(vovworld) - ວັນທີ 20/3, ຈີນໄດ້ຮຽກຮ້ອງໃຫ້ ສປປ ເກົາຫຼີ ແລະ ອາເມລິກາ ລະຫງັບໃຈ ແລະ ສືບຕໍ່ການເຈລະຈາກ່ຽວກັບແຜນການຍິງດາວທຽມຂອງພຽງຢາງໃນກາງເດືອນ 4 ຈະມາເຖິງ. ທ່ານ ຫຼົວຈາວໄຄ, ຫົວໜ້າກົມບັນດາບັນຫາອາຊີ ສັງກັດກະຊວງການຕ່າງປະເທດຈີນ ໃຫ້ຮູ້ວ່າ: ຈີນສະແດງຫຼັກໝັ້ນ ແລະ ມີຄວາມວິຕົກກັງວົນຕໍ່ທຸກຝ່າຍ, ພ້ອມທັງເລັ່ງລັດເຂົາເຈົ້າລະຫງັບໃຈ. ທ່ານ ຫຼົວຈາວໄຄ ຮຽກຮ້ອງໃຫ້ ວໍຊິງຕັນ ແລະ ພຽງຢາງຮັກສາຂໍ້ຕົກລົງເຊິ່ງ 2 ຝ່າຍບັນລຸໄດ້ເມື່ອເດືອນ 2 ແລະ ຖືວ່ານີ້ແມ່ນ “ການເລີ່ມຕົ້ນສັນຕິພາບ” ໃນແຫຼມເກົາຫຼີ.
ແລະກໍໃນວັນດຽວກັນ, ໂຄສົກກະຊວງການຕ່າງປະເທດຈີນ ຫົງເຫຼີຍ ໃຫ້ຮູ້ວ່າ: ບັນດານັກການທູດຂັ້ນສູງຂອງຈີນໄດ້ແລກປ່ຽນທັດສະນະກັບບັນດາເອກອັກຄະລັດຖະທູດຂອງ ສປປ ເກົາຫຼີ, ລັດເຊຍ, ອາເມລິກາ, ສ. ເກົາຫຼີ ແລະ ຍີ່ປຸ່ນກ່ຽວກັບບັນຫາດັ່ງກ່າວ. ທ່ານເນັ້ນໜັກວ່າ: ເລື່ອງຮັກສາສັນຕິພາບ ແລະ ສະຖຽນລະພາບຢູ່ເຂດ ອາຊີຕາເວັນອອກສ່ຽງເໜືອ ແລະ ແຫຼມເກົາຫຼີ ທັງແມ່ນຜົນປະໂຫຍດ ແລະ ແມ່ນຄວາມຮັບຜິດຊອບລວມຂອງປະເທດຕ່າງໆ. ຈີນຈະຮັກສາການຕິດຕໍ່ພົວພັນກັບທຸກຝ່າຍຢ່າງແໜ້ນແຟ້ນ.