(vovworld) – ຕອນເຊົ້າວັນທີ 6/10, ທີ່ການເຈລະຈາລະຫວ່າງທ່ານນາຍົກລັດຖະມົນຕີ ຫວຽດນາມ ຫງວຽນເຕີ້ນຢູ້ງ ແລະ ທ່ານນາຍົກລັດຖະມົນຕີ ສ. ວານົວຕູ Joe Natuman, ການນຳ 2 ທ່ານໄດ້ເຫັນດີເປັນເອກະສັນກັນໃນໄລຍະຈະມາເຖິງ, ຄວນຍູ້ແຮງການແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆ, ພ້ອມທັງສົ່ງເສີມການພົວພັນແລກປ່ຽນປະຊາຊົນເພື່ອເພີ່ມທະວີຄວາມເຂົ້າອົກເຂົ້າໃຈ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ. ທ່ານນາຍົກລັດຖະມົນຕີ Joe Natuman ຕີລາຄາສູງເລື່ອງ ຫວຽດນາມ ພ້ອມແລ້ວຈະແບ່ງປັນບົດຮຽນໃນບັນດາຂົງເຂດເຊື່ອມໂຍງເຂົ້າກັບສາກົນ ແລະ ພັດທະນາ, ຢັ້ງຢືນ ວານົວຕູ ປາດຖະໜາ ແລະ ເຫັນດີເປັນເອກະພາບຈະພ້ອມກັບ ຫວຽດນາມ ຊຸກຍູ້ການຮ່ວມມືລະຫວ່າງ 2 ປະເທດ ໃນບັນດາຂົງເຂດເຊິ່ງຕ່າງຝ່າຍຕ່າງມີຄວາມສາມາດບົ່ມຊ້ອນຄື: ຜະລິດຕະພັນກະເສດ - ເຄື່ອງປ່າຂອງດົງ - ສິນໃນນ້ຳ, ຂຸດຄົ້ນແຮ່ທາດ, ພ້ອມທັງມີບັນດາມາດຕະການສົ່ງເສີມການຊຸກຍູ້ການຄ້າ, ການລົງທຶນ, ການທ່ອງທ່ຽວລະຫວ່າງ 2 ປະເທດ. ແລກປ່ຽນກ່ຽວກັບສະພາບການພາກພື້ນ ແລະ ສາກົນ, ການນຳ 2 ທ່ານເຫັນດີເປັນເອກະສັນສືບຕໍ່ສົມທົບກັນຢູ່ບັນດາກົນໄກຮ່ວມມືຫຼາຍຝ່າຍເຊິ່ງທັງ 2 ຝ່າຍພ້ອມກັນເຂົ້າຮ່ວມ, ພິເສດແມ່ນ ສປຊ, ຂະບວນການບໍ່ຮ່ວມກຸ່ມ ແລະ ປະຊາຄົມໃຊ້ພາສາ ຝຣັ່ງ, ເພື່ອສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ ແລະ ຢູ່ໃນໂລກ.
ກ່ຽວກັບບັນຫາທະເລຕາເວັນອອກ, ທ່ານນາຍົກລັດຖະມົນຕີ ວານົວຕູ ຢືນຢັນສະໜັບສະໜູນຫຼັກໝັ້ນຂອງ ຫວຽດນາມ ແລະ ບັນດາປະເທດ ອາຊຽນ ກ່ຽວກັບການແກ້ໄຂຄວາມຂັດແຍ້ງຢູ່ທະເລຕາເວັນອອກດ້ວຍມາດຕະການສັນຕິພາບ, ເຄົາລົບກົດໝາຍສາກົນ, ໃນນັ້ນ ມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982, ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງເຂັ້ມງວດ ແລະ ສ້າງປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC) ໂດຍໄວ.