວາຍເສີມຂະຫຍາຍເຂົ້າສູ່ຊີວິດຕົວຈິງ ແລະ ມີປະສິດທິຜົນ, ຕ້ອງເພີມທະວີການໂຄສະນາ, ສ້າງຂະບວນການຂົນຂວາຍໃນທົ່ວສັງຄົມສະໜັບສະໜູນປະຕິບັດບັ້ນຂົນຂວາຍຢ່າງເລິກເຊິ່ງ ແລະ ກວ້າງຂວາງ, ທ່ານຮອງນາຍົກລັດຖະມົນຕີ ຫ່ວາງຈຸງຫາຍ ໄດ້ກ່າວວ່າ.
“ຈຸດໝາຍຂອງການປະຕິບັດບັ້ນຂົນຂວາຍ ແມ່ນເພື່ອແນໃສ່ເສີມຂະຫຍາຍນ້ຳໃຈຮັກຊາດ ແລະ ສ້າງວັດທະນະທຳຊົມໃຊ້ຂອງຊາວຫວຽດນາມ, ຊຸກຍູ້ການຜະລິດສິນຄ້າທີ່ມີຄຸນນະພາບສູງ ທີ່ທ່າແກ້ງແຍ່ງສູງ ແລະ ຕອບສະໜອງຄວາມຕ້ອງການຢູ່ພາຍໃນປະເທດ ແລະ ການສົ່ງອອກ. ຈຸດປະສົງຄືວ່າງ່າຍດ່າຍ ແຕ່ມີຄວາມໝາຍຍຸດທະສາດທີ່ໃຫຍ່ຫຼວງພິເສດໃນໄລຍະເຊື່ອມໂຫຍງຄືປະຈຸບັນ.”