(vovworld) – ໃນຂອບເຂດການຢ້ຽມຢາມສັນຕະວະໄມຕີ ຈີນຢ່າງເປັນທາງການໃນລະຫວ່າງວັນທີ 16 – 18/10, ຕາມຄຳເຊື້ອເຊີນຂອງທ່ານລັດຖະມົນຕີກະຊວງປ້ອງກັນປະເທດ ຈີນ ຈ໋າງກວານແຈ໋ວນ, ຕອນເຊົ້າວັນທີ 18/10, ຄະນະຜູ້ແທນການທະຫານຂັ້ນສູງ ຫວຽດນາມ ໂດຍທ່ານລັດຖະມົນຕີກະຊວງປ້ອງກັນປະເທດ ຟູ່ງກວາງແທງ ນຳໜ້າໄດ້ພົບປະກັບພົນໂທ ຝານແຈວງຫລູງ , ຮອງປະທານຄະນະພັກກອງທັບສູນກາງພັກກອມມູນິດ ຈີນ, ຢ້ຽມຢາມສະຖານທູດ ຫວຽດນາມ ປະຈຳ ຈີນ.
ກ່ອນໜ້ານັ້ນ, ຕອນບ່າຍວັນທີ 17/10, ທີ່ການຕ້ອນຮັບຄະນະຜູ້ແທນການທະຫານຂັ້ນສູງ ຫວຽດນາມ, ທ່ານຮອງປະທານປະເທດຈີນ ຫຼີແຢວນສາວ ຢັ້ງຢືນວ່າ: ຈີນ ຖືເປັນສຳຄັນການພົວພັນຮ່ວມມື, ມິດຕະພາບກັບ ຫວຽດນາມ. 2 ຝ່າຍຄວນສືບທອດ ແລະ ເສີມຂະຫຍາຍການຮ່ວມມື ມິດຕະພາບທີ່ເປັນມູນເຊື້ອໂດຍການນຳລຸ້ນກ່ອນເພີ່ມພູນຄູນສ້າງແມ່ນຊັບສົນບັດອັນລ້ຳຄ່າຂອງ 2 ພັກ, 2 ລັດ.
ທ່ານລັດຖະມົນຕີ ຟູ່ງກວາງແທງ ຢືນຢັນເລື່ອງ 2 ພັກ, 2 ລັດ, ພິເສດແມ່ນກອງທັບ 2 ປະເທດສືບຕໍ່ຮັກສາການພົວພັນໃຫ້ພັດທະນາຢ່າງປອດໄສ, ສະຖຽນລະພາບ, ການແກ້ໄຂບັນດາບັນຫາບໍ່ລົງລອຍກັນແມ່ນຈຳເປັນທີ່ສຸດ, ພິເສດແມ່ນໃນສະພາບການສາກົນປະຈຸບັນ ແລະ ສະພາບຢູ່ທະເລຕາເວັນອອກມີການຜັນແປຢ່າງເຄັ່ງຕຶງ, ສັບສົນ. ທ່ານພົນເອກ ຟູ່ງກວາງແທງ ສະເໜີໃຫ້ຝ່າຍ ຈີນ ລົບລ້າງຄຳກ່າວເຕືອນກ່ຽວກັບການທ່ອງທ່ຽວເພື່ອສ້າງເງື່ອນໄຂໃຫ້ປະຊາຊົນ 2 ປະເທດພົວພັນແລກປ່ຽນ, ທ່ອງທ່ຽວ, ປະກອບສ່ວນເຂົ້າໃນການພັດທະນາເສດຖະກິດ, ເພີ່ມທະວີມິດຕະພາບ ແລະ ຄວາມໄວ້ເນື້ອເຊື່ອໃຈລະຫວ່າງປະຊາຊົນ 2 ປະເທດ.
ຕອນເຊົ້າວັນດຽວກັນ, ທີ່ສຳນັກງານກະຊວງປ້ອງກັນປະເທດ ຈີນ ໄດ້ດຳເນີນພິທີຕ້ອນຮັບຄະນະຜູ້ແທນການທະຫານຂັ້ນສູງ ຫວຽດນາມຢ່າງເປັນທາງການ. ທີ່ການເຈລະຈາພາຍຫຼັງພິທີຕ້ອນຮັບ, ລັດຖະມົນຕີກະຊວງປ້ອງກັນປະເທດ ຈີນ ທ່ານ ຈ໋າງກວານແຈ໋ວນ ແລະ ລັດຖະມົນຕີກະຊວງປ້ອງກັນປະເທດ ຫວຽດນາມ ຟູ່ງກວາງແທງ ໄດ້ເຫັນດີເປັນເອກະສັນວ່າ: ໄລຍະຈະມາເຖິງ, ຄວນເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ເພີ່ມທະວີບັນດາການຢ້ຽມຢາມ ແລະພົບປະຂັ້ນສູງ, ຊຸກຍູ້ການພົວພັນແລກປ່ຽນລະຫວ່າງບັນດາກຳລັງປ້ອງກັນຊາຍແດນ…
ພາຍຫຼັງການເຈລະຈາ, ລັດຖະມົນຕີ 2 ທ່ານໄດ້ເປັນສັກຂີພິຍານພິທີເຊັນບົດບັນທຶກຊ່ວຍຈຳດ້ານເຕັກນິກ ແລະ ສ້າງຕັ້ງໂທລະສັບຕິດຕໍ່ພົວພັນໂດຍກົງລະຫວ່າງກະຊວງປ້ອງກັນປະເທດ 2 ປະເທດ.